فى العادة مابحبش أكتب بوستات من النوعية دى .. بس

فى العادة مابحبش أكتب بوستات من النوعية دى .. بس أعتقد إن البوست ده فيه كام إجابة على كام سؤال إتسألتهم كتير … أوى … أول مرة أمتلك جهاز كمبيوتر كنت فأولى ثانوى (2003) .. و فى الوقت ده كان كل تعاملى معاه إنى أطلب من أخويا الكبير يشغلهولى عشان ألعب فيفا 2002 :) :) :) .لأنه هو اللى كان أخد دورة وندوز 98 … تاريييييخ . . إستمر الوضع ده لمدة شهرين .. خلالهم بقيت باعرف أشغل الفيفا لوحدى :) :) . . بعد أربع شهور .. و مع بداية تانية ثانوي .. كنت رائد معمل الكمبيوتر فى المدرسة و مسئول عن تركيب و تصيين الأجهزة اللى فيه صيانة مبدئية … . و حققت أول ريكورد ليا ف mine sweeper- expert level تحت 200 ثانية .. كنت فرحان أوى . .

• إنى بدأت أستلم و أنفذ مشاريع للمدرسة تتعمل باوربوينت و وورد .. .

---

أول مرة جالى روبيك كيوب (مكعب سحرى) .. هدية كنت فتانية إبتدائى .. أول مرة حليت الروبيك كيوب و رجعته لوضعه الأساسى كنت فتانية كلية .. تالتة كلية بفضل الله عملت أبليكيشن صغنن عالماتلاب يحله … حالياً الريكورد بتاعى فحل روبيك كيوب من أى وضع لوضعه الأساسى .. تحت 5 دقايق ..

السبب إنى باكتب الحاجات دى إنى حالياً و بسبب إكستنشن (إمتداد) عجيب فى الكارير بتاعى .. بذاكر إخراج و مايا و ثرى دي س ماكس … ال dlls بتاعت الماكس 2017 مش متظبطة و مش راضى يشتغل زى ما أنا عايزه يشتغل . كل الريأكشن اللى عندى هو إبتسامة عريضة و نوستالجيا … كام مرة برنامج مارضيش يشتغل .. و فى الآخر إشتغل ؟ كام مرة كود مارضيش يران .. و فى الآخر ران ؟ كام مرة .. كام مرة ؟

السبب فى الثقة أو إحساس الإطمئنان النسبى ده .. هو نفس السبب اللى بيخليك لو إنت بتسوق عربيات بقالك 20 سنة تحس إنك مش قلقان و إنت قاعد ورا الدركسيون زى واحد لسة متعلم سواقة .. و المختلف فى زمننا الحالى عن أى زمن تانى .. هو إنك عندك جوجل .. اللى هو حرفياً ملكش حجة إنك تقول ماعرفش .. على أى حاجة .. سبب إنك ماتعرفش هو إنك مكسل تدور بنفسك .. و تتعلم بالتجربة و الخطأ إزاى تدور و تطلع نتايج صح … و بالتالى .. خلال فترة قليلة جداً .. تقدر إنت كمان تبقى سواق محنك

ناس كتير من اللى درستلهم أو إشتغلت معاهم أو … كرروا أسئلة فعلاً من نوعية .. إزاى بتعرف تشتغل على كل ده ؟ إزاى إتعلمت الإنجليزى مثلاً و بتتكلمه بسهولة ؟! إزاى بتقرا كتب 1000 صفحة و لسة عايش ؟ إزاى بتعرف المعلومات دى فى المجالات دى ؟

الإجابات على الأسئلة دى كلها فخطوتين : 1- إبتدى 2- كرر

آلاف الطرق و التكنيكس و الأساليب ممكن تلاقيها فكيفية تعليم أى بتنجان فأسرع وقت ممكن و … كل ده جميل .. لكن مايغنيش إن الأساسى هو إنك تبتدى … و تكرر الطرق على باب المسئلة لحد ما يتفتح و تتحل .. أو إنت تجمد لدرجة إنك تكسر (bruteforce) الباب .

و الله أعلم