المبدأ التاني : ( و لسة بتحبه يا قلبي ؟

المبدأ التاني : ( و لسة بتحبه يا قلبي ؟ .. يا قلبي &%#$) . أو فى رواية أخري : kill your darlings . “إقرا كل ده بقي لو تقدر ”

كتير من أصدقائي أو المقربون ليا .. بيطلقوا على اللى حاقوله دلوقتى ( براجماتية ) زيادة عن اللزوم . و لكني أعتقد إن اللى حاقوله دلوقتى ده .. من أعلي مراحل الرومانسية .. خلينى أوضح : … أفتكر أكتر من قصة على مدار التلاتين سنة اللى عشتهم عالكوكب ده .. لأصدقاء الطفولة و المراهقة و الشباب . كلهم بيدوروا حوالين نفس المحور ( حب ولا طالشي ) .. و كنت باشوف كيفية تعاملهم مع التجربة دى .. من إنهيار كامل .. لمراحل إكتئاب .. لرغبة فى الإنتحار .. لرغبة فى الإنتقام .. لأغاني عربي حزايني .. … و كل مرة كنت باتناقش معاهم فده .. كنت باستغرب جداً من إنهم شايفين إن اللى حصل .. حصل بدون تدخل منهم إطلاقاًاًاً .. و تلاقى الواحد منهم بيتكلم معاك بحرقة .. و كلام يتغلغله الكثير من التنهيدات و الهيييييح .. ما معناه ” مش بإيدي يا إسلام .. حبها مش بإيدي ” .. … و كنت أشد فشعري أنا و أناقشه إن : أيون .. يعنى فرضاً إن علاقتكوا دي إستمرت ما يكفي .. و توغلت بما يكفي إن ينفع جدلاً إننا نطلق عليها ” حب ” .. كل التوغل و التوطد ده كان بدون تخطيط ؟ .. بدون رؤية لأحنا رايحين فين و جايين فين ؟ … بدون خطة خمسية و عشرية و خمسينية ؟ .. … يعنى إنت بذمة أهلك بتحبها و إنت فأولي كلية .. و عارف إنك مش حتشتغل إلا بعد 5 سنين دراسة علي الأقل .. و بعدها سنة ولا تلاتة جيش .. و مستني منها تقول لأهلها إيه ؟ … أنا ماعنديش مشكلة ترتبط و تندمج و تتجوز و إنت فتالتة ثانوي والله العظيم .. لو إنت مش رابط مستقبلك و مستقبلها و حياتكم بنظام إنت أساساً مش متحكم فيه .. لكن لما تبقي فكلية مصرية .. و ماعندكش شغل غير الكلية .. و أهاليكم بيصرفوا عليكوا بالعافية .. بتكمل فعلاقة مع بنت لمرحلة ما بعد السلامو عليكم و عليكم السلام ليييييييه ؟!!! … الموضوع ماكانش بس العلاقات العاطشفية ..

