عن التسويق ... و السواقة

- يا برنس / برنسيسة .. لو عندك حرية و تحكم كامل في متغيرات حياتك ( وقتك و فلوسك يعني ) .. إيه اللي حابب تبقي بتعمله كمان سنة و شاطر فيه ؟ .

AR 8 د

عن التسويق … و السواقة . ---------------------------------------
برنس ما ( أو أحياناً كتير برنسيسة ) لسة في مقتبل شبابه و ريعان طاقته و عنفوانه .. بيحدد معايا ميعاد يقابلني فيه في المكتب .. و يدردش معايا عشان شغلانة ما هو إما بيقدم عليها معايا … أو نفسه يبقي شاطر فيها بعد كام سنة مثلاً .. … و أسأله أحد أسألتي المفضة :

أنا عمري ما كنت مهتم بمجال العربيات … و لا كنت أعرف الفرق بين المرسيس و اللادا 2107 .. لحد ما قررت أشتري عربية .. .. فاكر إني أول ما فكرت إني أقتني عربية .. بدأت أتعامل مع الموضوع بنفس الطريقة اللي باتعامل بيها مع غالبية أمور حياتي .. فتحت اليوتيوب .. و بدأت أدرس الفرق بين تكوين المحرك المانيوال .. و المحرك الأوتوماتيك .. وبعدين قضيت شوية وقت محترمين بعدهم أدرس أنواع ال ( transmission - الفتايس ) المختلفة .. و بعدين قضيت وقت كتير أدرس ميكانيكا إصطدام العربيات الصاج .. و إختلافها عن إصطدام العربيات الفيبر . و بعدين قضيت شوية وقت أكتر أدرس عن معدلات الإحتراق المختلفة للمواتير المختلفة .. و إقتصاديات البنزين المختلفة .. و التأثير الإقتصادي التراكمي لتفويل بنزين 92 مثلاً في محرك عربية مستعملة مع وضع الصيانات في الإعتبار .. مقارنة بتفويل 95 لعربية زيرو مع وضع الصيانات في الإعتبار . و درست عن كل تفصيلة صغيرة و كبيرة أقدر أوصل لها عن العربيات و عالم المحركات عموماً .. … و شفت معظم الفيديوهات اللي عملها اليوتيوبرز المشهورين ( و المغمورين كمان ) عن العربيات في خلال آخر سنتين تقريباً .. أوتوفندي , أحمد عمار , تامر بشير , محمود خيري , … و غيرهم .. … و حطيت أحد أصدقائي المتخصصين جداً في المجال ده علي ال (سبيد ديال ) .. و كنت باكلمه 9 مرات يومياً علي الأقل أسأله عن كل عربية تتعرض عليا .. و كل معلومة جديدة أعرفها .. و الحمد لله إنه ماعمليش بلوك . … … و بعدين .. قررت إن الوقت جه خلاص .. أنا دلوقتي جاهز … أنا عايز أسوق … … و رحت لأبويا و أبهرته بكم المعلومات اللي عندي دلوقتي عن العربيات .. و إني أصبح لا يشق ليا غبار جوة كبوت أى عربية … إمتلأ ثقة بيا ربنا يبارك له .. و إتفقنا أجرب علي عربيته إني أسوق شوية بقي عشان أتدرب قبل ما أروح أشتري .. و بمجرد ما قعدت علي الدريكسيون بتاع عربية والدي عشان أبدأ أسوق .. .. لقاني باصص له و أنا علي وشي شوية تساؤلات بريئة جداً .. 1- هو فين دواسة البنزين في التلات دواسات دول ؟! 2- أدور العربية الأول ولا أنزل فرامل اليد .. ولا أعمل إيه بالظبط ؟ 3- بمجرد ما العربية دارت و بدأت تتحرك أخيراً ( و بطلت تنط أو تبطل مني ) .. رحت ضاغط علي الفرامل بكل طاقتي و أنا ماسك في الدركسيون كإنه طوق نجاة و عيني متثبتة علي القزاز .. و أبويا بيسألني ( خير يابني ؟ ) .. رديت عليه إن في عربية جاية في المقابل في آخر الطريق ( الأربع حارات ) .. و إني مستني لحد ما تعدي :D :D : D .

طبعاً النقطة اللي عايز أشرحها من أول البوست أكيد دلوقتي أصبحت واضحة و مفهومة .. .. إني بالرغم من كل الدراسة النظرية عن ال ( سواقة , العربيات ) .. اللي قضيت فيها وقت و موارد محترمين … ( + إني أساساً مهندس كمان ) .. أى سواق تاكسي عنده 16 سنة و كان بيسوق من و هو عنده 12 سنة مثلاً .. كان عنده القدرة إنه يعلم عليا بصباع إيده الصغنن بكل سهولة .

