هذا الاستيتس من موضوع تعبير كتبته ايام ثانوية عامة قبل

هذا الاستيتس من موضوع تعبير كتبته ايام ثانوية عامة قبل ما اي حد يزعل من اي حد الموضوع كان عن النت سلبياته و ايجابياته ماحدش يفهمني غلط عاشت التبت حرة مستقلة علي راي احمد خالد توفيق

احيانا بيانتبني شعور اننا عايشين فالارماجيدون … مجرد ما افتح الفيس “و ده بقي قليل جدا من شهر كده عشان مافيش نت ” بلاقي اخبار - بالنسبة للي بيفتح كل فين و فين زيي - اقل ما يقال عنها انها كارثية … و الاقي البشر بتهدم كل توقعاتي و تؤكد ان لسة في مستويات اعلي للغباء

و لكن … بمجرد ما افتح صفحة بيضة و اقرر اكتب وصيتي و خلاصة ال25 سنة اللي فاتوا اكتشف بعد تفكير بسيط ان احنا عايشين فهنا و سعادة بالنسبة لمعظم الفترات اللي عدت علي الارض

الفرق الوحيد هو ان انت عندك استطاعة تقرا الكلام ده و انت متغطي ببطانيتك علي سريرك الفرق الوحيد هو ان في نت

اتخيل كده لو ايام الحرب العالمية الاولي كان في نت او التانية

حتلاقي صفحات تؤيد الحلفاء .. و صفحات بتقول كلنا هتلر … و صفحات بتتريق علي عبط جوبلز ما هو جوبلز ماكانش حيقدر يسيطر علي الاعلام الا لو عزل المانيا بالكامل عن العالم و يبقي حاجة زي كوريا الشمالية دلوقتي كده و النتيجة ان كل الناس كانت حتعرف قد ايه الفكر الاري مهترئ

اتخيل لو ايام الدولة الرومانية كان في نت كان مئات الصفحات اللي بتؤيد اعدام بروتس طلعت و صفحات تانية عايزة تعدم قيصر

و العالم كله يظن انها النهاية

الانسان اللي رجله مشلولة مابيحسش لو انضرب فيها بالنار علي ما اعتقد بس الانسان السليم بيملي الدنيا صراخ بمجرد ما نموسة تقرصه فرجله

الفرق ما بين زمان و دلوقتي ان كل انسان عايش فبق التاني بمجرد ما يهمس العالم بيشتكي من علو صراخه

و النتيجة ان حساسية العالم زادت قوي

لدرجة ان قرصة نموسة بالنسبالها اصبحت زي طلق الرصاص و العكس بالعكس

الضرب بالنار اصبح زي قرص النموس

و بالتالي ظهر فئة ضخمة عندها استعداد انها تقنعك ان النموس بيقرصك فحين انك بتنضرب بالنار

انا فعلا خايف ان ييجي الوقت اللي نفتكر فيه ان رجلنا انقطعت بعد فوات الاوان