بوست ولا ليه أيتها لازمة ... بس غلط إنى ماكتبوش

بوست ولا ليه أيتها لازمة … بس غلط إنى ماكتبوش .. للأسف و لكل الأسف … فاكر من بتاع خمناشر سنة كده ولا حاجة .. و يمكن لحد أولى ثانوى بتاعتى كمان 2003 .. كان فكرة إنى أفطر فرمضان .. و مافضلش أتفرج عالتيليفزيون لحد أذان العشا .. و أنزل أصلى .. و أرجع أتفرج عليه لحد السحور .. فكرة غير قابلة للتنفيذ .. و كنت أستغرب جداً .. إزاى فى ناس بتنزل بعد الفطار ؟!! … هما مش متابعين تيليفزيون .. و لا برامج كذا و كذا .. .. و تمضى الأيام .. و السنين .. و أقرا كتب كتير .. و أشوف حاجات أكتر .. و أعمل حاجات كتير و قليل .. .. متجوز الحمد لله بقالى داخل على سنتين و مافيش فبيتى تيليفزيون .. متابع عشرميت برنامج و مسلسل من جميع أنحاء العالم .. إلا مصر و الوطن العربى .. مش فاكر آخر مرة إتفرجت فيها على مسلسل عربى .. أو برنامج مصرى كانت إمتى ؟! … تقريباً 2003 .. .. سألنى شخص ما عزيز عليا جداً من 3 أيام عن أحوالى و كده .. و بعدين سأل .. إنت متابع إيه فرمضان ده ؟ … رديت بإذبهلال إنى معنديش تيليفزيون .. رد بإستغراب .. “أمال بتعمل إيه بعد الفطار ؟! ” … … أنا والله ماكنتش ناوى أكتب أى بوست من نوعية إنى أنا البرنس اللى بيفكر و الناس كلها فى الكلتش خالص .. و كنت نفسى أبطل أكتب بوستات من النوعية دى .. .. بس بالعقل يا مؤمنين .. حد يفهمنى بس .. طايب .. و عشان التحفيذ .. جايزة ضخمة قيمتها إتنين جنيه خمسة و سبعين قرش .. لأى حد يقدملى سبب مقنع واحد على الأقل إنى أفتح التيليفزيون .