الدفتر

القيد 17 من 20

ماكيافيللي 9 دقيقة قراءة

كاااااااااااااااان .. ياما كاااااااااااااااااااان ...

الصورة التي نشرها إسلام مع هذا المنشور
126تفاعل 17تعليق 3مشاركة المنشور الأصلي على فيسبوك

كان في بنوتة .. جميلة و فاتنة و مؤدبة و متدينة و بتعرف تطبخ صينية بطاطس كويس ... و إسمها ( لوكريتزيا ) .

و إتجوزت راجل مهم و له سُلطة .. لكنّه شرّاني .. دمّه تقيل .. بتاع مصلحته و بس .. و أهم حاجة عنده في الحياة هي سٌمعته ... وإسمه ( نيسيا ) .

بعد فترة من الجواز .. مابيحصلش حمل ..

و نيسيا بيبدأ يقلق .. و يخاف إنه مايخلفّش العيّل اللي حيشيل إسم العيلة من بعده .. و بيبدأ يتكلّم في الموضوع ده فوسط معارفه و حاشيته ..

فالكلام بيوصل ل ( كاليماكو ) ..

مين ده ؟! .. ده عاشق ولهان .. كان مٌعجب بـ لوكريتيزيا من أيام ما كانت لسّة بتدرس في المعهد .. و كان بيعاكسها في الرايحة و الجاية .. و هي بتكرف له و تشتمه ..

و هو لسة بعد الجواز بيراقبها في صمت علي السوشيال ميديا .. و بيبعت لها ريكويستات و هي بتعمل له بلوك .

و لما بيعرف إن ( نيسيا ) بيفكّر يتخلص إزاي من ( لوكريتزيا ) .. لأن عندهم ماكنش في طلاق .. ولا كان ينفع يتجوز عليها ..

ف بيروح يشكي همومه و قلقه ل صاحبه ( ليجوريو ) .

مين ليجوريو ده ؟! .. سمسار ..

عارف الناس اللي بتقعد عالقهوة .. و تلاقيه دايس معاك فأى حوار .. و بيشتغل في كل حاجة و أى حاجة ( أراضي , عربيات , جواز , أعضاء 🤣, ... ) ... بالظبط .. هو ده ( ليجوريو ) .

ف (ليجوريو ) .. بيشد نفس سيجارة كيلوباترا رخيصة .. و بعدين يعمل صوت و هو بياخد شفطة شاي زردة سٌكّر برّة ... و بعدين بيقول ل ( كاليماكو ) :

و اللي يجيبلك حبيبتك لوكريتزيا علي سرير الزوجية .. و برضاها .. و برضا جوزها ( نيسيا ) نفسه .. و هو اللي حيكون برّة الأوضة بيحضّر لكم فطار الصباحية 🤣 .. و برضا المجتمع و الناس المتدينين في البلد كلها كمان .. تدّيله إيه ؟! .

كاليماكو ردّ عليه مباشرة :

أجيبلك أجدع زبادي مانجا خلاط .. و علبة سجاير إل إم أخضر مستورد كمان .

ليجوريو بيقول ( آمين .. و أنا موافق و السعر عاجبني ) .

و بيروح مظبّط السوشيال ميديا حوالين ( نيسيا ) .. و يخليه لمدة كام يوم يشوف أخبار عن :

الدكتور المشهور اللي سرّه باتع اللي إسمه ( ليجوريو ) .. الخبير الجامد زوحليقة ( ليجوريو ) اللي بيعمل وصفات تخلّي البنت تحمل حتي لو مش متجوزة 🤣 ...

و ( نيسيا ) .. قاعد في الكافيه الغالي بيشرب فيب و آيس فرابتشينو .. و بيسكرول في فيديوهات ريفيوهات عن ( ليجوريو ) و بيشوف ناس بتٌشكر فيه و مهاراته .

لحد ما بيقتنع .. و بيروح يحجز ميعاد في عيادة ( دكتور ليجوريو ) .. و يقول له ( عايز أجيب ولي العهد ) .

ليجوريو بيقول له : سهلة و بسيطة ..

إنت حتروح تجيب ( بيض الجن ) 🤣🤣🤣🤣 .. و حنعمل وصفة ( بيض الجن ) 🤣🤣🤣

**** للتوضيح .. آه والله .. القصة الحقيقية أساساً إسمها كده ( the mandrake root ) .. و أحد الترجمات المشهورة للنبات ده هو ( بيض الجن ) ****

المهم .. نيسيا .. بينزل قسم الخضروات و الفواكه الطازجة في المول اللي قٌدّام البرج اللي فيه عيادة دكتور (ليجوريو ) ... و بيجيب أجدع ( بيض جن ) مستورد كمان .

