حيضيّق عينيه أوي .. و بعدين يدوّر الكرسي بتاعه بالكامل

حيضيّق عينيه أوي .. و بعدين يدوّر الكرسي بتاعه بالكامل في إتجاهك .. مابيكتفيش إنه يدوّر راسه أو جسمه .. لا لا .. حتلاقيه لازم يقوم و يلف الكٌرسي بالكامل في إتجاهك .. و بعدين يسكّت جميع الموجودين حواليكم بإشارة من إيده .. و يقول بصوت واثق من نفسه ثقة عمياء : إزاااااااااااااااااااي عايز تكنعني إنهم قدروا يتكلموا مع رواد الفضاء اللي طلعوا علي القمر صوت و صورة في الستينيات ؟! .. لكن أنا دلوقتي سنة 2026 موبايلي بيقطع في المكالمة الصوت العادية ؟!!!!! . و بعدين يبص للي حواليه بعد ما ظن إنه أفحم جميع الموجودين و يستطرد و يقول : أصلهم مابيحبّوش اللي يشغّل عقله زيي كده .. لااااااااااا … هٌمّا بيتشطّروا عالناس اللي مش بتسأل .. . و بعدين يرجع تاني يبص لي و يقول : قول ليا بقي يا مهندس الإتسالات .. تيجي إزاي دي ؟! . . أكون خلّصت أنا إرتشاف شوب البوريو بالفراولة إكسترا كراميل سٌكّر برّة .. و أتنحنح و أسأل بهدوء : بتحب البيتزا بتاعتك إيه ؟! . . و قبل ما يمسك الكٌرسي و يحاول يلف بيه تاني يتسائل أقصد إيه .. أقول له أنا : صبراً … خليني أشرح 🤣 … تيجي أشرح لك إتصالات و موجات و راديو ؟! .. بس ثواني .. هو يعني إيه أساساً راديو !! .. و الكلمة دي جات منين ؟! .. طيب إستني بس .. تعالي نركب توكتوك آلة الزمن لحد عمّك نيوتن .. و نسأله ( هو شغّال علي إيه ) .. حتلاقيه ماسك حتت إزاز و شغّال يقسّم الضوء الأبيض لقوس قزح .. و يحاول يفهم موجاته رياضياً .. بس ثواني .. إنت فاهم الرياضة اللي هو شغّال بيها دي .. إتعلمها فين ؟! حتلاقي عمّك نيوتن يقول لك : يابا فكك منّي دلوقتي أنا مشغول .. روح إسأل عند جاليليو .. . حندفع أجرة يادوب 100 سنة لورا .. ننزل عند أول شارع جاليليو .. حتلاقيه بيتحاكم و عليه مٌراقبة و مٌسجّل خطر 🤣 .. تسأل ليه … حيقولوا لك : أصله بيهرطق و بيقول كلام .. ولامؤاخذة يعني .. كوبرنيقوس 🤣 . كوبرنيقوس مش حاجة قليلة الأدب والله 🤣🤣 ده إسم راجل ( نيكولاس كوبرنيقوس ) .. عاش قبل جاليليو ب 200 سنة تقريباً .. . حناخد نفس توكتوك آلة الزمن .. و ندفع أجرة أعلي شوية .. و ننزل علي أول حارة كوبرنيقوس .. حتلاقيهم حاطّين كراسي و جايبين حد يقرا .. و ناس بتعيّط و بيقولوا إنه خلاص بيودع و بيموت .. . حنلحقه فآخر نفس .. و نسأله .. يا عم الحاج يا عم الحاج .. هو إنت قلت إيه حيخلّي جاليليو يتحاكم بعدك ب 200 سنة ؟! .. حيكح .. و يمسك صدره .. و يقول فآخر نفس : ” أنا باقول إن الشمس و الكواكب مش بتدور حوالين الأرض .. و إن الأرض مش هي مركز الكون .. و إن الأرض و الكواكب بتدور حوالين الشمس ” . حنسأله : و فضلت شايل السر ده فصدرك طول عمرك ليه ياسطي ؟! و جاي تقوله دلوقتي ؟! .. حيقول لك : أصلي لو كنت قلت ده قبل كده .. كانوا حيفصلوني من الكنيسة اللي هو شغّال فيها ( مٌحامي و دكتور و مهندس و فقيه .. و مدرس فرنساوي لحد ما يجيبوا مدرس فرنساوي 🤣 ) .. لكن دلوقتي