( البوست الرابع فسلسلة - الإنضباط و المتعة و السيطرة
عندك مج ؟!
( البوست الرابع فسلسلة - الإنضباط و المتعة و السيطرة ) . عندك مج ؟!
هات لي مج .. مج زي أى مج علي مكتبك أو من مطبخك .. و علي مدار 18 سنة .. حافضل أملي في المج ده مية … نقطة نقطة .. حملالك المج ده مية .. لحد ما أعومه .. بحيث إنك لو إتحركت أى خطوة غلط .. يدلدق مية .. و بعد ال18 سنة دول أكلفك تطلع سباق جري .. و إنت ماسك المج المليان ده .. و أقول لك إن كمية المية اللي في المج دي هي كل اللى إنت ممكن تشربه أو تستخدمه أثناء السباق ده .. و أسيبك و امشي .. … بشكل كبير جداً .. هو ده التشبيه الأوضح اللى شايفه فعقلي للعملية التعليمية حالياً و تأهيل الشباب لسوق الشغل .. علي مدار 18 سنة .. بيتم ملي عقلك بمعلومات .. إنت ماعندكش أى تحكم إطلاقاً فكيفية ملي عقلك .. او سرعة مليه .. أو فمعظم الوقت كمان نوع السائل اللي بيتم ملي المج بتاعك بيه ( المعلومات اللى بتاخدها يعني ) .. و الأدهي .. إن بعد 18 سنة .. بيتم وهمك إنك لازم تحافظ علي السائل ده .. و تخلي بالك منه .. و إنه شيء مهم و مقدس جداً .. و الأكثر إستفزاز .. إنه بيتم وهمك إنك لازم تسابق .. فسباق وهمي .. بينك و بين كل اللى حواليك .. … بحيث إن كل إنتباهك بيبقي متركز في :
- إن السائل اللي في المج بتاعك ده مايقعش .. مايتكبش .. مايدلدقش ..
- إنك تسابق اللى حواليك و تحاول بأقصي جهدك تجري من غير ما تحرك المج ده حركات مفاجأة !!
أسألتي هي :
- مين اللى أقنعك إنك محتاج 18 سنة عشان تملي المج بتاعك ده ؟!
- مين اللي أقنعك إن التعليم (تعلم أى شيء ) محتاج 18 سنة .. أو ( 5 سنين فكلية معينة ) .. أو ( 7 سنين فكلية تانية ) ؟!!
- مين اللي أقنعك إنك لو المج بتاعك إتكب بالكامل .. يبقي كده ضيعت ال18 سنة اللى فاتوا ؟!
- مين اللى أقنعك إن السائل اللى في المج ده .. مكانه في المج .. مش فمعدتك .. أو تروي بيه نبتة في الطريق .. أو يمكن تديه لحد جنبك عطشان جداً و محتاج أى حاجة يشربها ؟!
- مين اللي أقنعك أساساً إنك محتاج تسابق حد ؟؟
- مين اللي أقنعك إنك محتاج رصيد في البنك قد كده .. او زوجة في السن الفلاني .. أو ولاد تخلفهم في السن الفلاني .. أو وظيفة في المكان الفلاني ؟!
- مين اللى أقنعك إنك المفروض إهتمامك و تركيزك يكون علي المج بتاعك .. و علي اللي حواليك ؟!!
- مين اللى أقنعك إنك ماتبصش علي إنت ماشي فين .. و تستمتع بالمنظر حواليك .. بهدوء .. و راحة نفسية ؟!
- مين اللي أقنعك إنك ماتقدرش تملي المج بتاعك تاني .. و تالت .. و عاشر .. بأنواع سوائل مختلفة .. و تعمل كوكتيلات جديدة .. كوكتيلات ماخطرتش علي بال حد قبلك .. ولا خطرت .. مش فارقة .. المهم إنها علي مزاجك ..
- مين أقنعك إنك لازم تكون ( دكتور بس . .أو مهندس بس .. أو موظف بس .. أو … ) و إنك ممنوع تفكر في كل اللي الدنيا بتقدمه ليك من أسئلة و متع ؟!
و السؤال الأهم :
- إنت مقتنع ؟ .. و لو لا .. خايف من إيه ؟
- خايف تخسر إيه إنت موهوم إنك تملكه ؟!
- مين اللي وهمك إنك تملك رزقك ؟!
- مين اللي وهمك إنك تملك المستقبل و تقدر تتحكم فكل متغيراته ؟!
- مين اللى وهمك إن الأمان في ( الفلوس , الوظيفة , الزواج , الأطفال , … ) .
- مين اللى وهمك إنك المفروض تقضي طول عمرك بتدور علي ( شيء) ما ..
- هل إنت فعلاً مقتنع .. إن ( الشيء ) اللي بتدور عليه ده .. مش أساساً جواك ؟
الكلام ده .. قد يبدو جداً مشابه للكلام المبتذل بتاع ( كتب التنمية البشرية ) اللي بتتباع علي الأرصفة قدام الكليات .. بس فعلاً دي هي الأسئلة اللي بالاقيها فدماغي لما شخص ما مازال مقتنع إن علم معين موجود فكهنوت كلية معينة .. او عند كهنة جامعة معينة . أو إنه عشان درس فكلية معينة أو جامعة معينة .. ماينفعش ” يضيع ” السنين القليلة دي عالفاضي .. و لازم يدور علي حاجة يشتغلها يستخدم فيها اللى إتعلمه في السنين دي . … و إن الشغل ده .. لازم يكون برضه فكهنوت الوظيفة .. و ضمن نفس الوهم اللي سيطر علي عقل البشر لمدة 150 سنة بتوع العصر الصناعي .. … العصر اللى وضع فيه البشر إيديهم علي كل الكتلة الأرضية .. و أصبح غير متاح إنك ( تهاجر ) لمنطقة غير مأهولة في الكوكب .. و تعيش لوحدك فأمان .. مكتفي بذاتك . … و أصبح أى مكان تطأه قدم إنسان .. مملوك ل ” إنسان ” تاني .. و ليه حق إنه يطلب منك أجرة إنك واقف فأرضه !! .
الوضع ده إختلف بالكامل خلال آخر 15 سنة فتاريخ البشرية .. عمر الإنترنت الحديث يعني .. و أصبح متاح مرة تانية إنك تكون حر .. بمجرد ما تقرر ده .. تكون حر فإنك تتعلم .. بس تبذل المجهود المطلوب .. و تنضبط فيه .. تكون حر إنك تشتغل بمزاجك و علي مزاجك .. بس تبذل المجهود المطلوب و تنضبط فيه .. تكون حر إنك تستمتع بالحياة فعلاً .. س تبذل المجهود المطلوب في الإستمتاع ده .. و تنضبط فيه ..
لو إنت مبسوط و إنت شايل مج مليان سائل إتملي لك علي غير إرادتك .. ماشي فسباق .. عين علي مجك .. و عين علي اللي حواليك .. خايف يسبقوك و قلقان و محبط من اللي سبقوك .. مش حالومك و مش عايز أضايقك .. بس ده لو إنت مبسوط فعلاً .. مش شاري سعادة مزيفة مؤقتة .. مسكنة .. بفلوس .. هي كمان مزيفة ..
لكن لو حاسس إنك تعبت .. تعبت من شيل المج ده .. و تعبت من الجري فسباق مالوش بداية .. و مالوش نهاية .. و مالوش قوانين .. لأنه أساساً اللي فهمك إنه سباق كان ضحية زيك .. … ريح .. أقف ثواني .. ثواني بس .. و بص حواليك .. و فكر ..
و الله أعلم .