إنت مابتلعبش فيها كفاية ليه ؟!

• إنت مابتلعبش فيها كفاية ليه ؟! = نعم ؟!!!!!! 😐
• أفكارك … مابتلعبش فأفكارك كفاية ليه ؟! 😈

---

شوية تمارين إبداع … ( التمرين الأول ) .

فى ناس حضرت معايا كورسات كنت شرحت فيها الكلام اللى حاكتبه دلوقتى ده ..و يمكن عملوا تمارين من دى معايا .. لو إنت منهم … كمل قراية برضو لو ليك مزاج .. التكرار بيفكر برضو :) . … الإبداع - creativity : واحد من المفاهيم اللى فوجهة نظرى حتشكل فرق ضخم بين البشر خلال السنين اللى جاية .. خصوصاً لأن دلوقتى أى مهمة محتاجين ننفذها .. قبل ما بنفكر نعين إنسان يعملها .. بنسأل .. هو إحنا ممكن نعملها عن طريق برنامج .. أو أبليكيشن ؟ .. … مش مصدق ؟ .. تخيل مثلاً لو قلت لك إن القاعة بتاعت الفرح بتاعك حتكون مزودة بكاميرات فتاكة .. و مربوطة كلها ببرنامج فتاك .. بحيث إنك لما تعمل فرحك فيها .. الكاميرات حتلقط أجدع صور ليك و لمراتك و للمعازيم .. و حتفلترها و تحطلها فلاتر ألوان إنستا أجدع حاجة .. و مافيش أسهل طبعاً من رفع الصور مباشرة على أكاونتاتكم لايف .. و عمل تاج ليك و لمراتك و للمعازيم كلهم .. لايف .. … قلتلى كان نفسك تطلع فوتوجرافر ؟! … اللى بيفرق هنا بقى الفوتوجرافر البنى آدم عن الفوتوجرافر الكمبيوتر .. هو .. الإبداع .. … طيب .. إيه هو الإبداع ولامؤاخذة ؟ .. بدون ما تصعب الموضوع على نفسك و ندخل فتفاصيل فلسفية و علم نفس و كلام كبير .. خلاصة الإبداع هى الـ … إنتاجية . بس كده .. آه والله .. .. شوف يا حاج .. إنت كبنى آدم .. عقلك دايماً بيفكر .. 24 ساعة فى الـ 24 ساعة .. شغاااال يونيفرسال .. بس بالظبط زى موتور العربية .. لو فضل شغال بدون ما توجهه فإتجاه معين .. حتفضل تخمس مكانك و تنحل الكاوتش و تطلع دخان عالفاضى .. و مش حتتحرك من مكانك . .. عشان كده .. أفضل إستغلال للموتور اللى شغال فدماغك 24 ساعة ده هو .. إنك توجهه فإنتاج شىء ما .. أى شىء .. كتابة , أغانى , ألحان , رسم , هندسة , رقص , … أى شىء تحبه و تكون بتستمتع و إنت بتعمله .. … أول ما حتعمل كده .. و تنوى إنك تبتدى تنتج .. حتلاقى نفسك بتواجه ( أصحاب حواليك يكسروا مجاديفك , عيال غتتة تتريق عليك , عيال غتتة تنقدك , عيال غتتة تشككك فنفسك , عيال غتتة تقولك تعالى إعمل أى حاجة تانية , … ) .. و قبل كل دول .. حتواجه مخاوفك و شكوكك و كسلك … … تعمل إيه بقى عشان تتغلب على كل اللى فوق دول .. دى قصة تانية .. و حاحكيها فبوست قادم إن شاء الله ( عنوانه حيكون : ضد الغتاتة ) . … و لكن زى أى عضلة جديدة تبتدى تلعب بيها .. حتلاقى إنك محتاج تمرنها .. محتاج تمرن عقلك إنه يبدع .. عشان تبطل تقول جملة ( أنا مابعرفش أبدع دى … ) .. اللى هى شبه ( ملياش فى الرسم .. ملياش فى الموسيقى .. ملياش فى الهندسة .. ملياش فى … ) . … المفاجأة هى : إنت ليك فكل حاجة .. بس لما تشغل العضلة اللى إنت مش بتلعب بيها دى .. حتستمتع فعلاً بمعنى … الإبداع .

