من بتاع سنتين و سلك التيليفون الاساسي لعدد من المشتركين

من بتاع سنتين و سلك التيليفون الاساسي لعدد من المشتركين (العبد لله واحد منهم ) و البوكس بتاعه متعلقين علي عمود خشب في وسط الشارع بسبب ان البيت اللي كانوا عليه اتهد و اتبني مكانه بيت تاني رجع عن الشارع اربعة متر و بالتالي اصبح العمود الخشب اللقيط واقف لواحده فنص الشارع متعلق عليه بوكس و سلك تيليفون فكل ما عربية محملة حاجة تعدي من الشارع تقطع السلك و نجيب العامل ابن الحلال يصلحة و ياخد اللي فيه النصيب الكلام ده حصل بتاع 11 مرة علي مدار السنتين لدرجة اني مجرد ما بلاقي احيانا لمض الراوتر بتاعي فصلت بنط من علي الكرسي ابص من البلكونة يمكن الحق العربية اللي قطعت الاسلاك و اخليهم يدفعوا تمن التصليح لحد يوم التلات اللي فات ما جات عربية شايلة سلم و قطعت السلك و كسرت البوكس و شالت العمود الخشب من الارض اساسا نزلنا نكلم السواق و العمال اللي معاه و هما فعلا كانوا متعاونين و عايزين يدفعوا فلوس التصليح و علي وشوشهم دهشة الراجل بتاع (يا بيه انا كنت قاعد في الدكانة بتاعتي “لو ما تعرفش النكتة دي حاقولها في الاخر ”) اصل ببساطة الناس غلطتهم انهم كانوا ماشيين مش متوقعين مصايد زي دي المهم الكلام ده كان التلات الساعة 9.30 بالليل طبعا مافيش اي حد صاحي انه يعبرنا فقررنا ان الصبح انا و جاري نبتدي المشواااااار الاربع الساعة 11.45 “اضمن وقت تلاقي فيه مسؤولين حكومة” انا كنت واقف قدام ست مبتسمة جدا في خدمة العملاء في السنترال بكل هشاشة و بشاشة قالتلي ” انا حسجلك العطل .. بس عشان انت وشك بشوش ” كذب ” حاقوللك تعمل ايه يخلصلك القصة النهاردة , … انت تروح لاستاذ ”>>>>” في الورشة تبلغ عن العطل بنفسك ” طبعا انا كنت عارف المشوار و القصة و عنوان الورشة و كل ده من زمان لان القصة اتكررت 11 مرة قبل كده علي الاقل .. و كل مرة الست البشوشة تقوللي عشان خاطرك بس حاقوللك علي السر الاسطوري و خريطة كيف تذهب لالهة اوليمبس “قصدي ورشة التصليح ” الاربع الساعة 11.58 انا واقف مع استاذ ا”>>>>>” في ورشة التصليح و الاعطال استاذ ”>>>>” بعتني لاستاذ “مش فاكر اسمه ” في اوضة الكابلات .. لان طالما البوكس اتكسر و طالما احنا تجاسرنا اننا نطلب ان البوكس يتنقل علي البيت اللي اتبني من سنتين خلاص مش يسيبوه في وسط الشارع للعربيات الضالة تنال من عرضه لا سمح الله .. كان لازم تدخل قسم الكابلات بكل ترحيب استقبلوني … “اتفضل اقعد .. نجيبلك شاي ؟ ” شكرا يا سيدي مش عايز شاي ” شوف يا باشمهندس .. احنا سجلنا العطل .. و اول ما العامل يفضي حنبعته لحضرتك ” طب العامل “الوحيد ” مشغول في ايه ؟ “في جامع اسمه الهداية حيتم افتتاحه يوم الجمعة و الوزير جاي ماسبيرو و الدنيا و لازم نخلص تصليحات هناك ” طيب انا قصتي تخلص امتي “اول ما العامل يفضي ” “بس عشان خاطرك و عشان انت حبيبي """" ماعرفوش و النعمة """"" انا ححاول اخلصلك القصة بنفسي ” قلتله انا خوفي ان الاربع يخلص و الخميس و انتوا عندكوا الجمعة و السبت اجازة قاللي بابتسامه عريضة ” يا باشا احنا بنشتغل الجمعة و السبت ” و راح فاتح موبايله و كلم واحد اسمه ”@@@@@ ” و قاله “الخط ده عليه تيليفون يهمني … خلصهولي ” و بصللي بكل ثقة و قاللي ” ادي نمرة @@@@@.. و ادي نمرة مكتب الكوابل بس دلوقتي مش لاقيين انفار يحفروا الاربعة متر دول ” ” تقدر توفرلي انفار يحفروا ؟” انا كنت بافكر احفرهم بنفسي الصراحة .. اربعة متر في شوية رمل مش حيبقوا مشكلة لاقيته قال “بس برضو دي ارض دولة .. و ممكن تبقي جريمة و سجن ” “المهم انت روح و كلم الناس الرقمين دول كمان نص ساعة فكرهم عشان يجولك ”

