بوست متعدد الأبعاد و الإتجاهات

بوست متعدد الأبعاد و الإتجاهات ..

• كنت إتسألت كذا مرة عن إزاى باختار الكتب اللى باقراها .. : عندك مثلاً الكتاب ده (flatland - a romance of many dimensiosn) .. خلصت 50% منه من بتاع شهر .. و لسة ماكملتوش الصراحة ..

• أول مرة سمعت عنه كان فحلقة من حلقات the big bang theory .. المسلسل الأشهر حالياً فمجال ال sitcom .. اللى تقريباً كنت من أوائل الناس اللى تابعته فأول سيزون ليه .
• إزاى سمعت عن the big bang theory ؟ لأنى بعد ما خلصت المسلسل العبقرى numb3rs حسيت إنى عايز أشوف مسلسل من نفس النوعية .. فعملت جوجل سيرش على المسلسلات المشابهة .. و لقيته .
• إزاى عرفت عن (numb3rs) ؟ فمرة من ذات المرات و أنا معدى من قدام التيليفزيون سنة 2008 شفت حلقة من مسلسل ( house) ..على mpc4 .. (كانت الحلقة اللى كانوا بيعملوا فيها برنامج تسجيلى عن هاوس .. و المريضة كانت بنت بتشتغل موديل و … لو إنت عارف الباقى يبقى مش محتاجنى أكمل ;) … ) .. فعجبنى جداً شخصية هاوس … فنزلت المسلسل بالكامل .. و أنا باتفرج عليه .. قررت أشوف المسلسلات المشابهه ليه إيه .. فلقيت numb3rs .

• التسلسل اللى فات حقيقى 100% .. و بيتكرر مع كل حاجة فحياتى تقريباً .. كم الحاجات اللى بنتعرضلها يومياً ضخم جداً .. زى سوق الجمعة بالظبط .. أنا باحب أتعامل مع حياتى بنفس الشكل .. و أقلب فكل موقف و تفصيلة فيومى و أشوف .. ينفع تركب فين .. و أستغلها إزاى .. و أبحث أكتر عنها .. و أشوف المشابه ليها .. و هكذا .

• الكتاب المذكور فى البوست ده مش أول مرة أتكلم عنه تقريباً .. بس عبقريته بالنسبالى فعلاً متعددة الأوجه .. الفكرة الأساسية فيه هو إن فى عالم من بعدين بس .. يعنى طول و عرض بس .. مافيش إرتفاع .. و بالتالى مثلاً .. لو إنت مربع .. و شايف قدامك دايرة .. ماعندكش وسيلة تعرف إنها دايرة إلا لو فضلت تدور حواليها و ملاقيتش أركان . :D :D :D .

• الموضوع قد يكون معقد بالنسبة للى عايز يشوفه معقد .. بس هو بسيط جداً .. و ممتع جداً لو طبقته على حياتنا العادية … كم الحاجات اللى بنشوفها .. إنطباعتنا عنها محدودة بحدود خبراتنا و أفكارنا و مشاعرنا … و الوسيلة الأمثل لأنك تشوف العالم بشكل أفضل .. مش إنك تبقى أفضل الكائنات ثنائية البعد فى عالم ثنائى البعد .. و لكن إنك تفكر ففكرة .. قد تكون أجن من الجنون نفسه لكل اللى حواليك .. ألا و هى .. البعد التالت … ساعتها .. حتطير بالنسبة لكائنات ماتقدرش غير إنها تمشى .

• الجنون ليه تعريفات كتير .. قالها ناس أكبر منى بكتيييييير .. لكن حاجرب أدلو بدلوى أنا كمان و أعرفه … ليه لا :

الجنون .. هو إنك ماتدربش نفسك على كيفية إصطياد اللحظات اللى بتغير الحياة .

والله أعلم .