و ( ليجوريو ) بيعمل الوصفة .. و بعدين بيقول ل ( نيسيا ) علي التمن ..

بيقول له :

إنت كل أحلامك في الحياة هي إنك تخلّف .. صح ؟! ..

الوصفة دي حتديلك الحلم ده .. و بعد ما مراتك ( لوكريتزيا ) .. حتشرب الوصفة .. و إنت تقيم معاها علاقة زوجية كاملة ... حتخلف .. بس إنت حتموت .

نيسيا بيتخض و يسأل : أموت ؟! .. يعني إيه أموت ؟! .

ليجوريو بيشرح : هو ده التمن .. أول حد حيمارس علاقة حميمية مع زوجتك بعد ما حتشرب الوصفة .. لازم حيموت .

نيسيا بيرد : لكن بعد كده عادي ؟! .. يعني تاني واحد يمارس العلاقة الحميمية معاها يبقي قشطة عادي ؟! .. يعيش و مافيش خطر عليه ؟! .

ليجوريو بيتنحنح .. و يعمل نفسه مٌحرج .. و يقول : أيون .. لكن اللي إنت بتقوله ده معناه إنك توافق إن مراتك تقيم علاقة حميمية مع شخص غريب أثناء ما هي علي زمّتك ..

و ده لا يرضي عنه الأخلاق ولا الشرع ولا القانون .. ولا حتي لوائح الفيفا !! .

نيسيا بيرجع في الكرسي و يرفع صدره لفوق .. و يتكلّم بكل فخر و ثقة و هو بيبرم شنبه لحد ما يبقي شبه قرنين صغيرين فوق بٌقّه 🤣 .. و يقول :

" أصلك ماتعرفش إنت بتكلّم مين " .

و يكمّل و يقول : " أنا اللي أنا عايزه في مدينتنا دي .. هو اللي بيمشي .. أنا اللي باقول الشرع و الأخلاق و القانون بيقولوا إيه " .

ليجوريو بيقول له : " تشرّفت بسيادتك .. ماعاش اللي يجهلك سعادتك "

" بس دلوقتي في مشكلة تانية سيادتك .. مين اللي حيرضي يضحّي بنفسه و يموت ؟! " .

نيسيا بيزعّق بصوت عالي : " مش إنت الدكتور .. إتصرّف .. هاتلي حد ينام مع لوكريتزيا .. أنا مش فاضي للكلام ده .. أنا راجل مهم و ورايا مسئوليات " .

ليجوريو بيعتذر بسرعة .. و بيوعد ( نيسيا باشا ) إنه حيتصرّف بأسرع وقت ممكن .

و بعد كام يوم .. بيوصل ليجوريو ل بيت ( نيسيا ) بالليل .. و هو معاه ( كاليماكو ) .

و بيقول ل ( نيسيا ) .. إنه قدر يقنع الراجل الغريب اللي ماحدش يعرفه خالص اللي إسمه ( كاليماكو ) بالعافية .. مقابل مبلغ مادي كافي إنه يروح لأسرته الغلابة 🤣 .

و ( نيسيا بيه ) بيطلّع دفتر شيكاته مباشرة .. و بعدين يدخلّه تاني لما يفتكر إنهم لسة سنة 1518 .. و منطقياً مافيش لسة شيكات في الفترة الزمنية دي .. ف بيروح مستسهل و باعت ل ( كاليماكو ) حسابه علي إنستاباي و خلاص .

و بعدين بيروح ( نيسيا ) قايل ل ( ليجوريو ) .. إنه إستخدم علاقاته .. و جاب رجل الدين المٌخلص المشهور اللي بيطلع في برامج التيليفزيون .. و خلاّه يشرح ل ( لوكريتزيا ) إن اللي حيحصل ده كله حلال ..

و لوكريتزيا خلاص إقتنعت و مستنية جوة فأوضة النوم .

كاليماكو .. بيستأذنهم بقي .. و بيطلب منهم لو مايعملوش دوشة كتير عشان يعرف يركّز في شغله .. و بيدخل ل ( لوكريتزيا ) .. و هو لابس قناع و مغيّر صوته ..