أنا خلاص .. باموت .. و مش فارق معايا حد .. . و قبل ما يودع خلاص .. حنسأله : طيب هو إنت أساساً شاغل بالك بحوارات الكواكب و النجوم و باقي أسامي مجلات التسعينات دي ليه ياسطي ؟! .. إيه اللي جبرك علي البص في السما و البحث فكل الكلام ده ؟! . . حتلاقيه راح مطلّع من جيبه 10 جنيه .. و راح حاططها في جيب سواق توكتوك آلة الزمن .. و قال له : ” خٌدهم وصلهم عند البداية .. وصلهم قبل الزراعة ” . و مات … حتلاقي الواد اللي في 5 إبتدائي اللي سايق بينا توكتوك آلة الزمن حط ال10 جنيه في جيبه .. و قال لك إمسك في الكرسي جامد عشان حايشرخ بسرعة .. و يطلع بيك علي زمااااااااااااااااااااااااااااااااااااااااااااااان .. .. عند قبل الزراعة .. قبل ما البشر يعني يكونوا لسة ( إحترفوا الزراعة ) .. أيام ما كان البشر كلهم بيعيشوا عن طريق إنهم يكونوا ( Hunter gatherer ) .. يعني يصيدوا و يلقّطوا رزقهم من النباتات و الأشجار عموماً .. بدون ما يهدوا كده و يقعدوا في حتة أرض .. … حتلاقي واحد منهم بيكلّم أخوه .. و يقول له : ياسطي أنا تعبت من اللف .. مابقتش عيشة دي بقي إننا طول الوقت رحّالة بنجري ورا معيز و خرفان .. . و راح رامي بذرة أفوكادو كان بياكل فيها في الأرض .. . أخوه قال له : إنت ياسطي كل ما حنعدّي من هنا حترمي بذر اللي بتاكله فنفس المكان ؟! .. إتعلّم نضافة بقي و إرمي في الباسكت اللي هناك ده . . حتلاقي الأولاني فجأة بيقول : ياسطي في حاجة غريبة .. البذرة اللي رميتها السنة اللي فاتت في المكان ده .. المكان ده كان فاضي .. دلوقتي بقي في شجرة مزرّعة !!! . . أخوه حيقول له : تصدّق فعلاً ؟!! شكلنا إكتشفنا سر حاجة جديدة ياض .. تعالي نسمّيها ( زراعة ) .. … و بعدين إركب معايا توكتوك آلة الزمن بقي .. و شوف مٌعاناة البشر في موضوع الزراعة ده .. مئات السنين .. و البشر بيحاولوا ينتقلوا من مرحلة ال ( Hunter gatherer ) لمرحلة الإستقرار في مكان واحد جنب أرض يزرعوها و ياكلوا منها .. لكن .. تزرع بدري .. المحصول يموت عشان مافيش مطر .. تزرع متأخّر .. المحصول يموت عشان المطر شديد فحت .. تزرع برتقان في الصيف .. يطلع مٌر .. تزرع مانجا في الشتا .. تلاقي راجل طالع في البرامج يقول لك ماتاكلش مانجا ولا بطيخ 🤣🤣 . . طيب نعمل إيه ؟ نعمل إيه ؟! . و أثناء ما هما بيفكروا بقالهم مئات السنين .. طلع منهم واحد ذكي ألمعي .. و قال لك : تعالي نتوقع .. تعالي نراقب و نشوف .. إزاي نتوقع مواسم المطر و الجفاف و التغيرات الجوية دي . . طيب نعمل ده إزاي ؟! .. إكتشفوا إن في ( Patterns = قوالب متكررة و مٌعتادة ) لحركة الحاجات اللي في السما دي .. حاجات منورة إسمها نجوم ( stars .. و باللاتيني stella .. يعني حرفياً حاجة بتلمع ) .. و بالظبط كده .. هٌما سمّوا النجوم علي إسم ماركة إزازة بيرة لقوها مرمية في خرابة جنب الكهف .. مش العكس إطلاقاً 🤣 . . و حاجات تانية منورة برضو .. و بتلمع .. لكن حركتها مٌختلفة تماااااااااماً عن حركة النجوم .. النجوم