ماتزعلش نفسك عشان خاطري .. إنت مش السبب .. إنت

ماتزعلش نفسك عشان خاطري .. إنت مش السبب .. إنت مالكش دعوة باللي حصل ده .. أنا عارف إنك زعلان و مخضوض و حاسس إنك متضايق شوية بسبب الأخبار اللي علي الفيس دي .. بس أنا عايزك تعرف إن كل ده بعيد عنك .. مش حيحصل لك و لا حد تعرفه أو يهمه أمرك . … إنت مش مسئول ولا عليك أى مسئولية عن اللي حصل .. إنت ماقتلتش .. ولا قلت إقتل .. ولا شجعت علي القتل .. … هو اللي فهم غلط .. ما كلنا دخلنا نفس الفيلم من سبع سنين .. و ضحكنا علي نفس اللقطة .. و أعجبنا كلنا بشخصية البطل و هو بيصيح فوسط الشارع و هو ماسك المطوة إن ( حنان بنت الحاج حسين تخصه .. و اللي حيقرب منها حيقطعله وشه ) . فاكر إنت الفيلم ده سنة 2015 ؟ كان فيلم جامد ف##% و كان نازل في العيد أنا فاكر .. و دفعنا فلوس في السينيما أنا و إنت و دخلناه .. … أيوة يا عم فاكر إن الواد ده كان عنده لسة 14 سنة أيامها .. كان قاعد ورانا هو و أصحابه .. فاكر عينيه و هي بتلمع و هو شايف كل البنات بتمصمص شفايفها و هما بيكراشوا علي أحمد عز في اللقطة دي .. فاكره و هو بيسمعك و إنت بتقول في اللقطة دي إن ( هو ده الصح ) .. فاكر لما إنت كلمت خطيبتك ساعتها و شتمتها بعد الفيلم مباشرة و هو سمعك .. و بعد ما قفلت معاها خبطت علي كتفه كده و قلت له ( إتعلم الرجولة ياض ) . و هو فضل باصص ليك بإعجاب و إنت كنت رمز الرجولة بالنسبة له . … … صدقني مش إنت المسئول .. يا عم ما كلنا بنتفرج علي الأفلام و المسلسلات دي من زمان و طلعنا زي الفل أهه .. سيبك إنت .. ييجوا إيه العيال الأى كلام بتوع اليومين دول فبلطجة زمان ولا رجولة زمان .. يا عم إنت زمان ده كان زمن الفن الجميل .. طب أقولك .. أنا عارف إيه اللي حيخليك تفك و تروق كده .. تعالي نشغل فيلم كوميدي من بتوع الزعيم .. الراجل ده عمره ما فشل إنه يضحكني .. أنا متربي علي أفلامه أساساً .. تعرف ؟ .. أنا مرة شفته معدي من بعيد .. طلعت جري عليه و رحت بوست إيده .. و هو كان طيب أوي و تحسه إبن بلد فنفسه كده و فاهم الدنيا صح .. … يا عم بتقول إيه بس ؟ تحرش بالممثلات اللي معاه في أفلامه و مسلسلاته إيه ؟! ده هما اللي كانوا بيبقوا حيموتوا عليه .. إنت مش فاكر لما قال في الفيلم ( أنا مافيش مرة ماتحبنيش ) ؟! أمال إنت فاكر إيه ؟ الراجل ده أفلامه تتدرس يابني .. هي العيال ماباظتش غير لما دخل لهم النت .. إحنا كنا زمان بنتجمع قدام التيليفزيون و نتفرج علي الفيلم كلنا مع بعض و نضحك مع بعض .. … … روق بقي كده يا عم و فك و ماتخليهاش نكد .. أيوة يا عم عارف إنك مفلس و عليك ديون و قلقان .. أيوة أيوة إنت قلت لي علي موضوع إنك بتفكر تطلع الساحل تشتغل هناك في موسم الصيف ده .. عارف إنت ؟ .. انا شفت المطرب الفنان اللي لسة منزل أغنية من سنة ده هناك .. و كان مشهور فحت .. فاكره ؟ بيقولك ده كان زينا كده و كان شغال عامل باليومية .. بس البلية لعبت معاه و عمل أغنية و سمعت و بقي مليونير دلوقتي .. يابا باقولك كان راكب لامبورجيني في الساحل السنة اللي فاتت .. إبن ال^$@ دخل في موتوسيكل الواد إبن عمك السنة اللي فاتت دغدغ الموتوسيكل و كسر عموده الفقري .. و إتشل خلاص إبن عمك و مابقاش ينفع هع هع هع .. … يا عم سيبناه إيه ؟! .. داحنا طلعنا عليه و كنا حندغدغ له العربية اللامبورجيني اللي كان راكبها .. بس كان معاه بلطجية بتوعه .. كله بالفلوس يابا .. بيجيبوا الفلوس دي كلها منين ماتعرفش .. … … تصدق فكرتني .. أهه الواد المغني المطرب اللي كسر عمود إبن عمك الفقري ده عامل فيلم في السينيما أهه .. أيوة يابني صدقني .. طالعه معاه الرقاصة اللي منتشر ليها فيديوهات بقالها كام شهر .. بيقولوا الفيلم جامد ف@$^ .. تعالي نفك و نروق بقي .. و ماتقلقش .. أنا عازمك .. تذكرة سيما إيه اللي تقلق بيها ؟ .. يا عم الفلوس إتعملت عشان تنزهك .. ملعون الجنيه اللي ماينزهش صاحبه .. تعالي نفرقع الميتين جنيه دي .. و ندخل الفيلم ده .. بتاع المغني المطرب ده .. بص .. الفيلم عليه زحمة إزاي .. شايف العيال اللي داخله الفيلم اللي عندها 14 سنة هناك دي .. بذمتك مش بيفكروك بالواد اللي قاتل ده .. كان شبههم كده من 7 سنين هو كمان .. بس لا لا .. العيال دي مش حتعمل كده .. خد ياض إنت و هو ياض .. إتعلم ياض الرجولة إنت و هو ياض .. إتعلم إنك تعور و تعلم عالبت .. بس ماتقتلش .. ماتخليش حد يمسك عليك حاجة .. … … روق بقي .