وان بيس بقي علي نيتفليكس ... 😍😍😍😍😍💃💃🕺🕺💪💪💪

وان بيس بقي علي نيتفليكس … 😍😍😍😍😍💃💃🕺🕺💪💪💪 ..

أنا يمكن إتكلمت عن ده كتير .. بس حاعيد تاني دلوقتي بمناسبة الخبر الرائع ده .. … ليه باحب وان بيس خصوصاً … و الأنيمي عموماً ؟! … كتير مننا ( معظمنا ) علي مدار تربيته .. و دراسته .. و اللي شافه في العالم خلال أول 15 سنة فعمره .. هو كلام من نوعية :

• ذاكر و مالكش دعوة بحاجة غير مذاكرتك .
• إسمع كلام باباك .. إسمع كلام مامتك .. إسمع كلام عمو .. إسمع كلام المدرس .. إسمع كلام الدكتور .. إسمع كلام المدير .. إسمع كلام التيليفزيون .. موت .
• (لو مالحقتش الميري .. إتمرمغ فترابه = يعني لو مالحقتش الشغل الحكومي .. دور علي اى حاجة ليها علاقة بيه و إعملها ) . … عيش حياتك ك ( قالب ) .. و لو إنت بأى شكل مختلف أو مش قادر تبقي مستريح جوة ال ( سطامبة ) دي .. يبقي إنت أقل .. مش كامل .. مش صح .. غلط .. لازم يتم كسر كل ما هو مختلف فيك .. و “ترقيع ” كل ما هو مش راكب عليك . … … معظم البشر علي مدار ال80 سنة اللي فاتوا من حياة البشرية تقريباً ( بعد إنتهاء الحرب العالمية التانية ) .. كانوا قبلوا بالحقايق دي .. كانوا تعبوا من ( عدم الإستقرار ) .. و بدأوا يخافوا من أى شيء يفكرهم ب ( قلق ) المغامرة و المخاطرة .. العالم بالكامل إتجه ناحية ال ( روتين ) .. و الإمبراطوريات الرأسمالية الضخمة ( الكوربوريتس = mega corporates ) نشأت و ترعرت في البيئة دي . … البيئة اللي بيطمح فيها الإنسان إنه يمارس نفس الروتين من الصبح للعصر .. و يرجع البيت يفضي دماغه بالكامل .. كأن كل البشرية كانت قررت إنها تمدد رجليها و تدخل في فترة أنتخة عميييييقة و طويييلة بعد الحرب العالمية الأولي و التانية … مكافأة علي التعب اللي تعبته . … … التيليفزيون و وسائل الترفيه المختلفة ترعرت و نمت نمو خرافي خلال آخر 80 سنة تقريباً برضو بشكل ضخم .. و ثقافة ال ( فكك مني ) .. و ( فضي دماغك ) .. و ال ( yolo = you live only once) .. و ما شابههم .. أصبحت عقائد و معتقدات .. و لأول مرة تظهر و تتفشي في البشرية أمراض ناتجة عن ال ( obesity ) = التخمة يعني .. لأن البشر أكلوا أكتر بكتير جداً من اللي هما محتاجينه .. و أصبحوا بياكلوا مش بهدف اشباع الجوع .. و لكن لأهداف كتير تانية مختلفة .. منها مثلاً :
• متع الطعوم المختلفة .
• أنشطة أكل تملي أوقات المناسبات اللي معظم الوقت مش بنعرف نملاها بإيه ..
• حب التجربة بدون جوع حتي ..
• الإعتياد .. و الإدمان .. … … و الأهم .. هو إن المتع بشكل عام ( و الأكل خصوصاً ) .. أصبح عند كتير جداً من البشر عبارة عن متنفس لأمراضهم النفسية الكتير الناتجة عن حياتهم الروتينية الغير عادية دي .. و أصبح الإنسان بيرجع من شغل هو كارهه بس حاسس إنه مضطر يكمل فيه عشان يجيب فلوس .. يصرفها علي حاجات حاسس إنه مضطر يشتريها عشان يقدر يتعايش فوسط ناس حاسس إنه مضطر يعيش فوسطهم .. و مش قادر حتي يفكر يغير حياته دي .. فيرمي نفسه في الأكل و غيره من المتع … عشان يسكن ألم نفسه اللي مش قادر يفهمها . … … … … كل ده … كل الدوشة دي .. ضد أحد المكونات الأساسية للنفس البشرية .. و هو مكون ال( عقيدة ) .. code of conduct … … العقيدة دي ( مش باتكلم هنا عن الإسلام لسة ) .. هي المنهج .. و الهدف .. اللي لما بيفكر فيهم الإنسان .. بيحس بمدي تفاهة و ضآلة أى مشكلة من مشاكله .. … … جسم الإنسان معظم الوقت في حالة إنتاج للطاقة .. ( طول الوقت إنت بتاكل و تهضم و تنتج طاقة ) . و لكن عقلنا دايماً عامل زي موظف البنك اللي بيدور إزاي يستثمر الطاقة دي .. أحياناً كتير .. بيضطر يصرف الطاقة دي و هو مش مقتنع .. و هو متضايق .. فتحس إنك حتي لو محتاج شوية طاقة كتير عشان حاجة إنت كارهها ( تنضيف الشقة مثلاً ) .. حتلاقي إنك مش قادر تقوم من السرير .. … لكن لو حد