زمااان أول مرة قفلت سوبر ماريو من غير شورت كاتتات

زمااان أول مرة قفلت سوبر ماريو من غير شورت كاتتات .. حسيت إنى عملت إنجاز لا يضاهيه شىء .. كنت فخامسة إبتدائى أيامها .. و لما رحت أتفاخر بده وسط زمايلى فى المدرسة .. إكتشفت إن نص الفصل تقريباً مقفلها خمس أو ست مرات قبل كده عند المحل اللى كانوا بيلعبوا فيه زوسر جنب المدرسة .. قلت مستحيل .. اللعبة خدت منى تقريباً سنة كاملة على ما حفظت كل مراحلها و خدعها و توقيتاتها .. يعنى أنا أقل من نص الفصل ؟!! . . إكتشفت بعد كده إن فى حاجة إسمها شورت كاتتات .. اللى هو تدخل فماسورة تعديك أربع أو تمن مراحل .. و هكذا … . حسيت بخداع كبير .. و قررت إنى لما أكبر حانتقم من كونامى … بس بعد كده لقيت إن فمسائل الهندسة مثلاً .. ممكن تحل مسئلة فعشرين سطر .. أو تعمل عمل يحلها فتلات سطور .. . أدمنت الشورت كاتس .. و أدركت إن تقريباً معظم إن لم يكن كل .. المهام اللى بنتعرضلها فحياتنا .. ليها شورت كاتس .. . بمسميات مختلفة .. من أول هاكنج زا سيستم .. لحد سبيد ريدنج عشان تقرا 10 روايات فوقت رواية واحدة .. أو ديليجيتنج زا تاسك .. أو إنك تغير نظام التاسك من الأساس .. . و أدركت إنك مهما كان فى السى فى بتاعك خبرة إنك لعبت الستة و تلاتين مرحلة بتوع سوبر ماريو .. بس قفلتها فسنة .. اللى قفلها فشهر بالشورت كاتس .. دايماً حيفضل هو الأول .. . بس ده يبقى غباء منك .. لأنك المفروض تاخد الشورت كات اللى أكبر من كده و هو إنك ماتلعبش أساساً فى لعبة تسيب غيرك يقيمك فيها .. إنت اللى بتقيم نفسك ففيلم حياتك لوحدك . . المهم إنى كل ما أقرا النيوز فيد أو الأر إس إس بتاعى .. أحس إن المفروض إنى أعرف البوست الشورت كات .. التويتة اللى مش حتكمل 100 حرف .. بس حيبقى فيهم الخلاصة لدرجة إن اللى يقراها يفهم .. يتغير .. يقرر .. ينفذ … بس بلاقى نفسى للأسف بفكر فمرحلة تجميع سكور لمجرد إنى أزود حياة .. بيزك جيميفيكيشن تريك .. كونامى ديد إت بيفور إت ووز كوول