كانت حاجات شبه ثابتة في السما .. تقدر تتحرّك بناءاً عليها ( و علامات .. و بالنجم هٌم يهتدون ) .. . لكن الحاجات التانية المنورة دي .. كان إسمها ( planetes باللاتيني .. يعني Wanderers بالإنجليزي .. يعني الرحّالة الهائمين بالعربي ) . . و ده .. لأن مسارات الكواكب كانت غير مٌتوقعة إطلااااااااقاً !! .. ماتقدرش تعتمد عليها عشان تعرف الإتجاهات علي الأرض .. ولا تتوقع هي حتظهر إمتي و تختفي إمتي .. . أو .. للدقة .. عشان تقدر تتوقع حركة الكواكب .. كنت محتاج بقي إنك تقعد تذاكرهم مدة طويلة أكتر .. لحد ما تقدر تشوف فعلاً ( قوالب - Patterns ) للحركة دي .. و تقدر ترسمها .. … و علي ما وصلنا لحد مرحلة التاريخ المعروف لنا .. ( الرومانيين و الفراعنة و الناس الطيبين دول ) .. كانت البشرية وصلت ل وصف فعلاً .. وصف معقرب أوي .. مٌعقد جداً .. . بالظبط كإنك قاعد بتتفرج علي ماتش كرة قدم .. و إنت مش فاهم قواعد اللعبة .. ف بتفضل تراقب و تراقب و تراقب .. لحد ما تقدر تتوقع شوية حاجات .. إن في حاجة إسمها أوفسايد .. إن في حاجة إسمها أوت .. إن في حاجة إسمها مدة شوط أول و مدة شوط تاني .. . لكن إنت لسة مش فاهم قواعد اللعبة .. ف بتوصف بناءاً علي التكرار .. مش القواعد الأساسية اللي نشأ منها الحركة . . و فرق ضخم جداً جداً جداً بين الطريقتين دول في التفكير .. طريقة الوصف المٌعتمدة علي التكرار .. دي الطريقة البشرية المٌعتادة المتناقلة بين الأجيال .. و اللي بيتبني عليها العٌرف و التقاليد و الموروثات . . لكن .. طريقة التفكير في ( سبب ) الحدوث نفسه .. دي هي طريقة إعمال العقل عن طريق التأمل و التدبّر .. و اللي إحترفها عدد قليل من البشر علي مدار التاريخ .. … و أول إسم مشهور في التاريخ الحديث ( مش حديث أوي يعني ) بتاعنا.. عمل الموضوع ده في حركة النجوم و الكواكب .. هو كان كوبرنيقوس .. كان في ناس قبله قالت نفس اللي هو قاله بالمناسبة .. و إن الأرض مش مركز الكون .. بل إن الأرض و الكواكب غالباً بتدور حوالين الشمس .. . لكن كوبرنيقوس قالها بصيغة أوضح .. و ب لغة لا تقبل الجدال .. و هي لغة الرياضيات . لكن عشان كان عارف مدي الضغط المٌجتمعي في الإتجاه المٌضاد ( خصوصاً إنه فعلاً كان شغّال في مركز عالي في الكنيسة ) .. نشر كتابه و هو علي فراش الموت . … و فضل كلامه و كتابه ده ممنوعات علي البشرية .. لحد عمّك جاليليو .. .. لو رجعت في بوستاتي من شهور طويلة شوية .. حتلاقي إني كنت باشرح في سلسلة بوستات عن عصر النهضة .. و كنت المفروض إني أكمّل شرح لحد ما أوصل لمرحلة محاكمة جاليليو … و ها قد وصلنا 🤣.. متأخّر شوية أنا عارف .. و لكن أعذر عشوائيتي .. . الرحلة تكمل في البوستات القادمة إن شاء الله .. من جاليليو .. لحد نيوتن .. ثم كل ما له علاقة بفيزياء و هندسة عصرنا الحالي .. و الكاميرات الديجيتال ( اللي رجعتني أشرح القصة دي تاني ) … غالباً لحد ما حنوصل لعوالم الكوانتم لو ربنا إداني و إداكم طولة العمر 😆 . … و الله أعلم .