نيوزفيدك ... ولامؤاخذة

نيوزفيدك … ولامؤاخذة:

(( الفيسبوك أو اليوتيوب يسجل نشاطك .. و على حسب بتقضى وقتك عليهم بتعمل إيه .. يروح مديلك من اللى إنت مقضى وقتك فيه زيادة .. يعنى لو دايماً بتشوف كورة عاليوتيوب .. منين ما تفتح حتلاقى الجديد فعالم الكورة .. و الفيديوهات المقترحة دايماً حايكون فيها كورة .. و هكذا )) … بالرغم من إن الموضوع ليه عيوب كتير .. بس أحد أكبر مزايا الموضوع ده هو التمثيل المباشر لكيفية تكوينك لأفكارك و العالم المحيط بسيادتك . … و قد إيه بيأثر الفيديو الصغنن التافه اللى بتفك بيه عن نفسك و مش حيضر و مش هو ده اللى حيخليك تافه أو سطحى فبتفتحه و تتفرج عليه … بيأثر عليك بشكل ضخم لأنه بيأثر فنسبة التفاهة اللى بتتعرض عليك .. و بالتالى المحتوى الكلى اللى إنت بتختار منه . … يعنى لما تقف قدام محل الفكهانى و إنت قدامك 10 أقفاص فواكه مختلفة .. فيديلك جوافاية تاكلها مثلاً .. فتقعد تتمزج فيها و تاكلها بإستمتاع قدامه .. فعشان هو عايز يبيع أكتر … المرة الجاية حتلاقى 3 أقفاص من ال10 بقوا جوافة … و مش حتفتكر أساساً أو تعرف هو شال إيه عشان يحط الجوافة دى قدامك … و هكذا . … عقلك بالمناسبة بيشتغل بنفس الطريقة بالظبط … الموسيقى بيكون مركز مع الموسيقى أكتر .. الصحفى بيركز مع الأخبار .. الجيمر اللى زيي مثلاً دايماً بيقف قدام المحل اللى بيلعبوا جواه ليج أو ليجيندز و يسأل نفسه هو شالها ليه :( :( :( . … حتى الخبر اللى بتقف قدامه فنيوز فيدك .. و ماتضغطش عليه بس بتقف تتفرج شوية .. الفيس بياخد باله و يعرف إنك عايز تضغط بس يمكن مكسوف ولا حاجة .. فيزودلك منه بعد كده .. و هكذا . Yes , it records your scrolling speed … بافتكر الكلام ده كل مرة حد يتكلم فحاجة قدامى ليها علاقة بالتعليم اللى خارج التصنيف أو التيليفزيون و السينما اللى أساساً عمرهم ما دخلوا ولا حيدخلوا تصنيف .. أو السياسة اللى ملهاش أى تلاتين أهمية فحياتك .. أو الكورة أو أو أو … و بكل لا مبالاة و نظرة خاوية أرد عليه إنى مش عارف هو بيتكلم عن إيه . … من 7 سنين بالظبط .. أول ما بدأ الفيس و اليوتيوب و الإنترنت عموماً يكون personified .. و أنا باخلى بالى من نيوزفيدى .. و أنضفه أول بأول . .. فبالتالى الفكهانى بدأ يجيب من الأقفاص اللى فيها حاجات نضيفة .. حاجات نضيفة جداً .. جداً