إحم إحم .. بوست كل سنة بتاع أول رمضان :

إحم إحم .. بوست كل سنة بتاع أول رمضان : 4 نقط بالعدد … … 1- لو شايف كل اللي حواليك من إصحابك و قرايبك و جيرانك و الناس اللي ماشيين في الشارع قاعدين يتكلموا علي المسلسلات و الإعلانات .. فتحس إنك محتاج تشوف المسلسلات و الإعلانات إنت كمان عشان ماتحسش إنك لوحدك .. و ماتحسش إنك الدنيا بتفوتك .. صدقني .. دي خدعة عقلك و مشاعرك بيلعبوها عليك .. إحساس الوحدة اللي حتحس بيها دي .. مش وحدة وحشة .. لا .. دي وحدة حلوة .. لما تبطل تهرب منها و تقرر تستمتع بيها .. حتلاقي اللي حواليك ( من إصحابك و قرايبك و جيرانك و الناس اللي ماشيين في الشارع ) هما اللي بيقربوا منك و بيتلموا حواليك .. لأنك حتتعلم إنك تختار اللي تستمتع بيه بنفسك .. و حتبطل تعتمد علي اللي حواليك عشان تكوّن ذوقك و إختياراتك . فحيبدأ الناس حواليك تدريجياً في النظر إليك كإنك بتعمل حاجة إعجازية و مش سهلة .. و هي إنك بتفكر بشكل مستقل .. و حيبدأوا تدريجياً هما اللي يحاولوا يقلدوك .. بس الموضوع حياخد فترة طويلة .. و لازم تستحمل . … … 2- أما لو إنت من النوعية اللي كنت مستني رمضان عشان تستمتع بالإنتاج الفني الضخم الخرافي الخزعبلي الأسطوري بتاع التيليفزيون المصري و العربي من المسلسلات و البرامج و الإعلانات .. فصدقني برضو .. إنت مش عارف إنت مش عارف إيه .. يعني : إنت مضيع علي نفسك فرصة ضخمة إنك تكتشف إن ( الإنتاج الفني الضخم الخرافي الخزعبلي الأسطوري بتاع التيليفزيون المصري و العربي من المسلسلات و البرامج و الإعلانات ) .. مجرد شوية فلوس فكة .. مقارنة بإنتاج حقيقي أقوي و أكبر بمراحل .. بس لغته مش عربي أو مصري . و إنك ممكن لو إديت لنفسك فرصة صغيرة حتي .. فإنك تتفرج علي إنتاج لغته مختلفة ( مسلسلات و برامج أجنبي يعني ) .. بس مش مترجمين عربي .. لا .. يكونوا مترجمين إنجليزي .. إنك خلال رمضان بس .. ممكن تطلع اللغة الأجنبي بتاعتك أقوي بمراحل .. و ثقافتك فعلاً حتكون أقوي هي كمان . و صدقني .. حتلاقي إنك مش محتاج تعرف كل الإيفيهات المتكررة و الرخيصة اللي حتلاقيها مالية الفيس قدامك . … … 3- أما لو إنت بقي من النوعية اللي خلاص مش فارق معاك موضوع إنك تحس إنك فاهم الناس بتتكلم و بتهري فإيه علي الفيس . .. و من النوعية اللي ماتفرجش علي مسلسلات عربي و مصري خلال آخر عشر سنين علي الأقل . .. و من النوعية اللي متابع كل المسلسلات و البرامج الأجنبي علي نيتفليكس و يوتيوب و أمثالهم . .. و من النوعية اللي ليها ذوق خاص جداً في الموسيقي و الأفلام و المسلسلات اللي بيتابعها . .. أنصحك تجرب الشهر ده بالذات إنك تلعب يوجا .. و تعمل حاجة إسمها : palate cleansing = تنضيف شهية بس لعقلك و لدماغك و لنفسك . يعني جرب تقضي الشهر بإنك تقلل جداً جداً .. مش لازم حتي توقف بالكامل كل المسلسلات و البرامج اللي بتتفرج عليها .. و تقضي وقت أطول قاعد و باصص في الفراغ .. في اللا شيء .. و تراقب حركة السحاب .. و حركة ذرات الغبار في الهوا .. و حركة الحيوانات و الحشرات حواليك .. و تركز مع حركة تنفسك ( شهيق و زفير ) .. و تحاول تطول مدتهم تدريجياً .. و هكذا .. … صدقني .. حتلاقي نفسك بعد الشهر ده كل قدراتك العقلية و الجسدية أعلي بشكل ملحوظ .. و هدوئك و تحكمك فأعصابك و مشاعرك حيفاجئك شخصياً . … … 4- و أخيراً و ليس آخراً .. لو إنت من النوعية اللي قدر يحقق رقم 3 .. و بقيت من الناس اللي بيشع هدوء و راحة نفسية حوالين نفسهم دول … أنصحك تجرب تدور علي الروابط و العلاقات بين كل ما هو في علوم اليوجا و التأمل .. و بين الإسلام و الآيات القرآنية و الأحاديث .. .. و بعدين تدور علي حد من اللي مش بيضايقوا لما تتكلم معاهم .. و تقول لهم بكل هدوء .. ” عندي ليكم أربع نصايح فوجهة نظري ” . و ترجع تقرا لهم البوست من الأول 😅 . … … و الله أعلم .