الجاذبية

الجاذبية عارفين قوانينها كويس .. بس على حد علمى لحد النهاردة لسة فى تساؤلات ضخمة عن .. هى ليه موجودة من الأساس برضو على حد علمى الصغير .. إن فى أربع قوى أساسية فى الكون

• نووية ضعيفة
• نووية قوية
• جاذبية
• كهرومغناطيسية

فلنفرض “هايبوثيتيكالى” إن الأجسام المادية اللى حوالينا كلها فجأة أصبحت واعية .. و إن طاعتها لقوة الجاذبية أصبحت إختيار مش إجبار .. أو فى الحالة دى بقى طاعتها لأى قوة من القوى الأربعة أصبح إختيارى مش إجبارى .. فمثلاً مج الكابوتشينو الفاضى اللى قدامى دلوقتى .. قرر إنه زهق من كونه مج .. إنه مش سعيد .. إنه حر .. و قرر يلعب فأساسات جزيئاته .. و يبقى مقص هو كمان .. مزاجه بقى . .. و هكذا على بقيت الأجسام و أصبح محتم علينا نحن البشر التعايش مع إختيارات الأجسام دى مجرد فكرة إن نوع تانى من الكائنات يملك وعى غير الإنسان فى حد ذاتها فكرة صعبة التخيل .. لأن بالوعى هنا ماقصدش المشاعر و الأحاسيس .. الحيوانات و كمان النباتات عندها مشاعر .. أقصد وعى بالهدف .. و سبب الوجود .. و الإمكانيات .. … و الحدود . . الوعى يحتم الحصول على القدرة على الإختيار … و لكن لأى مدى يعطينا الحق فى إختبار الحدود ؟ . . و بفرض وصول الكائن الواعى للإمكانية الكاملة للتحكم حتى فى أدق جزيئاته … و تحدى القوى الأربعة الأساسية فى الكون … حيفضل كون ؟ . . ولا كل واحد حياخد جزيئاته و يعيش على هواه ؟ و هواه ده يبقى إيه ؟ . . أحد أهم مكونات الهوى .. هو الفضول .. الفضول هو الطاقة اللى بتدفع الإنسان للحركة .. إنه يفكر .. لأنه مستحيل علمياً إنه يتوقف عن التفكير .. و بالتالى بتدفعه دايماً لتحدى الحدود … و لكن لو عربيتك مثلاً .. كل جزء فيها قرر إنه ياخد بعضه و يمشى فمكان شكل .. إنت حتوصل لفين ؟ . عشان كده لازم تحط قواعد للعربية .. و تربطها بمسامير و سيور و قواعد و حدود مادية .. عشان توصل لمشوارك … . . طب هو إنت عاوز توصل من الأساس لفين ؟ إنت وجهتك إيه ؟ . أقف مكانك و فكر .. حتعطش .. و تبقى وجهتك إنك تشرب حتجوع … و تبقى وجهتك إنك تاكل و هكذا مع جميع غرائزك الجسدية … و بعدين الغرائز العقلية .. و بعدين الروحية … بس إنت مش لوحدك .. الأرض مليانة ناس .. مين اللى يحدد مين يعمل إيه ؟ . . و يحدد ليه؟ .. ما تسيب كل واحد يعمل اللى نفسه فيه .. لأن لو ده حصل .. نرجع للأول .. و هو إن كل جزء فعربيتك لو عمل اللى هو عايزه .. حتبوظ … و إنت جزء من الكون و الكون ليه هدف .. بس إنت الجزء الوحيد اللى واعى عنده إختيار لو طاع الكتالوج .. حيوصل و لو ماطاعش .. حيتحرك .. مش حيقف بس حيروح فين ؟ . . لازم ليه دستور و إلا .. الفوضى :) . . طب أنهى دستور ؟ دى قصة تانية بقى