الساعة الآن الرابعة إلا تلت فجراً

الساعة الآن الرابعة إلا تلت فجراً .. من ساعة طقت فدماغي أستريم بلايستيشن علي تويتش ( باعمل ده كتير بقالي أسبوعين ) .. لعبة ( Ratchet and clank : Rift Apart ) . و بمجرد ما بدأت الستريم .. بعد دقيقة تقريباً .. النت فصل عن البلايستيشن .. خليني أشرح لك إني مكتبي في الدور اللي تحت شقتي مباشرة .. و من يومين تقريباً ضمن شوية تحديثات .. كنت إشتريت كابلين لان .. كل واحد فيهم 30 متر .. عشان أوصل من الراوتر في شقتي .. لأجهزتي في مكتبي توصيل مباشر ( عشان الوايفاي ماينفعش يتم الإعتماد عليه في العالم بتاعي ) . .. المهم .. إني لما موضوع الفصل بتاع النت ده حصل مرتين .. رحت مبدل سلك النت اللي واصل للابي .. بسلك نت البلايستيشن … و بعد ما خلصت ساعة ستريم علي تويتش (حتلاقي لينك قناتي دي فأول كومنت لو عايز تلقي نظرة ) .. سميت الله .. و بعد فحص سريع للسلك اللي باظ .. عرفت إن إحتمال كبير يكون في مشكلة في ال (RJ ) .. اللي هو حتة البلاستكة اللي فآخر السلك دي ( لو إنت مش عارف يعني إيه rj ) . … المهم .. الكلام ده كان لسة من 10 دقايق .. رحت رايح فاتح دولاب العدد بتاعي .. و طلعت ال ( آراجة ) .. اللي هي الآداة اللي في الصورة دي .. … الآداة دي أنا إشتريتها سنة 2009 .. و من سنة 2009 .. لحد النهاردة .. إستخدمتها بالعدد تقريباً 8 مرات .. هي وظيفتها حاجة واحدة بس .. هي ( تأريج سلك النت ) .. يعني تركيب حتة البلاستكة اللي في آخر السلك .. في آخر السلك . … كل مرة إحتجت الآداة دي فيها خلال ال14 سنة اللي فاتوا دول .. أفكاري عدت بنفس التسلسل .. 1- يا رب أكون حاطتها في مكانها .. و بنسبة كبيرة بتكون في مكانها .. لأنها .. و بالرغم من إني باستخدمها مرة واحدة كل سنة أو إتنين تقريباً .. إلا إني مدرك جداً اهميتها .. من غيرها .. تحتاس حرفياً لحد ما تلاقي حد تستلفها منه ..

2- يا رب أكون شاري (أرجيهات ) كفاية .. و هنا أشارك معاكم سر حياة عندي ( و عند كل اللي زيي ) .. و هو إننا بنشتري حاجات كتير أحياناً فوق البيعة .. فقط للحظات زي دي .. يعني .. أنا عمري ما أتذكر إني إحتجت أرجيهات .. فنزلت أشتري .. لا .. أنا لما باروح أشتري أى شيء من عند كهربائي .. باخد ب 5 جنيه مثلاً شوية حاجات فوق البيعة ..

• أرجيهات ..
• بنات دش و ريسيفر ..
• أى مشتركات أشوفه قدامي .. فيشة ثلاثية ..
• و هكذا .. … ببساطة … دولاب العدد بتاعي .. مؤهل جداً جداً للطوارئ دي دائماً . … … و لكن .. و هنا الفكرة بتاعت البوست .. الحمل ده من الادوات و العدد و القطع الكهربائية و الميكانيكية .. حمل عجيب جداً .. باشيله معايا من شقة ل شقة .. من مكتب ل مكتب .. من دولاب لدولاب .. فقط عشان لحظة طوارئ .. … و ما أدراك عن لحظات الطوارئ دي .. … من أسبوعين كنت باركب شاشة لأخويا .. هيلتي .. موجود طبعاً .. مسمار ناقص .. موجود .. كابلات ناقصة .. موجودة .. قطعة مالهاش ملامح بس باظت .. موجود بديل لها .. … … و كلها بتبقي حاجات محتفظ بيها من سنين و سنين .. فقط علي أمل إن ييجي لحظة إحتياج لها .. و لما بتيجي اللحظة دي .. باحس بشعور ال ( هييييييييييييييييحححححح .. أنا صح .. أنا صح ) .. و إني مش مخزّن كراكيب عالفاضي 😅 .. … … … أعتقد والله أعلم إني باتعامل مع عقلي بنفس الطريقة من سنين طويلة .. كم ضخم جداً من الأفكار و المعلومات و السيناريوهات مخزنه و بالاقي نفسي بانقله معايا طول الوقت .. من تجربة لتجربة … و من قناعة لقناعة .. .. طول الوقت مستعد إني أتسأل سؤال لولبي حلزوني مالوش بداية ولا نهاية .. و متخيل الطريقة و الأسلوب و الفكرة و التسلسل اللي حارد بيهم .. .. الحمل بيبقي تقيل .. متعب .. مرهق .. جداً .. و أحياناً .. أبسط الأفكار بتتوه وسط كراكيب الأفكار التانية دي .. و لكن .. .. و لكن أحياناً كتير .. بتبقي الساعة 3.30 فجراً .. و لأى سبب .. يتعرض علي عقلي فكرة أو سؤال معين .. لو ماكنش عندي إجابة مباشرة عليه أو حتي أسلوب إجابة عارف أفكر بيه .. كان زمان عقلي بقي زي ناس كتير لما بتتعرض لنفس الموقف .. .. بيعطلوا .. .. المصيبة إنهم مش بيعطلوا و شكراً و خلاص .. لا .. هما بيعطلوا … و بيعيشوا حياتهم بعد كده كلها مصدقين إن السؤال ده مالوش إجابة .. أو إن المسمار ده مالوش مفك .. أو إن الشغلانة دي محتاجة صنايعي .. .. و الموضوع بيكون بسيييييييييييييط جداً أبسط من كل التعقيد ده .. كل ما في الأمر بس هو إن فوقت من الأوقات .. كسلت تعرف الحاجات البسيطة و الأساسيات … و النتيجة هي .. إنك بتعطل بسهولة مع أول سلك يتقطع لك … .. إجابات كتييييييييير علي أسئلة محورية في العقيدة .. بيحتاجها الإنسان مرة أو مرتين في حياته بالكامل .. و لكن .. عشان لما تيجي المرة أو المرتين دول .. تعرف تتصرف صح .. لازم طول الوقت تكون شايل الحمل و الرسالة و محافظ عليهم .. .. متعبين ؟ .. طبعاً .. مرهقين ؟ .. جداً .. بس من غيرهم .. بتكون سهل جداً .. تعطل … و الله أعلم .