• بتشرب سجاير ليه يا حبيبي و إنت عارف إنها مضرة ؟ … بحبها يا لمبي
• بتسمع مهرجانات ليه يا حبيبى و إنت عارف إنها بتحولك لحمار ؟ … بحبها يا لمبي
• بتمشي مع الصحبة الزبالة دي ليه يا حبيبي و إنت عارف إنهم حيودوك فداهية ؟ … بحبهم يا لمبي
• بتاكل فسيخ و إنت معدتك مابتستحملش الخيار المقشر ليه يا حبيبي ؟ … بحبه يا لمبي
• بتهبب الهباب اللى بتهببه ليه يا حبيبي ؟ … بحبه يا لمبي . … أعتقد أمي ربنا يبارك فيها هى أول واحدة زرعت فينا الجزء ده .. الجزء اللى بيفكر قبل ما ياخد أي قرار .. كانت دايماً لما نجري علي شوكولاتة كتير مثلاً .. تقول لنا .. “ماتطاوعش لسانك ” .. و كان على أكلة لذيذة مثلاً .. بعد ما تراقب إننا أكلنا وجبتنا .. تقول لنا ” ماتطاوعش رغبتك فى الطعم و البلع ” .. و بعدين كانت تشرحلنا .. إن أى قرار بناخده فحياتنا .. بناخده :
• إما ببطننا .. ” جسمنا بعد ما كبرنا شوية ” ..
• أو بقلبنا .
• أو بعقلنا . .. و إني المفروض دايماً أسأل نفسي قبل أى قرار مهما كان صغير … مين اللى قرر القرار ده .. جسمي ؟ .. ولا قلبي ؟ .. ولا عقلي ؟ .. … الحقيقة هى إنى كل ما كبرت .. كنت بالاقي حكمة ضخمة فده .. و قد إيه الثقافة الجمعية و الإعلامية و الأدبية على مدار عصور كتير .. كانت ببساطة .. بتتاجر بذوق البشر . .. يعني إيه ؟ .. جرب تدخل أى سوبر ماركت .. شوف المنتجات اللى على الرفوف .. و أسأل نفسك .. المنتج ده بيرضي مين أكتر ..
• لساني ؟
• جسمي ؟
• قلبي ؟
• عقلي ؟ .. ماعتقدش إنك حتلاقي ماركات مختلفة من الجرجير .. أو الفجل .. أو أى خضرة عموماً .. أو ماركات خضار طازة مختلفة .. او فاكهة .. و لكنك حتلاقي مئات ماركات الشوكولاتة .. و الحلويات و السكريات .. و العصائر .. و الشيبسيات .. و … حتلاقي مئات بل آلاف الماركات اللى بتستهدف ( لسانك , جسمك , قلبك ) .. لأن كل واحد من دول سهل يدمن .. و ماعندوش .. عقل .. يفكر بيه .. هل ده صح ولا مفيد ولا لا .. … الأفلام و المسلسلات و الروايات و … نفس الشىء .. آلاف التيمات و الأفكار عن :
• طاوع قلبك
• الحب من أول نظرة
• الحب المستحيل
• العشق الممنوع
• … كلها بتؤدي إنك تظن إن ” هواك ” … و ” مشاعرك ” .. دول قوي خارقة .. أقوي منك و من الدنيا كلها … و إنك … غير .. قادر .. على التحكم فيهم .. … في حين إنك قاااااااااااادر جداً .. علي التحكم فيهم .. و تطويعهم لعقلك إنت .. فقط إن أدركت ده .. و إن بدأت تدرب نفسك على ده . … … فى مصطلح فى علم التصميم رائع إسمه : kill your darlings معناه : إقتل العزيز عليك .. يعنى إيه : .. يعنى أى حد بيشتغل فى تصميم أى شىء .. بيبدأ بوضع فكرة .. و يكبرها لحد ما توصل لتصميم كروكي مليان أفكار صغيرة .. كلهم طلعوا من عقله .. كلهم حلوين .. كلهم بذل فيهم مجهود . بس أحياناً كتير .. لازم عشان التصميم يتعدل .. يتحسن .. يبقى أفضل .. إنه يغير فأفكاره دى .. يعدلها .. أو يمسحها بالكامل .. أفكاره العزيزة عليه جداً .. لازم يمسحها بالكامل .. عشان يقدر يطلع أفكار أحسن و أعلي .. و أى مصمم مابيعرفش يقتل العزيز عليه … بيفضل دايماً مصمم ضعيف .. مش قادر يوصل لأفضل ما يمكن إنه يكون عليه . … … إلقي نظرة على السوشيال ميديا حواليك .. و على حياتك .. وإسأل نفسك .. الحاجات اللى فحياتك و مضايقاك .. أو مش مضايقاك بس عارف إنك مخبيها فقلبك عن عقلك .. أسأل نفسك .. عقلك راضي ؟ و مين اللى متحكم فيك .. إنت .. ولا “هواك ” .. … و الله أعلم .