زماااااااااان في مدرسة الثانوي "العسكرية" كان الفصل بتاعنا تالتة رابع

زماااااااااان في مدرسة الثانوي “العسكرية” كان الفصل بتاعنا تالتة رابع … المدرسين كانوا مابيحبوش يعدوا قدامه .. و احيانا كانوا بيخافوا … اتنين اتسرق موبايلاتهم و واحد جاتله ازمة سكر (كان عنده 27 سنة) … وواحدة جالها انهيار عصبي … كل ده كان في شهر واحد تقريبا

المهم بما اني كنت رائد فريق الاذاعة و الكومبيوتر و المكتبة و الصحافة … مرة الفصل كان علي وشك ارتكاب جريمة … و استاذ “مش فاكر اسمه … بس كان بتاع جغرافيا” جه ووقف قدامي و قاللي انت ايه رأيك ؟ شايف ايه الحل؟ بصيت للفصل حواليا … انا شفت ازاي اي هيجان بيبتدي … شفت ازاي واحد بيدي واحد قفا ممكن يحول المدرسة كلها لمنطقة محظورة دوليا شفت ازاي اعقل من في الفصل و اكثرهم احتراما بيضحك بسخرية من ورا الاستاذ شفت ازاي امين الفصل كان زعيم اكبر تجمع عصابي فيه … و الامين الثقافي كان …الامين (((((الثقافي)))))) شفت ازاي ان من بين 50 بني ادم … المذنب الوحيد هو فكرة او بمعني اصح … اعتقاد ان النهاية هي نهاية اليوم الدراسي

كان ردي علي الاستاذ ببساطة ” انا انصح انكوا تغيروا ميس الفلسفة (29 سنة) بأي راجل ”

الاستاذ فكرني بتريق عليه و رد… حتي انت يا اسلام

القرار بتغيير الميس اتفعل بعدها بأسبوعين …

ملخص القصة … لما الفصل يهيج و انت معكش جيش يسكته … قلل عدد خسايرك قدر الامكان و انزل قعد في المكتبة او معمل الكومبيوتر