منطق إبليس

منطق إبليس … إيه منطق اللى قتل 17 طفل فأمريكا .. ؟!

ما لم تكون عايش فعالم منعزل بالكامل عن الأخبار العالمية .. أو متابع بس لقنوات الهرى العربى و المصرى .. فبالتأكيد حاتكون سمعت عن اللى حصل فباركلاند بولاية فلوريدا فأمريكا .. .. طفل عنده 19 سنة .. دخل بالبندقية الآلية بتاعته على مدرسة .. و قتل 17 طفل .. خلال 6 دقائق ..

الموضوع ده حصل من أسبوع بالظبط .. و خلال الأسبوع ده تم إعادة فتح ملف من أكتر الملفات عدم منطقية فتاريخ الولايات المتحدة الأمريكية .. و هو ملف البند التانى فى الدستور الأمريكى .. و اللى بيكفل حق حمل السلاح لأى شخص تخطى سن ال18 سنة . .. سبب عدم منطقية الملف ده .. هو إن أكبر داعم ليه فى امريكا و العالم .. هما ناس إسمهم NRA .. أو ناشيونال رايفل أسوسييشن .. يعنى رابطة السلاح الوطنية … و دول من أكبر الجهات المؤثرة فسياسة أمريكا … و أغناهم .. و ببساطة هما … تجار سلاح . تجارة السلاح بالمناسبة من أكبر 5 تجارات مربحة فى العالم .. إن لم تكن أكبرهم لأن الجانب الخفى منها لا يعلمه إلا شياطين العالم ده حرفياً . .. فى معلومات كتير ممكن أكتبها عن الموضوع ده .. و لكنك ببحث سريع على جوجل حتحصل عليها من مصادر موثوقة أكتر منى .

اللى خلانى أكتب البوست ده دلوقتى .. هو إنى على مدار الأسبوع اللى فات و أنا باتابع أخبار الموضوع .. فكرة معينة فضلت تدور فدماغى من أول مرة سمعت عن الخبر لما حصل بعد حدوثة بساعات تقريباً . و هى فكرة : إيه اللى كان بيدور فعقل الكائن ده ؟! الشخص اللى قرر يقتل … بالتأكيد ماكانش ناوى على 17 بالظبط .. و لكنه كان عايز يقتل .. كتير . المنطق اللى كان بيدور فذهنه إيه ؟!

على مدار السنين اللى فاتت شفت مسلسلات و أفلام و قريت كتير عن عقليات المجرمين بمختلف أنواعهم .. و كتير كنت باتخيل .. لو وقفت قدام أى واحد من العقليات دى .. هل حاقدر إنى أوصل لأرض مشتركة بين منطقى و منطقه .. و نتكلم و إحنا الإتنين على الأرض المشتركة دى ؟ … على مدار سنين عمرى البسيطة .. حاولت أعمل ده أكتر من مرة .. أشخاص كتير مؤذيين .. تسببوا فأذى ليا شخصياً أو لناس قريبين منى .. أو لناس ماعرفهمش .. حاولت إنى أتكلم معاهم .. أفهم منطقهم .. دوافعهم .. … أتذكر شخص ما ظالم وصل بيه الأمر إنه تسبب فرفع مسدس على والدى .. إنى و أنا باكلمه قال بكل بساطة ” إنتوا جيتوا على قوتى .. و اللى ييجى على قوتى .. يا ناوى موتى ” . مع إنه هو كان الظالم و المتسبب فى الأذى من الأساس .. لكنى عمرى ما أنسى إنه كان فعلاً مقتنع إنه على حق .. .. أتذكر شخص ما فى الجيش .. كان بيتفاخر بإرتكابه معاصى جسيمة .. و لكنه كان دايماً بيحاول يلتزم بالصلاة معانا .. سألته فمرة .. إزاى ؟ .. إزاى الإتنين مع بعض ؟ .. رد ببساطة : ” يا أخى .. ربك غفور رحيم ” . … أتذكر شخص تانى فى الجيش .. كان بيتوعدنى بالأذية .. لأنى بشكل ما تسببت فإن صديق له يتعاقب بدون قصد منى .. رحت له فمكان فاضى .. و وقفت معاه و أنا متأكد إنه غير قادر على أذيتى جسدياً لأن وزنه تقريباً ربع وزنى .. و غالباً كان عنده السل . و سألته : ” ممكن تحاول تتكلم معايا و توضحلى موقفك .. و ححاول أوضحلك موقفى ” رفض بكل الأشكال إنه يسمعنى أو يتكلم معايا .. و فضل يحاول يهرب و يمشى و يبعد .. و يهددنى إنه لدغته بالقبر . فضلت أحاول أوصل لمنطقه .. لكنه فضل طول فترة الجيش بتاعى تقريباً كارهنى بشدة .. و ده كان لغز بالنسبالى . … برضو خلال الجيش قابلت شخص قتل شخصين كانوا بيحاولوا يسرقوا سلاحه .. ولد جامعى زيي بالظبط .. قتل شخصين .. عمره ما شافهم قبل اليوم اللى قتلهم فيه .. و مايعرفش حتى إسمهم .. و كان بيتكلم معايا ببساطة فى الميس عن تفاصيل السبب ده و إنه عشانه بيتعامل معاملة خاصة ..

خلال حياتى قابلت ناس كتير ممكن يتم تصنيفهم على إنهم سيئين .. قريت كتير عن تفاصيل عقليات القتلة المتسلسلين .. و لقيت إن فى ناس أعلم منى بسنين و أميال فى علم النفس و العلوم البشرية و العقلية .. غاصوا جوا عوالم القتلة و المجرمين دول .. بدون برضو ما يقدروا ينوروا كل الأجزاء المظلمة فى ألغاز عقولهم . … … ماعتقدش إطلاقاً إنى عندى أى قدرة على إنهاء البوست ده بخلاصة معينة تحسسنى إنى قلت حاجة مفيدة فيه .. لكن فدماغى .. الأفكار دى كلها و أكتر .. مرتبطة ببعضها .. .. و الله أعلم .