بالرغم من اللى عملته رمضان اللى فات .. إلا إنى

بالرغم من اللى عملته رمضان اللى فات .. إلا إنى لسة عايش :

هو بوست باكتب واحد مشابه ليه كل رمضان .. بس ده مايمنعش إنى أكتبه كمان مرة :

• تصدق بالله يا جدع ماشفتش أى نوع من أنواع رامز لحد دلوقتى ؟!! .. لا جوة البحر ولا فى الجو ولا تحت الغطا ولا أى رامز من اللى طلعوا بقالهم كذا رمضان تقريباً ..
• طب تصدق بالله كمان مرة إنى ماشفتش أى مسلسل من اللى كسروا الدنيا بقالهم كذا رمضان ؟!! .. ده لو الدنيا عندك معناها الأوضة و الصالة اللى إسمها مصر يعنى .. و أحياناً بتتفتح على شوية بلاد تانية و بيبقى إسمهم وطن عربى ..
• تصدق بالله ده الرمضان ال 16 بالنسبالى اللى باقضيه من غير تيليفزيون .. هو أنا أساساً ماعنديش تيليفزيون فشقتى بقالى 16 سنة .. عندى 4 شاشات .. و جهازين كمبيوتر .. و شبكتين إنترنت .. بس ماعنديش تيليفزيون .
• تصدق بالله كل مابيتفتح قدامى أى حوار أو كلام و الناس تستخدم إفيه من مسلسل أو جملة من إعلان .. او يتكلموا على أى عبط من اللى بيتعرض فى التيليفزيون .. مابحسش بنقص خااااالص .. بل بابقى فرحان إنى مش عارف هما بيتكلموا على إيه ..
• بس خلينى أوضحلك نقطة كمان .. أنا متابع كل المسلسلات اللى فعلاً مكسرة “الدنيا” بقى .. greys, tbb , the young pope , house of cards , GOT ,… تقريباً عايش على نتفليكس و أمازون و سي بي إس ..
• خلينى أوضحلك كمان إنى باتفرج على أفلام و مسلسلات أنيمى كتييييييييير .. … YOU ARE WHAT YOU EAT يعنى لو حتاكل حاجة .. حتتغذى منها و حتبقى صفاتك منها .. فلو حتتفرج على مسلسلات و برامج مصرى و عربى .. حتفضل طول عمرك مواطن عالم تالت .. و رابع كمان .. إنسان دماغه مكونة من ثقافات لا تسمن و لا تغنى من جوع .. … لكن لو قررت إن العملة الأهم فأملاكك .. و هى الوقت .. تستغلها كويس .. و تبدأ تستنضف اللى بتشوفه و اللى بتتابعه و اللى بتاكله … ساعتها حتبقى مواطن عالم أول .. فاهم العالم بيتكلم فإيه و ثقافته إيه .. … لو عايز تستغل ثقافتك دى بقى عشان تشتغل … حتشتغل بأسهل ما يكون .. تسافر ؟ … بأسهل ما يكون .. تستمتع ؟ .. بأسهل ما يكون .. … … إستنضف اللى بتشوفه بالله عليك .. و جرب .. جرب تستمتع لما الناس تسألك بكل تعجب .. إنت كنت مسافر الكام سنة اللى فاتوا ؟!!! .. إزاى ماتعرفش فلان أو كذا ؟!!!