2016-0082

عندى تلات مجات (جمع مج) مفضلين بتوعى باحب أشرب فكل واحد منهم على حسب الحالة المزاجية .. منهم مج شفاف . اللى يعرفنى كويس .. يعرف إنى باعمل كوكتيل عجيب الفجر من القهوة و القرفة و الزنجبيل و اللبن النيدو … بنسب مختلفة .. المهم فى الموضوع هنا بقى .. كالتالى : 1- مهما حاولت إنى أدمج الخليط ده بالمية المغلية .. برضو بيفضل فى تفل .. كتير . 2- التفل .. مهما إختلف مصدره .. بيفضل تفل . 3- سرعات الترسيب للأنواع المختلفة من التفل .. بتختلف على حسب متغيرات كتير . 4- كل أنواع التفل بتأثر بشكل مختلف على طعم المشروب فى الآخر .

و بناءا عليه :

1- عند مرحلة معينة فحياة المشروب .. المفروض تنتهى محاولاتنا إننا نقلبه .. و إن ممكن يطلع من التفل فايدة أكتر . 2- أفضل طريقة تتعامل بيها مع التفل .. هى إنك تهدى خالص .. و تسيبه ينزل للقاع . 3- كل مرة حتحاول تقنع التفل إنه يبقى مشروب .. حتتسبب إنك تعكر صفو المشروب كله مرة أخرى . 4- لو فاضى و ليك مزاج … ممكن تنقل المشروب الصافى بعد كده فكباية تانية خالص .. بعد ما تطلعله جواز سفر طبعاً .. و تسيب التفل فى الكباية الأولانية .. تحت .