يا سيادة البطل المغوار

يا سيادة البطل المغوار .. ياللي دمك فار لما شفت راجل عجوز أشيب الشعر بينضرب بالقلم .. مرتين .. و أقسمت في البوستات و التعليقات ب كل غالي و نفيس لديك .. إنك لو كنت موجود في المشهد .. كنت كسرت إيد اللي ضرب بالقلم و ثأرت للعجوز الأشيب ..
إنت مصدق نفسك ؟! . … يا سيادة البطل المغوار .. ياللي علاقتك بالجيم و التمرين .. نفس علاقة البنت ب مرايتها و مكياجها .. و أغلب أهدافك من التواجد في الجيم .. هو صورة ب فلتر علي إنستاجرام .. إنت مصدق نفسك ؟! … يا سيادة البطل المغوار .. ياللي أغلب معلوماتك عن الشجاعة و الإقدام و الفروسية .. طالعة من أغاني مهرجانات و أفلام بلطجة و مسلسلات شبحنة .. إنت مصدق نفسك ؟! … يا سيادة البطل المغوار .. آخر مرة كنت بطل و دافعت عن حد فيها … كان إمتي ؟! .. هل دافعت عن الناس من نفسك و منعت عنهم شرّك ؟! … و الأهم .. هل دافعت عن نفسك .. و منعت عنها ظلمك لنفسك ؟! إنت مصدق نفسك ؟! … يا سيادة البطل المغوار .. لو عايز تمارس بطولتك .. إنت مش محتاج تستني لحد ما تشوف حد عجوز أشيب بينضرب بالقلم قٌدّامك .. مرتين .. لو عايز تمارس بطولتك .. إبتدي بإنك تبص في المراية .. حتشوف ضعف جوة نفسك كل يوم بيضربك ألف قلم .. و إنت بتعمل نفسك مش واخد بالك .. و بتنكّت .. و بتضحك .. و بتهزّر .. و بتبرر .. إنت مصدق نفسك ؟! … يا سيادة البطل المغوار .. ياللي دمك فار .. كويس إنه فار .. ده معناه إنك لسة عندك دم .. إستغل الفرصة كده و هو فاير .. و إنزل إتمرن و إستعد لل قلم اللي جاي ( لأنه جاي ) … ذاكر و إجهز للقلم اللي جاي ( لأنه جاي ) .. و إفهم كويس جداً .. جداً .. إن اللي جوة دماغك و قلبك .. أهم ألف مرة من اللي فعضلاتك . و إلا … و إلا ممكن تلاقي نفسك إنت المرة اللي جاية اللي بتتصور .. بس مش ك بطل .. و لكن ك ظالم .. و مظلوم . … يا سيادة البطل المغوار .. ياللي دمك فار .. البطولة مش في البوستات و التعليقات .. البطولة في إنك تمنع ظلم .. و أكتر حد غالباً إنت ظالمه .. هو نفسك .. و لو تظن إن مافيش في إيدك حاجة تعملها للعجوز الأشيب .. فإنت فإيدك كل حاجة تعملها ل نفسك . … و الله أعلم .