و بعد ما بيخلصوا ( علاقة حميمة ) .. في حركة درامية إتفحتت في كل التيليفزيونات و المسلسلات و الأفلام .. بيشيل ( كاليماكو) القناع من علي وشّه .. و يقول ل ( لوكريتزيا ) :

بخخخخ .. أنا ميييييييين ؟! 🙂

( لوكريتزيا ) بتبص له .. و بعدين ترد و تقول :

همممممممممممم .. ماشي ..

طالما رجل الدين المشهور اللي برّة موافق ..

و طالما البلد و المجتمع كلهم موافقين ..

و طالما العبيط الأهبل اللي عامل فيها جوزي ده موافق ..

أنا حاوجع دماغي ليه ؟! .. أنا كمان موافقة .. شوف إنت عايز تيجي إمتي تاني .. و أنا دايسة ..

( كاليماكو ) بيطلّع برّة الأوضة .. بيلاقي ( نيسيا ) قاعد مع ( ليجوريو ) ..

( نيسيا باشا ) بيسلّم علي كاليماكو بحرارة .. و بيحني له راسه كمان ..

و بعدين بيسأل ( ليجوريو ) : كده تمام ؟!

ليجوريو بيشرح : إحنا مش عارفين مفعول وصفة ( بيض الجن ) حيحصل إمتي و إزاي ؟! .. فعشان نكون في الأمان .. حنحتاج إن ( كاليماكو ) يفضل يزور ( لوكريتيزيا ) كل أسبوع ..

( نيسيا بيه ) بيترجّي ( كاليماكو ) إنه يوافق ..

كاليماكو بيوافق بعد ضغط .. و بيقول إنه بيعمل كده بس عشان هو إستجدع ( نيسيا باشا ) .. و حس إنه راجل طيب و يستاهل كل خير .

و بيأكّد عليه بس .. إنه يبقي يزود الجمبري في عزومة الأسبوع اللي جاي 🤣🤣🤣

القصة اللي فاتت دي .. إسمها ( the mandrake - la mandragola - بيض الجن 🤣 ) ..

و اللي كتبها هو :

نيكولو ماكيافيللي .. سنة 1518

أيونننننن.. ماكيافيللي اللي أشهر جٌملة عنه هي : الغاية تٌبرر الوسيلة .

القصة دي .. مؤلمة جداً .. مؤلمة للغاية .. خصووووووووصاً لما تعرف قصة حياة اللي كاتبها نفسه ..

في القصة :

لوكريتزيا هنا .. بترمز ل ( فلورنس ) .. المدينة اللي إتولد فيها ماكيافيللي .. و عاش طول حياته في خدمة ترابها حرفياً ..

لوكريتيزيا مش مٌجرّد بنت أو جميلة الجميلات .. و لكن هي ( قوة حكم فلورنس ) .. هي ( ثقة شعب فلورنس ) .. هي .. فلورنس نفسها .

نيسيا باشا ... بيرمٌز ل ( الأرستقراطية ) الرخيييييييييصة أوي .. الحقيرة أوي .. اللي كل اللي بيفرق معاهم بس هو سٌمعة و مظهر قٌدّام الناس .. و فمقابل ده .. بفلوسهم و علاقاتهم .. بيعملوا كل الموبقات الممكنة في الحياة .. و لكنهم لسة قٌدّام الناس كلها هما : زوج لوكريتزيا .

كاليماكو ... بيرمٌز ل ( الأمير ) .. لل ( برنس ) .. اللي هو إسم أشهر كتاب ألّفه ماكيافيللي بعد كده ( the prince ) .. و اللي فيه بيشرح بالتفصيل .. إزاي يقدر ( أمير ) بإنه يفوز ب ( لوكريتزيا ) .. يعني يفوز بالحكم و القوة .

ليجوريو .. هو ماكيافيللي ذات نفسه ..

هو اللي بعقله و ذكاءه و دهاءه .. قدر يلبّس ( الأرستقراطية ) العمة ..

هو اللي بيعرف يتحكم في الأمير ..

هو اللي كان يقدر يحصل علي ( لوكريتزيا ) لو كان ده مزاجه .. و لكنه إستمتاعه أكبر من كده بكتييييييييييييير .

و القصة نفسها عبارة عن : رثاء كوميدي ..

رثاء ل حال مجتمع .. بيقبل بكل الجنون ده .. و يحتفل بيه ..

و البوست ده ( قصة بيض الجن ) .. باعتبرها هي أفضل طريقة أبدأ بيها حكاية ( ماكيافيللي ) نفسه ..

و أشرح :

- قال إيه عن مارتين لوثر .. ف نكمّل بيها قصة مارتين لوثر ..

