عقلي مافهمش إجابة السؤال ده بشكل مريح ليه .. غير

عقلي مافهمش إجابة السؤال ده بشكل مريح ليه .. غير لما درست برمجة و علوم كمبيوتر ( Computer Science ) بعد ما دخلت الكلية .. .. و سألني أحد أصدقائي ( اللي مدرسوش برمجة ) فمرة و إحنا ماشيين سؤال معين .. السؤال كان : ليه أحياناً بانزل برنامج من عالنت مساحته 100 ميجا مثلاً .. و لما أسطبه .. ألاقي مساحة التسطيبة بتاعته وصلت جيجا أو 2 جيجا ؟! .. لقيت نفسي عشان أشرح ليه شرح مبسط .. باجاوبه بمثال : 1- إفترض إن صديقنا التالت اللي ماشي جنبنا ده هو الكمبيوتر . 2- و إفترض إني أنا المبرمج . 3- لو قلت لصديقنا ده : ( إجري الكوبري اللي حيقابلنا ده 100 مرة رايح جاي ) . 4- الوقت اللي خدته فإني أقول له الأمر ده .. قد إيه ؟ 5- ببساطة أنا قلت الأمر ده ليه ف10 ثواني بالظبط … بمجهود قليل جداً . 6- هو بقي عشان ينفذ الأمر .. حياخد وقت و مجهود قد إيه ؟ 7- ببساطة أقل حاجة حياخد 5 ساعات تقريباً عشان ينفذه .. و حيتفحت مجهود . 8 - البرامج علي الكمبيوتر .. نفس الشيء .. السورس ( الأصل ) بتاع البرنامج اللي فيه مجموعة من الأوامر .. بتكون مساحته بسيطة .. و لكن المساحة و المجهود و الوقت اللي بياخدهم البرنامج عشان يشتغل ( التسطيبة ) .. بتكون ضخمة بالمقارنة أحيان كتير . … … لما بدأت أفكر في الموضوع بالطريقة دي .. بقيت شايف إن العلاقة بين الشيطان و الإنسان .. مشابهة جداً لعلاقة ال(هاكر ) بأى جهاز كمبيوتر هو عايز يخترقه . .. لو أنا عايز أخترق جهاز شخص ما .. نادراً ما إني حاروح ليه و أقول له إفتح لي أسرارك .. أو دمر جهازك بنفسك . أنا حتحايل عليه بحيث إنه يعمل حاجات معينة ( ماتبانش بالنسبة ليه إنها بتضره ) .. و لكنها بتخدم خطتي و إستراتيجيتي أنا .. بحيث إن عند لحظة معينة .. أكون إمتلكته .. و إمتلكت بياناته بالكامل ..أو أخليه جزء صغير من خطة أكبر أنا باخططها عشان أهاجم مؤسسة كبيرة مثلاً … أو أدمر جهازه ليه لو أنا عايز . … … و بعد ما باحقن جهاز الكمبيوتر اللي أنا عايز أخترقه ده ( أو إخترقته بالفعل ) .. ممكن جداً أقضي شهر أو إتنين أو عشرة بعيد عنه .. طالما صاحبه مهمل له .. و مش مهتم إنه يكشف عليه بشكل دوري و يشوف هل هو فأمان ولا لا .. و أرجع ليه بعد فترة طويلة .. ألاقيه بالظبط زي ما سبته .. جاهز إني أعمل بيه اللي أنا عايزه . … خلال الفترة الطويلة اللي أنا سايبه فيها دي .. أنا باكون خلاص برمجته .. فبالتالي .. أنا مش لازم أكون معاه و متابعه بشكل مستمر عشان يتصرف بشكل معين فظروف معينة .. يعني ممكن أكون برمجته إنه لما ييجي يشغل ملفات صوت معينة .. يشغلها ببرنامج معين ( زي الميديا بلاير كلاسيك مثلاً ) .. مش يشغلها ببرنامج ال( vlc ) . ممكن أكون برمجته إنه لما ييجي يدخل عالنت .. يفتح متصفح إنترنت إكسبلورر .. مش كروم . .. ممكن