عشرة جنيه ... غاليين أوي إن شاء الله

عشرة جنيه … غاليين أوي إن شاء الله . … إمبارح كنا راجعين أنا و زوجتى فعز الحر و الشمس .. و ركبنا تاكسي كان فيه سيدة كبيرة قاعدة قدام نازلة قبلنا . ماكانش معايا فكة فسألت السواق يفك 200 .. رد إنه لسة طالع و ماعهوش .. السيدة قعدت تدور فشنطتها .. و فجأة قبل ما تنزل .. راحت مطلعة 10 جنيه و إداتهم للسواق و قالت لنا ” أختك فى الله .. رمضان كريم” . … نزلت أوضح إنى ممكن أدور على فكة بسهولة .. و إنى مش محتاج .. و حاولت جداً .. و لا أى شىء .. رفضت حتى تقول إسمها . … السواق ببساطة قال ” خلاص يا باشا .. خدهم و إبقى طلعهم إنت لله ” . … قد يكون مبلغ تافه .. قد يكون موقف بسيط .. قد يكون فى مواقف تانية كتير أشد تأثيراً من حاجة زى كده … لكن البساطة اللى هى إتعاملت بيها و إبتسامتها السهلة فعلاً كانوا زي نسمة هوا رطبة فحر إمبارح . … للسيدة دى .. و ربنا أعلم بيها إن شاء الله .. جزء من نيتى فأى شىء حاعمله مدى تذكرتك إنى أدعيلك بظهر الغيب و أنى حاسدد قيمة العشرة جنيه دول عندى ” المعنوية و ليست المادية ” لكل من إستطعت قدر ما ربنا يمكننى … و ربنا يجعل لكى نصيب من الثواب ده فى الدنيا و الآخرة . … … أنا من المؤمنين بشدة بمبدأ ” pay it forward ” .. و أصوله الجذرية فى الفلسفات البشرية .. و طبعاً قوله تعالى ” مَّثَلُ الَّذِينَ يُنفِقُونَ أَمْوَالَهُمْ فِي سَبِيلِ اللَّهِ كَمَثَلِ حَبَّةٍ أَنبَتَتْ سَبْعَ سَنَابِلَ فِي كُلِّ سُنبُلَةٍ مِّائَةُ حَبَّةٍ ۗ وَاللَّهُ يُضَاعِفُ لِمَن يَشَاءُ ۗ وَاللَّهُ وَاسِعٌ عَلِيمٌ ” … و شفت تطبيق المبدأ ده بعينى مرات لا حصر لها على نفسي و على غيرى . . و المقصود بالمال هنا فوجهة نظري هو أى شىء ذا قيمة .. مش فلوس فقط .. (وقت , مجهود , علم , … ) .. .. و فى سبيل الله فوجهة نظرى برضو مش معناها للمحتاجين للفلوس فقط … كتير محتاجين حاجات تانية غير الفلوس .. … … جرب تساعد أى حد حواليك بأى حاجة عندك (مادية أو معنوية أو عقلية ) .. مهما كانت صغيرة .. و حتلاقى العائد … من حيث لا تحتسب .