شوية أفكار قبل قهوة الفجر

شوية أفكار قبل قهوة الفجر … 1- من أشهر الجمل اللى أى “إنطربرونور- مش زى حالاتى ” عارفها هى : دور على مشكلة عند ناس كتير .. حلها .. و بعد كده فكر إزاى تجيب منها فلوس .. مش العكس .. و هو إنك تفكر إزاى تجيب فلوس الأول .

2- السؤال دلوقتى بقى .. فلوس قد إيه و عشان إيه ؟ لا و السؤال الأهم .. تعالى نفترض إنى أخدت إنسان عادى كده .. و وديته فمكان مايقلقش فيه بأى حاجة من اللى إحنا قلقانين بيها هنا فمصر .. يعنى ظبطته و أمنته و جوزته و أكلته و … و بعد ما شربته الكابتشينو بالنوتيلا بتاعه .. يلا بينا نبدع بقى يا حاج ..

تتوقع ممكن يطلع بأفكار إيه ؟

3- ستيف جوبز ليه جملة مشهورة و هى .. خليك دايماً جعان .. الجعان ده يا إما مأكلش كويس أو شهيته مفتوحة أوى .. دايماً

4- زمان فى إقتصاد ثانوى عام … كان فى مبدأ مشهور .. حاجات الإنسان متجددة و متغيرة .. و الحاجة أم الإختراع ..

من 1-2-3-4 … لو فضلت مشكلة الإنسان اللى عنده القدرة على الإدراك هى تحسين مستوى إشباع حاجاته اللى هو مدركها الآن .. عمره ما حيركز على إنه يحس بحاجات جديدة هو محتاج يشبعها .. و ده إيجابى و سلبى فنفس الوقت .. إيجابى لو بتعالج واقع إنت مش قادر تغيره .. يعنى شخصياً أيام ما كنت فى الجيش .. كنت باتعمد أجوع نفسى .. عشان فرح الأكل يغطى نسبياً على هموم الجيش بما فيها ..

و سلبى .. لو ماكانش فيه خطة و هدف أخير يتم السعى ليه .. و فى الطريق ليه .. نكتشف حاجات جديدة نقدر نشبعها ..

.دلوقتى أقوم أعمل القهوة