شوية كلام ملهومش أى لازمة غير جوة عقلى .. شوف

شوية كلام ملهومش أى لازمة غير جوة عقلى .. شوف لو يركبوا عندك إنت كمان فحاجة : النهاردة الصبح كنت فى سوق الجمعة فى إسكندرية .. اللى مايعرفش إيه هو سوق الجمعة .. هو عبارة عن مكان ممكن تشترى فيه أى حاجة “أىىىى حاجة ” من أى حد .. من “أىىى حد ” . بقالى سنين حرفياً بافكر أروح بس بكسل .. و شاء الرحمن إنى أروح بشكل مش مترتبله إطلاقاً النهاردة الصبح . حاجات كتير .. أوى .. ممكن أكتبها عن المكان .. بس الأولوية بتروح للفكرة التالية . كل قطعة من ملايين القطع اللى موجودة هناك ممكن تشوفها بأكتر من وجهة نظر :

• وجهة نظر المهندس “الميث باسترى ” .. و هى إنك ماتبصش على القطعة كانت مستخدمة قبل كده فإيه .. لا .. بص إنت ممكن تعمل بيها إيه .. و ده بيحتاج إنك تكون بتفكر بشكل أوسع من مجرد حاجاتك البسيطة من مأكل و مشرب و ملبس .. يعنى تفكر بنفس أسلوب القر د اللى قرر إنه بدل ما يطلع الشجرة عشان يجيب الموز .. يعمل عصاية خطاف .. و يجيب الموز و هو عالأرض عادى .
• وجهة نظر المهندس “تعليم مصرى” .. و هى إنك لو مالقتش الجهاز قدامك كامل و شغال و متغلف و عليه التكت بتاعه + كتالوج بيشرح تستخدمه إزاى و ليه .. يبقى كأنك مشفتوش أساساً .
• وجهة نظر الفنان رهيف الحس … و هى إن كل جهاز أو قطعة أو لعبة هناك .. كانت فيوم من الأيام حلم لشخص ما .. و إنجاز لشخص ما .. و سبب سعادة شخص ما .. و قصص كتييير … و حالياً .. هى مجرد قطعة على فرشة شخص تانى خالص بتتباع ب5 جنيه الكيلو .
• وجهة نظر القناص المصرى الأصيل .. و هى إنك تكون أستاذ و تعرف تصطاد قطع إنت عارف قيمتها المادية ممكن توصل لكام .. بس ملهاش أى إستخدام عندك غير بغرض مبادلتها بقطع تانية و هكذا .. يعنى إحتمالية إنك تدخل السوق ده بجنيه واحد .. و تطلع بعشر تلاف .. موجودة جداً .. بس لو عندك الموهبة .
• وجهة نظر لعيب الشطرنج .. و هى إنك ترفع عينك من الفرش و تبطل تبص على الأجهزة و القطع و السلع .. و تبدأ تبص على الناس اللى بتبص على الفرش .. و تسيب الناس تتسوق فى السلع .. و تبدأ إنت تتسوق فى الناس .. و تشوف عينين كل واحد بتحكى قصة عاملة إزاى .. و يا ترى هو عسكرى ولا فيل ولا حصان ولا ملك .. و الأهم .. يا ترى هو بيلعب فجيشك .. ولا إنت اللى بتلعب فجيشه … . . بعد ما بتطلع من سوق الجمعة .. المفروض إنك تدرك إن فى سوق تانى أكبر .. و تبص حواليك .. تلاقى ناس محطوطة جنب بعضها على فرش .. بيتقلب فيهم لمين و شمال .. و بيتفاصل على سعرهم .. و بيتباعوا جملة و قطاعى .. .. و هكذا … . . #يخربيت_العمق_اللى_فكلامى_يا_جدع