كنت باكره حفظ المعادلات

كنت باكره حفظ المعادلات ماعرفش كام طالب فهندسة قال الكلمتين دول .. يمكن كتير اوي .. بس انا فعلا كنت باكره حفظ المعادلات او عشان اكون صادق … انا مابعرفش احفظ معادلات اطلاقا من ايام ما كنت فابتدائي … انا مستعد اخترعلك لو عايز ..بس ماتقوليش احفظ المعادلة دي انا مهندس .. و تخصصي اتصالات .. يعني درست رياضة اكتر من اي مادة تانية و مع ذلك لحد يومنا هذا مش فاكر معادلة فك الجذر التربيعي انا حاولت كتيييييييييير و قريت كتب كتييير عن ازاي اقوي ذاكرتي .. و ازاي احفظ معادلات .. و درست تشريح مخ و علم نفس مافيش حاجة نفعت تقدر تقول انها لعنة المهم … اللعنة دي كلفتني كتير فكلية هندسة قسم اتصالات لان ده اكتر قسم فأكتر كلية انت محتاج تحفظ معادلات فيه … فامتحان سنة من السنين اللي عدتها كنت بامتحن مادة معينة للمرة التالتة يعني درست المادة دي بنفس تفاصيلها تلات مرات و لو كنت شلت المادة دي السنة دي كمان كنت حاعيد سنة تالتة للمرة الرابعة فقررت اني “ولأول مرة فحياتي ” الجأ للبرشام و بما اني مابعرفش احفظ حتي القانون ذو الثلاث رموز فالبرشام بتاعي كان عبارة عن 11 صفحة من الحجم الa4 وش و ضهر عبارة عن قوانين فقط … كل قوانين المادة … بعد ساعة من مدة الامتحان ال3 ساعات تأكدت اني لو مافتحتش البرشام حاشيل طبعا بما اني كنت عايش فوهم اني طالب مثالي و اني مابغشش و ان قواعد الكلية absolute او بالياباني zettai و لازم اطيعها … فكنت فقمة توتري و باعرق بلا توقف المهم انتظرت اللحظة الحاسمة .. و طلعت “كراسة” البرشام و حطيتها فوسط كراسة الاجابة و بدأت ساعتين من العذاب النفسي و المراقب ييجي و يبص عليا .. و انا ابصله بكل برائة ..فيمشي تاني و بعدين فجأة قرروا انهم يدبسوا ورقه من الاسئلة فورقة الاجابة و لقيت المراقب واقف علي بعد تلات ترابيزات مني و جاي عليا بالترتيب اضطريت اني استحضر كل طاقات خفة اليد اللي شفتها في الافلام علي مر السنين و اللحظة اللي جالي فيها المراقب حطيت “كراسة ” البرشام فوسط ورق الاسئلة فوسط ورقة الاجابة .. و سحبت ورق الاسئلة مع بعضه هما كانوا خمس ورقات اسئلة دي خدعة معروفة في الكوتشينة و لجأت لأحد طرق ادهم صبري الشهيرة في التغلب علي مواقف زي دي .. بأنك تتعامل علي انك صاحب موقف و عالي الصوت .. و تبدأ انت تاخد ال initiative فبدأت محادثة عالية الصوت مع المراقب و من ضمنها اسئلة زي ” يعني انت لسة ماتجوزتش ؟ , هو مرتبك كام ؟ , شكلك اخوان !! , اعدل قميصك و نفضه عشان عليه تراب …” ببساطة انك تحسس اللي قدامك بال insecurity … الامتحان خلص و سلمت الورقة و قمت من مكاني و كل ذرة فكياني عبارة عن غضب تام انا مش مطالب اني احفظ المعادلات دي عشان انجح كمهندس نظام الامتحان غبي و ظالم و غير كفأ المادة المفروض امتحانها يكون اوبن بوك بس الدكتور كسلان انه يعمل امتحان اوبن بوك انا مش المفروض اتحط تحت الضغط العصبي و النفسي ده و حاجات كتير زي كده

طلعت من اللجنة و دورت علي دكتور المادة لقيته واقف مع دكتور ماده تانية شبيهة بالمادة دي وقفتهم و بدأت اكلمهم انفعلت زعقت قلت كل اللي نفسي فيه و قلتلهم اني غشيت و برشمت

رد عليا الدكتور بأبتسامه مشفقة “معلش .. نظام الكلية مش صح 100% .. و مش كل الناس بتستريح في الكلية .. و انت عدي المرحلة دي و بعد كده حياتك العملية حتبقي مختلفة … و حل اللي انت عارفه و سيب اللي ماتعرفوش و متقلقش من اي حاجة ” الدكتور التاني كان علي وشه نفس الابتسامه

سيبتهم و مشيت و انا ندمان ندمان اني قعدت لمدة 5 سنين في الكلية دي مابرشمتش ندمان عشان اطعت قواعد نظام هو في الاساس خاطئ و غير كامل كنت … غبي و ساذج

دي عبارة عن ذكري افتكرتها حاليا بطريقة عشوائية بس المهم من الذكري دي اني اتعلمت

never opey incomplete , wrong , idiotic set of rules set by incompetent persons and to succeed in a system of rules made by such persons hack the system