- عمل إيه مع ليوناردو دافنشي .. ف نكمّل بيها قصة دافنشي و عصر النهضة.

- قال إيه في أشهر كتبه ( البرنس ) .. فنتكلم عن الكبدة 🤣

- و حاجات تانية كتييييييير ..

لكن أهمها يمكن هو :

هل ماكيافيللي كان : شرير ؟! .. ولّا واقعي ؟! .

و الله أعلم .

** الصورة ل نبات ( بيض الجن ) .. و في صور أبشع علي جوجل 😅

تمّ القيد 17

ردود إسلام في التعليقات

ما كتبه إسلام تحت هذا المنشور، مع التعليق الذي ردّ عليه.

  1. عبير ابوالعلا

    عبير ابوالعلا

    كل مرة بتبهرنى بالبوستات دى

    إسلام أسامه الجويلي

    عبير ابوالعلا ☺️☺️

  2. اسكندارينو اصيليانو 2 تفاعل

    انت عبقري ما شاء الله عليك وخفة دمك في توصيل المعلومة رهيبة ما شاء الله عليك انا حبيتك لله في لله انت برنس بس في الخير بفضل الله ربنا يديم عليك كل خير يارب مش برنس زي الشرير ميكافيلي خالص اعزك الله ونفع بك وزادك من كل ما يقربك منه سبحانه وتعالي ويرضاه

    إسلام أسامه الجويلي 1 تفاعل

    اسكندارينو اصيليانو ☺️☺️

    اسكندارينو اصيليانو

    Eslam Osama El-Gwaily 💚💚

  3. NOo Nour 2 تفاعل

    مش هو دا ال نبات الخرافي لو اي حد يقطفه بيصرخ وصراخه يموت كل اللي يسمعوه 🙃

    إسلام أسامه الجويلي

    Noo Raa

    دي أحد الأساطير المقترنة بيه فعلاً .. و لكنها مش حقيقية إطلاقاً ( في حدود معلوماتي 😅 ) .

    NOo Nour

    Eslam Osama El-Gwaily انا شفت صورته هو وبقه معوووج قلت اكيد هو نبات اللي بيصرخ هو ليه كذا اسم تاني

تعليقات القرّاء

17 تعليقاً على فيسبوك، كما تظهر هناك للعامة.

كل التعليقات المحفوظة (17)
  1. Dina Abdallah

    تم

  2. Dina Abdallah

    مرفق مع التعليق: صورة

  3. Hesham Abdelkawy

    تم

  4. Amany Ezzeldin 2 تفاعل

    مرفق مع التعليق: صورة

  5. عبير ابوالعلا

    عبير ابوالعلا

    كل مرة بتبهرنى بالبوستات دى

    إسلام أسامه الجويلي

    عبير ابوالعلا ☺️☺️

  6. اسكندارينو اصيليانو 2 تفاعل

    انت عبقري ما شاء الله عليك وخفة دمك في توصيل المعلومة رهيبة ما شاء الله عليك انا حبيتك لله في لله انت برنس بس في الخير بفضل الله ربنا يديم عليك كل خير يارب مش برنس زي الشرير ميكافيلي خالص اعزك الله ونفع بك وزادك من كل ما يقربك منه سبحانه وتعالي ويرضاه

    إسلام أسامه الجويلي 1 تفاعل

    اسكندارينو اصيليانو ☺️☺️

    اسكندارينو اصيليانو

    Eslam Osama El-Gwaily 💚💚

  7. اسكندارينو اصيليانو

    مرفق مع التعليق: صورة

  8. Morgana Morgan 1 تفاعل

    الدنيا مليانه بلاوى منذ قديم الاذل

  9. NOo Nour 2 تفاعل

    مش هو دا ال نبات الخرافي لو اي حد يقطفه بيصرخ وصراخه يموت كل اللي يسمعوه 🙃

    إسلام أسامه الجويلي

    Noo Raa

    دي أحد الأساطير المقترنة بيه فعلاً .. و لكنها مش حقيقية إطلاقاً ( في حدود معلوماتي 😅 ) .

    NOo Nour

    Eslam Osama El-Gwaily انا شفت صورته هو وبقه معوووج قلت اكيد هو نبات اللي بيصرخ هو ليه كذا اسم تاني

  10. محمد إبراهيم أبوشنادى

    ولحد وقتنا الحالي النساء بتروح للدجال يركبها وتحمل منه وهى متخدرة ، ومفكرة أنها حملت من زوجها ببركة سيدنا الولى