أحد الهوايات اللي بقالي فترة طويلة بامارسها بشكل شبه يومي
و إن شاء الله قريباً جداً حارجع للعالم ده ( عالم الهاردوير ) بعد ما كنت سايبه بقالي أكتر من 10 سنين دلوقتي ... و أعمل ورشة صغننة كده لهواياتي ..
أحد الهوايات اللي بقالي فترة طويلة بامارسها بشكل شبه يومي .. هي فيديوهات الميكانيكا و الحدادة و ورش الخشب و النجارة و ما شابه .. علي يوتيوب و إنستاجرام و تيك توك .. يعني طبيعي إن يكون 30% من المحتوي اللي باشوفه يومياً عبارة عن شغل ( نجارة و حدادة و ميكانيكا و خراطة و … ) . و إن شاء الله قريباً جداً حارجع للعالم ده ( عالم الهاردوير ) بعد ما كنت سايبه بقالي أكتر من 10 سنين دلوقتي … و أعمل ورشة صغننة كده لهواياتي .. … أحد الحاجات اللي باحب أتفرج عليها هي الشغل اللي بيتعمل بالمعادن و الحديد .. و إن عشان تعمل زاوية قايمة مثلاً من قضيب حديد سميك .. بتبدي بتسخين القضيب ده علي مدار مدة طويلة .. و ببطء ( لو سخنته بسرعة يبوظ ) . و بعدين بتبتدي تتنيه .. ببطء .. و علي حسب الجهاز اللي بتتني بيه .. أو لو حتستخدم مطرقة .. ضربة .. بعد ضربة .. براحة .. و هو سخن .. و بصبر .. و بتاخد وقت طويل … جداً .. لحد ما توصل للنتيجة اللي إنت عايزها .. بعد كده بتبدأ تبرده .. و تحطه فمياه … و بعدين زيت معين مثلاً ( لو حديد صلب ) .. و هكذا .. … عملية معالجة بتاخد وقت طويل .. جداً .. و صبر .. لحد ما توصل للنتيجة اللي إنت عايزها . … الكوميدي بعد ده بقي … هو إنك تلاقي شخص ماعندوش أى علم … بيحاول يرجع القضيب المعدني ده .. لشكله العادي .. و يخليه مستقيم تاني … فجأة . يحاول بكل ما أوتي من قوة إنه يتنيه … فجأة . … في الغالب اللي بيحصل هو : إن الشخص اللي ماعندوش علم ده … بيكسر القضيب .. أو القضيب هو اللي بيكسر دراعه . … لأن اللي إتعمل فوقت طويل جداً .. و بصبر .. و بخبرة .. و بعلم .. و بدراسة .. مستحيل يتعكس فلحظة .. و لو حاولت تعكسه فلحظة … يإما بتإذي القطعة المعدنية دي .. أو إنت اللي بتتإذي . … … الممتع هو إن ناس كتير جداً من اللي متضايقين بقي من إن قضبان معدنية كتير متنية دلوقتي .. و بيحاولوا يعدلوها .. غالبية وقتهم و طاقتهم بيقضوها في : تسخين أفران التني … المساعدة في الطرق علي القضبان المستقيمة .. تبريد القضبان اللي تم تنيها .. و لكن فجأة لما بيكتشفوا إنهم محتاجين قضيب معدني مستقيم ثابت … مش متني … بيتضايقوا و يكتشفوا إنهم بيقلوا … كتير . … … فوجهة نظري إن التصرف الطبيعي .. و الصح ( فوجهة نظري ) للإنسان اللي متضايق من القضبان المتنية .. هو : إننا ندرس و نفهم التركيب الجزيئي للقضبان المعدنية دي .. و لو إحنا متضايقين إنهم متنيين .. او بينتنوا كل شوية .. نشوف .. مين اللي بيتنيهم .. و إزاي .. و بعدين نبدأ نسأل نفسنا .. طيب .. إزاي ممكن يكون عندنا فرن تسخين ( إحم .. نتفليكس مثلاً لو كنت لسة ماخدتش بالك أقصد إيه ) .. و يكون عندنا ناس بتضرب بالمطارق بالبطيء .. و بصبر .. و إخلاص .. و تفاني .. ( إحم منتجين المحتوي اللي علي نيتفليكس مثلاً .. لو برضه لسة مش واخد بالك ) .. و ناس شغالين علي معالجة القضبان اللي بيتم الشغل عليها دي .. بهدوووووووء … و بدراسة … و بصبر … و من غير عنف و غضب و أذية … و هكذا .. … … … لكن المشهد الهزلي بتاع الناس اللي ماسكة قضبان كتير متنية .. و قاعدة بتكسر فيهم و تفرح .. أو تنكسر منهم و تزعل .. فده مشهد هزلي حزين … لأن القضبان بتخلص .. و بعد فترة مش حنلاقي حاجة تبني بيها أى حاجة . … … … و الله أعلم .