التمرين الأول :

إتخيل إنك قاعد فأوضة مربعة 5 متر * 5 متر .. و إرتفاع سقفها 5 متر برضو . كل جدرانها لونها أبيض .. و إضائتها بيضاء برضو و قوية . إتخيل إنك حتقضى فى الأوضة دى ساعة كاملة .. مش مسموحلك تنام فيها .. لكن مسموح لك تاخد معاك حاجة واحدة بس .. ( just any one single object ) .. أى حاجة إنت عايزها .. ( حي أو جماد ) . (أى حاجة فى الكون .. و تعمل أى حاجة نفسك فيها ) حتكون إيه هى الحاجة دى ؟ … و حتقضى الساعة بتعمل إيه ؟ .. كرر ده 3 مرات فى اليوم ..

الشرح :

التمرين ده ممتع جداً كل مرة أجربه مع مجموعة فأول محاضرة فى الكورس .. و تبدأ تتفرج على الوشوش المستغربة .. خصوصاً لو خليت كل واحد فيهم يقول إجابته علناً .. حتلاقى إجابات من نوعية :

• موبايلى
• لابى
• قطتى
• أحم … هو ينفع بنى آدم ؟ 😉 … “أيون ينفع 🤨 ”
• جيتارى
• أكل
• أحم .. هو حد حايكون شايفنا مع البنى آدم فى الأوضة ؟ !😎😎😉 .. ” لا إنتوا لوحدكوا 😐 ” .. بس يبقى عرفت الإجابة 😈 … ” خليها فسرك بقى 🤭 ”
• أحم .. ينفع يكون حد مش عايش خلاص ؟ … ” أيون ينفع 😭 ” … فكر شوية .. إسرح فعلاً بخيالك و روح الأوضة .. و شوف حتعمل إيه .. لو موبايلك .. أو لابك .. أو … ” ساعة كاملة ؟ 😱” .. أو حتى الأكل .. … و بعدين لما تكرر ده .. هل كل مرة حتختار نفس الحاجة ؟ ..

---

السبب :

عارف لما تبقى فرمضان الساعة اللى قبل الفطار ؟ . عقلك بيكون غالباً 90% منه بيفكر فى الأكل و الشرب .. بس .. و مش قادر تفكر فى حتعمل إيه بعد الفطار حتى .. اللى هو نفطر الأول و بعدين ربك يسهلها . و بعد ما بتفطر بتدخل فمرحلة : شكررررراااا .. 3 ساعات أهضم بقى لو سمحتوا مش عايز دوشة . .. أهو عقلك معظم الوقت بيكون فنفس الحالة دى .. (المرحلة رقم 1) رغبة معينة عندك بتستحوذ على تفكيرك معظم الوقت .. أو حالة من التتييس المزمنة .. بتحسسك إنك مستعد تموت و إنت مستريح دلوقتى .. … و أحياناً قليلة جداً عقلك بينور و تحس إن مستوى ذكائك على فجأة و عايز تبدع على نفسك .. ده بيحصل لما تبص بعد المرحلة رقم (1) دى … اللى هو تتخطى كونك حيوان عايز ياكل أو يشرب أو يرضى غرائزه بس .. و تبدأ تكون إنسان . … التمرين المذكور هنا بقى بيساعدك توصل لحالة الذكاء دى بشكل أسرع . لأنك بمجرد ما بتحدد أكتر حاجة إنت عايزها دلوقتى .. و بتحدد حتعمل فيها أو بيها أو معاها إيه .. عقلك بيكون حر إنه يسأل السؤال الأهم :

• طيب .. و بعد الساعة دى .. إيه ؟

---

حتلاقى فجاة عقلك بقى حر .. كأنه كسر قيد أو كأنه شال غمامة كانت عليه ..

جرب إعمل ده أكتر من مرة خلال اليوم الواحد .. لمدة أسبوع .. و إكتب نتايج كل مرة .. ماتقضيش ساعة طبعاً باصص فى الفراغ أو اللاشىء .. التمرين ده إنت ممكن تعمله فثوانى .. الهدف منه بس .. إنك تجاوب على السؤال الأهم : بعد ما تطلع من الأوضة … حتعمل إيه ؟

و الله أعلم .

معظم كتاباتى غالباً حتلاقيها هنا : http://eslamosama.com/blog/