لقطات للاسف بافتكرها دلوقتي
- العبد لله : لا ده ولا ده .. و ايه المشكلة لو كنت سلف او اخوان يعني ؟!
لقطات للاسف بافتكرها دلوقتي بحكم حياتي السنة اللي فاتت و شغلي و سفري و تخليص ورق جيشي اضطريت اني اركب عدد مهول من التاكسيات و التروسيكلات و الموتوسيكلات و التكاتك و المشاريع و التنايات و ولله العظيم بتاع تلات اربع عربيات كارو الحوار التالي اتكرر بصورة او بأخري عدد مهول ايضا من المرات
- السواق (سرسجي,بلطجي,حشاش, …) بيعاكس بنت او بيشرب سجاير او او
- العبد لله احاول انصحه -السواق يرد : انت شكلك محترم .. انت سلفي ولا اخوان ؟
- العبد لله : لا ده ولا ده .. و ايه المشكلة لو كنت سلف او اخوان يعني ؟!
- السواق : اصلكوا انتوا اللي جبتوا البلد ورا .. ما هي كانت ماشية زي الفل قبلكوا
- العبد لله : طب و ايه علاقة ده بأني اقللك ماتعاكسش فلانه او ماتشربش سجاير جنبي
- السواق : انا حر يا اخي ربنا هو اللي حيحاسبني مش انت .. و بعدين انت بتكدب ليه .. انت اخوان .. انت بتتكلم زيهم
- العبد لله : ايوا لو كنت اخوان يعني كنت حتعمل ايه يعني ؟
- السواق “بعنف” : لا انا مابركبش اخوان او سلف معايا
اقسم بالله الحوار ده اتكرر بكذا صورة اكتر من 10 مرات خلال السنة اللي فاتت
يحضرني قول صديقي عندما حكيتله الكلام ده
بسم الله الرحمن الرحيم “اخرجوا ال لوط من قريتكم انهم اناس يتطهرون”