الاربع الساعة 12.30 لحد 2.30 بكلم الرقمين ماححددش بيرد او مشغول الاربع الساعة 2.30 رد و قاللي “تمام يا باشا اول ما نخلص حنبعتلك ناس ”

الاربع الساعة 7 انا روحت بيتي لقيت جاري بيقوللي انهم فعلا جم و حفروا و بكرة العامل بتاع الهوائيات ييجي يشبط السلك

الخميس الساعة 8.30 الصبح كلمت """ مكتب الكوابل """ قالولي “جينا امبارح يا باشا و خلصنا شغلنا و كله تمام و مافاضلش الا ان بتاع الهوائيات ييجي يشبطلك السلك ” الخميس الساعة 9 كلمت بتاع الهوائيات (الراجل اللي جالي 11 مرة في سنتين )قاللي “ايوا يا دكتور “هو مصمم اني دكتور مع اني مهندس ” انا عند جامع الهداية و جايلك قبل الضهر ان شاء الله ”

الخميس الساعة 4 عصرا الدكتافون بيرن نزلت لاقيت الراجل بتاع الهوئيات بيقوللي ان شغلي يخلص علي الحد او الاتنيين ان شاء الله طبعا انا اتصدمت .. المهم اسال ليه قاللي ” عشان مافيش جريدة و بوكس ” مش فاهم “يعني بتاع الكوابل كان لازم بعد ما حفر و نقل السلك انه يطلعه علي الحيط و يعزلة و يحطه في بوكس ” طب هو ما عملش كده ليه “ماعرفش .. اساله هو بقي ”

الخميس الساعة 4.30 انا واقف في ورشة التصليح قدام راجل مبتسم جدا و بيقوللي بكل بساطة و سعادة “انت جيت متأخر … مش عيب تكون باشمهندس و ماتعرفش ان الساعة 4 ده وقت ميت ”

قلتله انا باكلم الناس من الساعة 8 الصبح

قاللي بكل سعادة و ابتسام ” مش عيب تكون باشمهندس و مانتش عارف ان الكلام في التيليفون مابيقدمش و مابيأخرش … كان المفروض تيجي ”

قلتله هما ادوني ارقام التيليفون و قالولي ماتجيش

قاللي بكل سعادة و ابتسام “مش عيب تكون باشمهندس و مانتش عارف انك المفروض تكلم المديرين بس و “الراجل الكبير ” مش تسمع كلام العمال ”

قلتله طب انا اعمل ايه دلوقتي

قاللي بكل سعادة و ابتسام “قدم شكوي ”

انا باكتب الكلام ده الجمعة الساعة 9 بالليل انا حذفت من اللي قلته الاسامي لاني مؤمن ان الناس مش موقف او موقفين و ممكن ناس يتم اغتيابها و ممكن جدا اكون مكان اي حد منهم يوم من الايام انا حذفت تفاصيل كتييييييييييييير حذفت ما يقرب من 20 شخص مختلف اخدوا رقم التيليفون و اسم صاحب الخط “والدي” و بان عليهم الاهتمام الشديد عشان في الاخر يقوموا بالخطوة الاسطورية (يتصلوا ببتاع الهوائيات اللي جالي 11 مرة قبل كدة اللي قرب انه يكون صاحبي ) انا حذفت قصة الفلاش باك بتاعت بتاع الهوائيات اللي حكهالي و ازاي انهم متأمرين عليه و انه لو مد ايده علي الكابل اللي ماشي في الارض حياخد سجن و احتمال يغتالوه انا بس باضحك ان كل ده كان ممكن يخلص و خطي كان حيبقي زمانه شغال لو كنت في الاول خالص رضيت ان البوكس يتن علي عمود خشب في وسط الشارع و ماطلبناش انه يبقي في وضعه الصحيح

من احلي الردود اللي سمعته لما قلتله احنا خلاص حفرنا 3 متر بعمق 10 سم و مدينا السلك في الارض ان المسؤول الكبير اوي اوي المبتسم دائما قاللي بكل اهتمام ” انتوا كده ممكن تكونوا ارتكبتوا جريمة في حق الدولة و دي مخالفة و محتاجة تصاريح كتير .. ادعي ربنا ان الموضوع يعدي ”

p.s i can’t find my stress releasing ball