اصبحت ادخل الفيس و انا فاتح عين نص نص و

اصبحت ادخل الفيس و انا فاتح عين نص نص و مغمض التانية .. نفس الطريقة اللي كنت بتفرج بيها علي فيلم رعب زمان … خايف اشوف صورة او كلام “غبي” .. و في حيرة فعلية من امري .. لو عملت ديسلايك و انفريند لكل حد او حاجة مشيرة او كاتبة حاجة “غبية ” .. مش حيفضل عندي في الفيس الا عدد يتعد علي اصابع الايد الواحدة يبقي كده قفلت علي نفسي و معرفتش حاجة عن العالم الخارجي “الغبي” .. الحل هو اني اعتبر ان الناس دي كلها اذكي مني بمراحل و بتسغبي بمزاجها عشان محدش يكتشف هي ذكية قد ايه … و احاول انا بقي اقرا ما بين السطور و افهم الخدعة الكبيرة اللي واضح ان كل الناس فاهماها … و من محاور الخدعة دي

• برامج زي عرب زفت “عرب ايدول ”
• ماتشات الكورة
• تشيير حاجات من برامج التوك الشو المصري ” مافيش انسان في كامل قواة العقلية حيعمل كده بشكل طبيعي ”
• الشتيمة في مرسي و الاخوان لانهم السبب في ان الدنيا حر السنة دي زيادة عن اللزوم
• …

الناس دي اكيد ذو عقليات خارقة انها تلعب الدور الغبي ده بالشكل الاسطوري ده .. حاسس ان في اخر الفيلم حيطلعوا كلهم عملاء مخابرات شغالين مع ادهم صبري و واحد منهم حيطبطب علي كتفي و يقوللي “لسة قدامك كتير تتعلمه يا حسام ”