أكون برمجته إنه لما يفتح اليوتيوب .. دايماً تظهر قدامه قنوات رقص و قلع و مقالب و أى هري .. و إنه لما يبحث علي أى شيء مفيد ( تعليمي أو ما شابه ) .. تتفتح ليه إعلانات لمسلسلات هري جديدة .. أو تتفتح مكالمة ليه مع أحد أصحابه ( جهاز تاني أنا مخترقه ) .. و يقعدوا يهروا و يضيعوا وقت مع بعض … ... ببساطة .. أنا مش محتاج أكون معاه طول الوقت عشان أخليه يتصرف بشكل ( مدمر , غلط , “حرام” , … ) .. أنا برمجته خلاص بالفعل . … … و لكن .. و لكن لو لمدة شهر .. شهر واحد بس .. أنا إنقطعت علاقتي بالجهاز ده .. و بكل الأجهزة اللي إخترقتها .. شهر واحد بس .. إتقطع عني النت .. و إنفصلت عني الكهربا .. شهر واحد بس .. أنا إتاخد مني كل أدواتي ك ( هاكر محترف ) .. … إيه اللي حيحصل ؟ رهاني حيكون علي إيه ؟! … .. رهاني حيكون علي : 1- جودة برمجتي للأجهزة اللي إخترقتها خلال ال11 شهر اللي فاتوا .. 2- غباء و جهل و عند أصحاب الأجهزة دي .. و إنهم ماحدش منهم حيفكر ينضف أجهزته .. و مش حيسأل أو يتسائل .. هي أجهزتي بتتصرف بالشكل ده ليه ! . … … … إمتي بقي أحس بالخطر ؟ إمتي أحس إن شغلي اللي تعبت فيه 11 شهر كل سنة .. علي مدار سنين .. ممكن يتإذي ؟ .. لما يبدأ أى حد من الناس اللي أجهزتهم مخترقة دي .. يدور علي الملفات اللي تعبت فزرعها فأجهزته .. يفتح كل فولدر و كل فايل .. و يسأل .. هل الفايل ده نضيف ولا ؟ .. .. يسأل : ..

• الفكرة دي فدماغي ليه ( مين اللي قالي أغضب بالشكل ده ؟ )
• المسلسل ده أنا متابعه ليه ؟ .. الشخص ده أنا متعلق بيه ليه ؟
• العادة دي ” البرنامج اللي بيفتح من غير ما أفهم هو بيتفتح ليه ” .. أنا إمتي أصبحت متعود عليها و مش قادر أعيش من غيرها ؟ … … كل فكرة فدماغك .. كل إنطباع عندك … عبارة عن فايل .. عن برنامج .. لو مش إنت اللي متحكم فيه بالكامل .. تقدر تمسحه لما تحب .. و تقدر تغيره لو حبيت .. يبقي مش بتاعك .. مش تحت سيطرتك .. حد تاني حاطه عندك .. و لازم تتعامل معاه بحزم . … … … ****** الأنتي فايروس =antivirus ****** … … مافيش في الدنيا أنتي فايروس بيحميك من غبائك .. من جهلك .. من سوء تصرفك . لكن في أنتي فايروس بيساعدك إنك تنقذ ما يمكن إنقاذه .. و إنك تتقوي بيه ضد أى هاكر يحب يلعب ضدك . بس إنت اللي لازم تاخد الأكشن .. لازم دايماً تخلي بالك .. لازم تتعلم كويس عن أنواع الملفات ( الأفكار ) .. و كيفية إستخدامها .. … مافيش أنتي فايروس بيحمي جاهل .. أبداً .. .. و أى أنتي فايروس .. أى واحد منهم … لازم تديله صلاحيات كاملة … صلاحيات كاملة إنه يراقب كل حاجة بتعملها فجهازك .. و علي حسب مدي علمك و دراستك و خبرتك … علي حسب ما حتنفذ اللي بيقول لك عليه و إنت فاهم السبب و الكيفية .. أو حتنفذ و إنت مغمض و مش فاهم … بس لو فضلت مغمض و مش فاهم .. حييجي يوم و يتم إختراقك بشكل أفظع .. و