كلمك قال لك حضر شنطتك إحنا طالعين شرم .. و قدامنا أسبوع فحت و ردم بين شرم و الغردقة و دهب مثلاً .. ممكن تقضي الأسبوع كله صاحي .. علي ساندوتش شاورما واحد مش أكتر . … … ده لأن عقلك حابب الغردقة و شرم و دهب . .. لكن لما بتضطر تبذل طاقة و مجهود فحاجة إنت عقلك كارهها … بتحس طول الوقت إنك تعبان .. متضايق .. مخنوق .. … … العقيدة .. بتدخل علي الحتة دي بالظبط … العقيدة هي تدريب و تطويع موظف البنك ده ( عقلك ) .. علي إنه يفصل رغباته و مشاعره .. عن اهدافك .. و عن الطاقة اللي إنت محتاجها .. … و إنك لما تحب تنضف الشقة .. تحس بنفس الحماس و الطاقة اللي بتحس بيها لما بتحب تروح الغردقة و شرم . … العقيدة … هي الحاجة اللي إنت بتشوفها فأى بطل أوليمبي .. قدر إنه يتمرن فكل يوم كان كاره يتمرن فيه .. قدر إنه يكمل تمرين حتي بعد ما غيره تعب و بطل .. قدر إنه يكمل تمرين .. حتي بعد ما عقله حاول يخليه يبطل و يقوله إنه فاشل و مش حيوصل . … العقيدة .. هي الحاجة اللي بتشوفها فكل الأبطال اللي بيتصرفوا تصرفات قدامك .. و تقول إنت بكل (غباء ) أحيان كتير … ” لا ماقدرش أعمل كده ” .. العقيدة هي اللي بتخلي ناس ” تكظم ” غيظها … و فعز غضبها .. .تكون هادية .. و ماتخسرش حد بزعيق أو شتيمة أو قرارات يندم عليها بعد كده . .. العقيدة .. هي الحاجة اللي بتخلينا فأى وقت … نقدر نتصرف بالشكل اللي كتير غيرنا ممكن يشوفه مستحيل ..
• لا مش نازل الحفلة .. أنا حاقعد أذاكر .
• لا مش نازل القعدة دي .. أنا حاقعد أخلص شغل علي فكرة فدماغي .
• لا مش حأجل التمرين .. مش مشكلة إن الدنيا بتشتي و رعد و برق و تلج .
• لا مش حاكمل نوم .. أنا قايم أصلي .
• لا مش حاكمل شغل .. انا قايم أصلي . … لا مش حاكون ” سطامبة ” .. أنا حاعمل اللي عايز أعمله … … أنا حر . حر .. حتي من رغبة عقلي و جسمي في الأنتخة .. حر .. حتي من خوفي .. حر .. حتي من خجلي .. من يأسي .. من ندمي .. … حر … … … … العقيدة دي .. ليها مسميات كتير في تاريخ البشرية … عقيدة الساموراي = البوشيدو . ( samurai bushido ) .. و غيرها كتير فثقافات جنوب شرق آسيا .. … … … في ( one piece ) .. لوفي .. البطل .. إنسان .. عقيدته ثابتة .. مهما جه فطريقها .. من مغريات .. من هزائم .. من ألام .. من مخاوف .. عقيدته ثابتة .. .. و فريقه ( زورو , سانجي , نامي , يوسوب , فرانكي , تشوبر , بروك , روبن , جيمبي , … ) كل واحد منهم عنده عقيدته .. هدفه .. اللي مهما جه فطريقها … مابيتهزش .. … … … الأنيمي عموماً ( و وان بيس ) .. خصوصاً .. هو أحد أكتر الحاجات اللي علمتني فحياتي إن ( العقيدة ) قوة الإنسان الحقيقية .. و سعادته .. و حياته .. الحقيقية .. … بس أنهي عقيدة .. أنهي ( code of conduct ) .. اللي تقرر تختاره عشان تعيش ليه .. و بيه ؟ .. … … … السؤال ده مختلف بالكامل و إطلاقاً .. عن ( إزاي أعيش بيه ؟ ) .. مختلف عن ( إزاي أستخدم عقيدتي علي نفسي .. و أتقوي بيها .. و أفكر فيها ) .. … … كتير جداً حوالينا .. مختارين ( عقائدهم ) .. كتير جداً مكتفين بده .. مكتفين إنهم ( إختاروا ) .. أو إنهم إتولدوا فمجتمع إختار ليهم عقيدتهم .. .. بس كتير جداً منهم بيعيش حياته .. بدون أى محاولة لإستخدام عقيدته دي .. بيعيش بدون أى محاولة إنه يطوع عقله .. و نفسه .. و حياته .. بإستخدام القوة الأسطورية دي .. .. و بالتالي .. كتير بيعيش و هو فاكر إنه عمل كل اللي عليه .. لما إختار العنوان ( أنا عايز أكون ملك القراصنة ) .. بس للحظة .. ماحاولش ينزل البحر .. و يدور علي طريقه .. و يتمرن .. و يطوع طاقته و حياته عشان عقيدته دي . … … النوعية دي في منها كتير في ( وان بيس ) … … أنصحك تتفرج عليهم :) … و تحاول تشوفهم حواليك .. فحياتك العادية .. … و تقرر .. إنت متضايق ؟ … ولا سعيد ؟ … ولا خايف المُسكن يخلص ؟ … … و الله أعلم .