أنا فاكر إنى قلت الكلام ده قبل كده

أنا فاكر إنى قلت الكلام ده قبل كده .. بس ما علينا .. عشان واضح إن هو إيتيريشن شغال بديكريمنتنج فاليو لحد ما الكاونتر يصفر .. الطبيعة فى الإنسان الخير الطبيعة فى المجموعة من الناس … الغباء و التخلف (حقيقة عملية مثبتة .. إقرا جيم ثيورى و سوشيولوجى و شوية سايكو)

إذن .. عشان تمشى مجموعة من الناس صح .. يبقى إنت لوحدك مش كفاية حتى لو كان كلامك حكم يقطر منها نكتار العلم . لأن الأغلبية … أغبية (نفس الحقيقة العلمية)

إذن .. إنت محتاج شلة

الفصل اللى فيه شلتين كبار جامدين .. بيبقى فصل جميل قوى .. كل يوم خناقة . لحد ما شلة تعلم عالشلة التانية .. و الواد البوب اللى رافع ياقة قميصه من الشلة الأولانية .. بيمسك أمين الفصل ..

كان فى شلة الفصل كرهها .. و نقلها فصل تانى جات شلة تانية .. قاموا صحاب الشلة الأولانية مقومين الفصل عليهم .. و مسكوا هما أمانة الفصل .. و راحوا مرجعين أصحابهم تانى ..

الفصل دلوقتى شايف القرف بتاع الشلتين دول .. و قرف الشلة اللى لبست خازوق فى النص ..

السؤال مين الشلة الرابعة فى الترتيب من حيث عدد الأفراد ؟ القوة العضلية للفرد ؟ و مصروفهم اليومى عشان يشتروا بيبسى للفصل من الكانتين ؟

الإجابة الشلة اللى ماسكة الكانتين .. و مسرح المدرسة .. و فريق الرقص البلدى .. و بتأجر موبايلات و أجهزة بلاى ستيشن للعيال

الشلة دى لمت فلوس كتير أوى خلال الفترة اللى فاتت و هى الشلة الوحيدة اللى فاضلين لسة صحاب و بيروحوا مع بعض آخر اليوم .. و بيلعبوا مع بعض فى الفسحة .

بس المفاجأة .. الشلة دى أساساً من فصل تانى خالص و بتيجى تعمل فلوس فى الفصل ده .. و ترجع تديه للعيال بتوع فصلهم الأساسى .

الحل فوجهة نظرى دروس خصوصية