حتبقي بتنفذ الغلط ( اللي الهاكر عايزه ) .. و إنت مفكر إنك بتنفذ اللي (الأنتي فايروس) بيقول لك عليه . … … … … أنا مش مفتي .. و ليس ليا القدرة أو الحق إني أفتيك .. و هناك كثير جداً ممن هم أعلم مني .. و لكني أقدر أقول لك أنا باعمل إيه .. روتيني الخاص .. خذ منه ما يفيدك .. و لكن : لازم .. لااااااااازم تبتدي بإنك تفكر .. و تتعلم .. اللي بينفع معايا .. مش بالضرورة ينفع معاك .. و العكس . … … 1- أنا بشكل دوري قدر الإمكان بامسك كل فايل فدماغي ( كل فكرة) .. و أسأل دي جات منين .. و إستخدامها إيه .. و تأثيرها إيه . كل شعور .. كل ذكري .. كل معلومة .. و اللحظة اللي ألاقي إن في فكرة خارجة عن إطار سيطرتي .. و ماقدرش ألاقي ليها لازمة أو معني أو منطق واضح .. بابدأ أطبق عليها الأنتي فايروس : و أشوف ..
• هل الفكرة دي ليها مرجعية في القرآن و السنة … لو آه .. بابدأ أتعلم عنها عشان أقدر أحمي نفسي من إساءة إستخدامها . و لو لا … بابدأ أحطها في الحجر - quarantine .. يعني أخلي بالي جداً من إنها تتعامل أو تتفاعل مع أى فكرة تانية فدماغي .. لحد ما أعرف وضعها من الإعراب إيه . .. 2- أنا قدر المستطاع باداوم علي قراءة القرآن . و باحاول إني أقراه بطريقتين : الأولي : قراءة التمرين = إني أقراه كتير حتي لو مش فاهم دايماً كل حاجة باقراها .. و لكني مؤمن إني بادرب عقلي و كياني علي إنه يعتاد القراءة و المعني … و كتير بتيجي لحظات باشوفها في الحياة .. بالاقي ليهاا معني فآيات كنت قريتها من زمن بدون ما أدرك معناها لحظة قرائتها .. و لكن أدركتها لما حصل موقف معين مثلاً بعدها . .. الثانية : قراءة التعلم و التدبر= و دي إني أدرسه و أفهمه و أزود علمي فيه .. و طبعاً واضح السبب . … 3- إني أخلي بالي الكهربا بتاعتي باصرفها فإيه : .. ببساطة الكون ده كله عبارة عن طاقة .. و الطاقة بتؤدي للزمن . أى فعل إنت محتاج تقوم بيه .. إنت محتاج طاقة .. و زمن . و علي مدار حياتك .. طاقتك و عمرك .. محدودين . .. إما إنك تصرفهم فحاجات إنت محددها و فاهمها و تقدر تكون مسئول عنها .. أو إنك بتمشي تدفع وقتك و مجهودك لأى فيديو تشوفه عالفيس أو أى مسلسل شغال عالتيليفزيون . … … لو قدرت إني أتحكم فكل جزء من طاقتي و وقتي .. و أصرفهم في اللي أنا واعي بيه و محدده .. حتي لما بيتم إختراقي ( بيحصل كتير زي ككل البشر طبعاً ) .. باكون مجوع البرامج الوحشة دي .. و باحرمها قدر المستطاع من أى طاقة عندي .. .. بانزل أفحت نفسي جري .. عشان أكون أقل غضب باصوم .. عشان أكون أقل شهوة . باشتغل كتير وأدرس كتير و أتعب كتير .. و أصرف وقت و مجهود فقيام ليل و صلاة و قراءة قراآن … لحد ما أكون باحلم باللحظة اللي أفرد ضهري فيها علي سرير . … … … و أحياناً زي ما إنت شايف كده .. باكتب كتير .. لحد ما تنتهي طاقتي علي الكتابة 😁 و الله أعلم .