أدوبى 2018 البوست الأول : جايالنا فى السليم .. بس

أدوبى 2018 البوست الأول : جايالنا فى السليم .. بس كان لازم أجيلها شمال ..

الساعة دلوقتى 11 مساءاً .. من الساعة 6 المغرب و أنا شغال على الموضوع ده .. يعنى 5 ساعات كاملين تقريباً ( يتخللهم طبعاً شغل تانى و لعب بوكس فى الساندباج و عقلة و وقوف عالإيدين و شد فى الشعر و عض فى الصوابع و مضغ فى اللبان و شرب فى المياة ) ..

تقريباً فكل كورساتى فأى برنامج من برامج أدوبى .. بأكد على أهمية شراء البرامج (إن أمكنك مادياً ) .. و إن ده بيرحمك من تعب كتييييير و بيوفر ليك حاجات أكتر .. غير طبعاً الجانب الأخلاقى و الديني .

و لكن لأن فمصر و دول العالم الفقيرة خصوصاً حاجة زى كده بتعتبر ترف .. لذا .. فمعظم الكورسات برضو .. بيكون فى خطوة (تسطيب ) البرامج .. و باشرحها فأول محاضرة دايماً .. و قد أكون شرحتها بطرق مختلفة لناس كتير .. إلا إنى بأكد دايماً على نقطة مهمة جداً جداً جداً .. . ” لازم تتعلم تتفحت بنفسك “

فاكر كويس الطريقة اللى شخصياً إتعلمت بيها حاجات كتيييييييييير فأوائل معرفتى بالكمبيوتر .. كنت أروح ل Ahmed D. Sherif و أتذل عنده أو تحت بيته فعز الشتا أو فعز الشمس .. عشان يحطلى لعب و أفلام و مسلسلات عالهارد ال40 جيجا (الكلام ده سنة 2004 لحد 2007) و كان يدينى اللعبة و أرجع البيت ماعرفش أسطبها .. أكلمه فى التيليفون الأرضى !! .. يطنشنى .. و لما أوصله .. يقولى “حل نافوخى و إتصرف زى ما كلنا بنتصرف ” ..

كتييييييييير وقعت ويندوزات … و كتييييييير فيرست الجهاز .. و كتييييييييير عملت مصايب أكتر و أكتر .. بس مع كل مرة كان حاجة من دول بتحصل .. كنت بادور و أتعلم و أقرا أكتر .. عدت عليا مالويرات و فيروسات كتيير .. و كنت باحفظ إسم و إلياس كل واحد .. و البروسيس بتاعته .. و البيهافيور بتاع اللى خلفوه . عشان أعرف إتصرف فى اللى بعده ..

إتعلمت إنى لما الجهاز يخبطنى قلم .. ماتصلش ب Ahmed D. Sherif لأنه حيطنشنى أو لو رد حيطلع عينى الأول … إتعلمت أتعلم زيه .. و أدور .. و بعدين آخد الجهاز بحنية و أفهم .. إيه اللى تاعبه و محتاج إيه :) :) .

المعلومات اللى خدتها بالطريقة دى فمجالات كتييير على مدار السنين .. تكاد تساوى إن لم تتخطى فحجمها كم المعلومات اللى حصلت عليه من خلال أى دراسة أكاديمية .

و بالرغم من إنى مش مضطر دلوقتى أعانى مع قرصنة برامج أدوبى بفضل الله .. إلا إنى عشان أشرح فأى كورس إزاى تتعامل مع نظام تسطيب قد يبدو بسيط .. إلا إن فى حد إبن حلال عمل injection لمالوير إبن ستين فسبعين جوه البايلود بتاع الأبليكيشن .. و إضطريت أعمل حاجات معملتهاش من سنين فى الجهاز .. و أمسح ليج أوف ليجيندز (حسبنا الله و نعم الوكيل ) .. و أضطر أنزلها تانى .. بالرغم من كل ده .. كان لازم أعمل ده عشان لما حد يقف معاه نفس الخطوات أو يعانى نفس المعاناة و يتصل بيا .. حاقول له الأول دور … دور مرة و إتنين و ألف .. بس إعرف إنك لو يأست أو حسيت إنها مش بتطلش قماش .. إتطمن إنى قدر علمى و إستطاعتى حساعدك إن شاء الله ..

والله أعلم .

ملحوظة : فى بوستات جاية إن شاء الله .. و لو مش متابع .. مؤتمر أدوبى (ماكس تمنتاشر شغال اليومين دول ) ملحوظة 2 : البرامج نزلت مقرصنة أينعم لو أى حد محتاجها .. و لكن رجاااااااء إسأل نفسك ألف مرة .. معندكش أى وسيلة تاخدها فى الحلال الأول ؟