عدد نادر جداً من الكتب اللي لما قرأتها .. بكيت

عدد نادر جداً من الكتب اللي لما قرأتها .. بكيت بكاء حقيقي كامل .. و منهم الكتاب ده .. ( ألواح و دسر ) …

البكاء و الدموع أنواع .. كتير .. في دموع حزن .. دموع فرح .. دموع ألم .. دموع خوف .. دموع حب … دموع أنواعها و ألوانها بعدد أنواع و ألوان مشاعرنا المختلفة .. … حاجات نادرة جداً فحياتي هي اللي إستفذت فيا كل المشاعر دي .. بقوة جداً .. لدرجة البكاء .. … أعتقد إن أكتر تشبيه واضح فدماغي حالياً لرواية ( ألواح و دسر ) .. هو بالظبط إحساسك لو إنت نظرك ضعيف جداً .. و كل شىء قدامك مزغلل … و بعدين تلبس نضارة لأول مرة .. … بتشوف كل شىء في قمة الوضوح .. بشكل يصعب معه إنك تتجاهل التفاصيل اللي ماكنتش بتشوفها و الدنيا مزغللة قدامك . … بتحاول تجرب النضارة عشان تشوف كل شىء محيط بيك قبل كده .. و كان دايماً قدامك .. بس بتحس إنك بتشوفه للمرة الأولي .. بتفهمه للمرة الأولي . … للأسف الإحساس ده مابيدومش طويلاً .. خصوصاً في عالمنا الحالي المليان حاجات بتشغل و بترهق نظرك طول الوقت .. فسرعان ما بتنسي الوضوح ده .. و بيرجع العالم مزغلل مرة تانية . … … أنا إتعلمت الحقيقة دي زمان أوي .. إن العالم بتاعنا مليان دايماً حاجات بتزغلل عينك .. و تخليك ماتشوفش الحقيقة تفاصيلها فين أو إزاي .. و إن الزغللة دي مابتحصلش فجأة .. و لكن بالتدريج .. البطئ جداً .. بالظبط زي أى حد نظره ضعف بالتدريج .. مابيلاحظش ده إلا بعد فترة طويلة .. … و إن كل فترة الإنسان بيحتاج يكشف علي نظره .. علي رؤيته علي الأمور .. يشوف هل هو ما زال قادر يميز الحقيقة بتفاصيلها .. قادر يميز بين الخبيث و الطيب .. ولا الدنيا مزغللة .. … و مع ذلك .. كل فترة .. الأضواء و الحاجات اللى عينيك بتشوفها .. بتضعف نظرك تاني .. بالتدريج .. و بتبدأ تزغلل تاني .. و إما إنك تفتكر إنك لازم تجدد نضارتك .. و تتأكد إنك لسة شايف الحقيقة بتفاصيلها .. أو تفضل عايش في وهم .. إنك يوماً ما كان نظرك قوي .. و إنك مش محتاج تجدد ” نضارتك ” .. و إنك ما زلت عارف الحقيقة تفاصيلها إيه .. بس مريح عينيك من ” تقل ” النضارة شوية . … … رواية ( ألواح و دسر ) .. نضارة .. قوية جداً .. بتوريك العالم فجأة بتفاصيله في قمة الوضوح .. و الإختيار بيكون عندك .. تستغل الوضوح ده فإنك :

• تدور علي نضارات تانية قبل ما الدنيا تزغلل تاني ؟
• تهرب من العالم اللي بيسبب لك زغللة و تقرر تغمض عينيك من الخوف ؟
• تحاول تنقل الوضوح ده لغيرك إما بإنك تسلفه نضارتك .. أو توضح ليه إن العالم مزغلل قدامه .. مش واضح إطلاقاً ؟
• و لا تقرر تدرس النضارات بتتعمل إزاي و تحاول تفتح مصنع نضارات بنفسك .. نضارات أكثر سهولة فلبسها .. و أسهل إن الناس تلاقيها ؟ ..
• ولا تقلع النضارة و تقرر تعيش في الزغللة لأنها أسهل بكتير من وضوح الحقيقة ؟ … … … الرواية دي .. هي و رواية ( شيفرة بلال ) .. كل واحدة منهم نسختها الأصلية ( من عصير الكتب) ب 80 جنيه مصري .. لو حانصحك تستثمر 160 جنيه بأي شكل يعود عليك بعائد ضخم .. صدقني أفضل إستثمار حيكون هو شرائك للروايتين دول .. و شخصياً الروايتين دول حيكونوا دراسة أساسية و إجبارية في المنهج اللى باكونه لأولادي من زمااااان .. إن شاء الله .. … أحمد خيري العمري .. شكراً 😍 و شكراً جزيلاً لكل اللي رشح ليا الرواية دي بلا إستثناء .. و كان أولهم Mohamed Elsherbiny