بما إنى مؤخراً "و تحت إلحاح والله " بدأت أفكر

بما إنى مؤخراً “و تحت إلحاح والله ” بدأت أفكر فإنى أهتم شوية بالتريندات نوعاً ما و أتفاعل معها لما يسببه هذا من flourishing لشغلى و الشركات اللى باشتغل معاها و فيها .. تحت ما يسمى بال personal branding .. فها هو ذا تفاعلى مع : عيد الأم .

الفضل لله سبحانه و تعالى طبعاً و أولاً .. لكن لو فى شخص ما هو المسبب لأى شىء أنا فيه حالياً بالإيجاب .. فبكل تأكيد الشخص ده هو (أمى) .. ربنا يحميها و يحفظها و يسعدها و لو حيكون ده فنقط يبقى كالتالى : 1- أنا طفل متعب جداً مابيبطلش أسئلة فأى مجال .. عمرى ما أفتكر إنها فأى مرة قالتلى (أسكت بقى بطل أسئلة ) . 2- كل و أساس أى شغل من شغلى رياضة و معادلات .. و لحد النهاردة بافتكر أساسيات الرياضة اللى فضلت هى تعلمهانى بدون مدرس خصوصى لحد أولى إعدادى . 3- علمتنا الشطرنج من أولى إبتدائى . 4- علمتنا المنطق من أولى حضانة أو قبل كده كمان . 5- مبادئ علم الإدارة اللى إتعملتها فحياتى و قريتها فى الكتب .. هى زرعتها فينا من و إحنا أطفال . 6- كنا بناكل الجزر عشان البيتا كاروتين , و الخضار عشان الكولاجين , و الفواكه عشان الفيتامين سي , و البقوليات عشان البروتين .. و كنا فاهمين الكلام و المصطلحات دى من أولى إبتدائى . 7- كنت باكسر كل لعبى .. عمرها ما زعقتلى هى و بابا . 8- كنت بالح عشان أجيب لعب جديدة .. كانوا بيقولولى روح صلح اللعب اللى كسرتها . 9- 90% من أسباب إنى مهندس حالياً .. طالعين من كرتونة اللعب المكسرة دى . 10 - عمرنا ما شفنا بابا و ماما بيتخانقوا .. مش لأنهم ماكانوش بيتخانقوا .. لأنهم ماكانوش بيتخانقوا قدامنا . 11- كانت بتناقشنا فكل كلمة بنقراها بشغف .. و بإهتمام .. فحببيتنا نقرا أكتر . 12- فضلت تعلمنا لحد ما كبرنا بقت بتناقشنا فى اللى عرفناه جديد عشان تتعلم مننا . 13- علمت نفسها التكنولوجيا و الفيسبوك عشان تفهم عالمنا و ماتفضلش تشتكى إننا عايشين فعالم منفصل عنها . 14- آخر مرة عملت فيها IQ test .. و فرحت إنى جبت نتيجة عالية فحت و هييييييييييه بقى .. خلتها تاخده جابت أعلى منى ب 5 درجات … ال 14 نقطة دول مجرد نقطة لا تذكر .. فمحيط الحاجات اللى ممكن أكتبها ..