الريفيو المعدل رقم (2) ... + ترشيح شديد اللهجة

الريفيو المعدل رقم (2) … + ترشيح شديد اللهجة .. :

أنا حالياً فى الفصل 24 فى المانجا .. ” و شكلي كده حاوصل لآخر شابتر نزل النهاردة أو بكرة بالكتير” . فى الأول كنت ممكن أرشح الأنيمي و ده و المانجا بتاعته عشان مليانين كلام علوم و فيزيا و كيميا مكتوب بطريقة نضيفة و كده و بس .. لكن دلوقتي واضح إن اللى شغالين علي المانجا دي ” لسة ماعملتش ريسيرش أو ركزت فهما مين أساساً ” .. فاهمين شغلهم علي أقصي حد ..

• الرسم بتاع المانجا من أنضف أنواع الرسم اللي شفتهم ( مش أعلاهم مستوي - بس فعلاً يقترب ) .
• البناء الدرامي و القصصي معمول بمعلمة و مزاج .. اللى هو مش هات يابني دكتور من علوم دماغه نضيفه و خليه يكتب قصة تحبب الناس فى العلوم … لا .. ده شغل ناس فاهمة إزاي تطبخ قصة و تتبلها صح و علي نار هادية .. ولا هما مستعجلين و بيحرقوا القعر .. و ولا هما مملين و سايبينها تستوي علي نار سبرتاية مثلاً … لا .. ده شغل طباخين محترفين .
• المادة العلمية اللى فى المانجا و الأنيمي ده خلاها توصل خلال الأيام البسيطة اللى عرفتها فيها إني أعتبرها ( قراءة و مشاهدة أساسية لأي حد بيسألني علي أى حاجة ليها علاقة بأى حاجة ) . اللى هو حتي لو قابلتي فى الشارع و إنت ماتعرفنيش … و سألتني مثلاً ” أروح المكان الفلاني إزاي ؟ ” .. حاجاوبك : ” إتفرج علي أنيمي dr stone .. و بعدين إقرا المانجا بتاعته .. و بعدين خد أول طوالي معاك و إحود لمين مثلاً ” . … اللينك اللى تقدر تنزل منه الحلقتين اللى نزلوا لحد دلوقتي فى الكومنت الأولاني : لو مابتعرفش تستخدم التورنت عشان تنزلهم … سيرش يوتيوب علي إزاي . … اللينك اللى تقدر تقرا منه المانجا فى الكومنت التاني .. ( المانجا دي بالمناسبة حل أكتر من سحري لأي حد بيسألني إزاى يتعلم إنجليزي … عايز تتعلم إنجليزي ؟ .. إقرا مانجا dr stone ) .