و هنا بتيجي الخناقة المشهورة :

يعني : بمجرد ما إنت بتتخرج من أياً كان الكلية اللي إنت فيها أو أياً كانت دراستك .. بيبقي قدامك إختيارين أساسيين لازم تكون واضح مع نفسك فيهم : … 1- إنت عندك حد يسوق بيك العربية اللي إنت فيها ؟ … 2- ولا إنت اللي المفروض دلوقتي تقعد و تسوق شوية ؟! ماينفعش ماتسألش نفسك السؤال ده .. لأن بناءاً عليه .. حتعرف إنت عندك وقت و رفاهية قد إيه إنك تذاكر عن السواقة .. من غير ما تسوق فعلاً .. … يعني بصيغة أخري : … 1- إنت بابا و ماما بيصرفوا عليك و ماعندكش مشكلة في الفلوس ؟ . أو 2- إنت بابا و ماما مستنيين منك بقي إنك تبقي معتمد علي نفسك .. و عايز فلوس ؟ … ... .... التسويق .. و مجالات تانية كتير زيه .. بالظبط زي السواقة .. ده مش مجال إنت محتاج ( رخصة - license ) .. عشان تزاوله .. و رجاااااااء .. إفصل فدماغك بين إنك تبدأ تتعلم حاجة و تمارسها ك ( متعلم ) .. أو إنك يبقي معاك ( رخصة - license ) فيها و تمارسها كمحترف . .. الطريقة الوحيدة إنك تتعلم سواقة .. إنك تقعد علي دركسيون عربية .. و تسوق . الطريقة الوحيدة إنك تتعلم سباحة .. إنك تنزل في مية مالكش فيها طول .. و تسبح . الطريقة الوحيدة اللي أعرفها عشان تفهم فعلاً يعني إيه تسويق … إنك توصل إنك ( تبيع ) منتج ما .. .. إنك تكمل الدايرة بتاعت التسويق .. لوحدك .. .. 1- تحدد الفئة المستهدفة . 2- تدرس إحتياجاتها . 3- تختار أو تبني منتج يسد إحتياجات الفئة دي . 4- تقدم المنتج بنفسك و تعمل له ( براندنج ) بنفسك . 5- ترد علي أسئلة و ملاحظات الزبون . 6- تبيع المنتج للزبون و تقبض تمنه . 7 - تستني لحد ما الزبون يستخدم منتجك شوية .. و تشوف عاجبه .. ولا مش فارق معاه .. ولا بيشتمك و يحسبن عليك . 8 - ت( scale ) العملية بتاعتك و تحول المبيعة دي ل10 مبيعات . 9- تجيب فريق يشغل الدورة دي أوتوماتيك .. و تبقي متأكد إنها بتشتغل حتي و إنت نايم . 10- تدرس السوق و تتأكد من وضعك وسط منافسيك . … … ال10 نقط دول … لو ماعملتهمش بالكامل لواحدك .. علي أصغر حجم علي الأقل حتي .. و وصلت إنك تبيع منتج واحد علي الأقل ( ولو ب نص جنيه ) .. نادراً ما حتبقي قادر تعرف فعلاً الشغل في المجال ده حقيقته أو تفاصيله إيه . … و حتفضل ( تايه في التفاصيل ) .. تفاصيل كتييييييييييييييييييييييييير جداً .. عن حاجات كتير إنت مش حتقدر تحدد أهميتها أو قيمتها الحقيقية في النتيجة الأخيرة . .. زي إنك تبقي قاعد تكلمني عن جمال تصميماتك و روعة ال( copy writing ) بتاعك .. بس لما أسألك طب ليه مافيش ( conversion ) ماتعرفش ترد عليا . .. أو تفضل تكلمني عن جمال الداتا اللي إنت مطلعها من ال ( funnels ) بتاعتك .. بس لما أسألك .. طيب عملت إيه بالداتا دي .. أو فين ال ( insights ) بناءاً عليها … ترد عليا بإن دي شغلة حد تاني .. مش شغلتك إنت !! . … … … و دي مشكلة ضخمة .. إنك دايماً حتبقي شايف شغلك و بس أو التفصيلة الصغيرة بتاعتك و بس .. و مش قادر تعرف شغلك بيركب إزاي في الصورة الكبيرة .. و النتيجة هي إنك حتستهلك مني مجهود كبير جداً .. عشان أخليك تفضي جزء فدماغك يستوعب أهمية و تفاصيل شغل باقي الناس حواليك .. و بعدين أقعد مستني منك إنك تغلط و تتعلم .. أثناء السواقة علي الدائري !! .. … … … عايز تتعلم أو تشتغل في التسويق : أوصل إنك تبيع منتج . … عايز تتعلم أو تشتغل في التصميم : أوصل إنك تبيع تصميم . … عايز تتعلم أو تشتغل في أى حاجة ( غير الطب أو الهندسة المدني مثلاً .. أو أى حاجة متعلقة بحياة البشر ) .. أوصل إنك تقفل الدايرة لحد ما تعرف حتحول الحاجة دي لفلوس إزاي .. … … … العالم و التعليم من سنة 1700 تقريباً .. لحد سنة 2000 فضل يزرع فدماغ البشر .. إزاي تبقي ترس فمكنة جوة مصنع .. و ماكنش بيدربك علي إدارة المصنع .. أو إنك تنتج حاجة لواحدك . لأن الإحتياج كان للبشر إنهم يبقوا تروس .. عشان المصانع تنتج كتير .. … دلوقتي .. التروس بتدور أوتوماتيك أرخص .. و النت أتاح للجميع أخيراً مرة تانية فرصة إنك تبقي بتنتج شيء ما لواحدك .. بالكامل … … بطل تدرس عشان تكون ( ترس ) رجاء .. لأن لسة التعليم العالمي و العالم مابذلش مجهود كفاية عشان يرجع يعلمك بنفسه إزاي تكون ( منتج لوحدك ) .. … ماتستناش .. و إتعلم تركز لوحدك علي : الإنتاجية … .. و الله أعلم.