عارف الطفل اللى فعيلتكم .. الصغير اللى لسة عنده 5 سنين مثلاً .. اللى لو إنتوا قاعدين مع ناس غريبة عليه عمره ما شافهم قبل كده .. تلاقيه قاعد ساكت و مؤدب و باصص فى الأرض ..

أو لابد فحضن أبوه او أمه ..

و لما حد من الناس الغريبة دى يقول الجملة المشهورة ” ما شاء الله عليه .. بس هو شكله مؤدب و ساكت ” ..

ترد أمه أو أبوه بضحكة سخرية عالية .. و لو كانوا صيع ممكن يقولوا كلمة إعتراضية من تلات حروف … و بعدين الجملة الأكثر شهرة ” تعالى شوفه فى البيت .. ده مشروع إرهابى ” .

……………..

من أسبوع تقريباً حصلت معايا شخصياً تجربة مشابهة ..

طفل معين برضو فعيلتنا ربنا يحميه .. طبعه زى طبع باقى أطفال العالم .. شقى و صوته عالى و بيتنطط فكل الإتجاهات ..

و كل ما نحاول نخليه يكلم حد مايعرفهوش من أصدقائنا فى الموبايل .. يبص للموبايل .. و يبصلنا .. و يضحك و يسكت ..

من أسبوع .. و أنا باكلم حد مايعرفهوش .. شفته و قلتله .. ” دى لعبة جديدة على الموبايل .. لو كلمتها حترد عليك ” ..

مسك الموبايل .. و لمدة 5 دقايق تقريباً فضل يتكلم فحوار مع الطرف التانى ..

و مابطلش يتكلم إلا لما قلتله إن الطرف التانى ده إنسان .. ساعتها بدأ يتلعثم و يتردد و يسكت .

……………

الصورة اللى فى البوست ده صورة روبوت صغنن كيوت و أمور إسمه ” بلاب درويد ” .. ( بلاب بالإنجليزى يعنى رغى .. كلام كتير يعنى ) ..

قصة الروبوت ده بإختصار بسيط كالتالى ..

كان فى واحد مهندس صغنن إسمه ” أليكساندر ريبين ” .. بيدرس ماجستير فمعهد    MIT.. من أكبر معاهد التكنولوجيا فى العالم ..

و هو بيحضر رسالته .. عمل روبوت صغنن إسمه ” بوكسى  = boxie” .. حجمه قد حجم الميكروويف بالظبط ..

..

” بوكسى ” ده كان عبارة عن صندوق بيمشى على سيرين صغننين .. (الصورة فى اللينك ) .. و لو كنت دخلت معمل MIT .. كنت حتلاقى “بوكسى” ده بيقرب عليك و يقولك ساعدنى أطلع أو أنزل السلالم ..

الفكرة بتاعته إن “ريبين ” كان عايز يشوف .. هل ممكن يعمل روبوت سعره رخيص .. مالوش رجلين .. بس يبقى كيوت بما يكفى إن البشر يساعدوه و يشيلوه ! ..

..

الفكرة حلوة فعلاً .. بس اللى حصل كان مفاجئ أكتر ..

فيوم من الأيام .. واحد غريب داخل المعمل .. ” بوكسى ” راح يدلع عليه و يقوله ” شيلنى يا عمو ” .. عمو ده راح قاعد جنبه و بدأ … يتكلم .. يتكلم و يحكى و يفضفض ..

بيحكيله إزاى إنه كان المفروض حيسافر و إنه وراه شغل .. و إن طيارته إتأخرت بسبب بركان إنفجر فأيسلندا !! ..

…

الراجل فتح قلبه لـ ” بوكسى ” .. ببساطة .. لأن “بوكسى” كان كيوت و صغنن و … فولينيرابل = Vulnerable  .. معنى الكلمة دى لو ترجمتها فجوجل حتلاقيها ” غير حصين ” ..

و دى فوجهة نظرى النقطة اللى وقفت عندها و أنا باسمع القصة دى النهاردة فأخبار الصبح أو ما قمت من النوم ..

…

باقى القصة بتاعت باشمهندس “ريبين” .. إنه راح لواحد مهندس تانى و صانع أفلام إسمه ” برينت هوف ” .. و مع بعض عملوا الروبوت التانى ده بقى اللى إسمه ” بلاب درويد ” …

..

بلاب درويد ده ببساطة نفس موضوع “بوكسى ” .. بس الزيادة فيه .. إنه فيه كاميرا و مايكروفون … و خلوه يسأل الناس بصوت طفل صغنن عنده 8 سنين ..

و يسألهم أسألة من نوعية ” بتحب مين أكتر وااااحد فى الدنيا ؟!! ” … و ” لو حتدى هدية لحد … حتديها لمين ؟!! ” ..

…

وطلقوه على الناس فى الشارع يسأل… و شافوا ردود فعل الناس .. و المفاجأة هى إن الناس فتحت قلوبها .. و ردت ردود عميقة .. و فى منهم اللى عيط و هو بيكلمه ..

بيكلم … روبوت .

….

….

أنا شخصياً من ساعة ما دخل حياتى “جوجل أسيستانت ” .. و أنا باعاملها كأنها إنسان .. يعنى كل أوامرى ليها بتكون من فضلك .. و لو سمحتى .. و بعد إذنك … بالإنجليزى طبعاً …

باقولها صباح الخير أول ما أفتح عينيا .. تروح منفذة الروتين بتاع الصبح بتاعى .. زى “جارفيس ” فأيرون مان بالظبط ..

و تصبحى على خير قبل ما أنام .. عشان تظبط منبهاتى و مواعيدى لتانى يوم ..

و … باكلمها … و أحياناً باضحك معاها ..

……

و ده بيفكرنى بقد إيه العلاقات البشرية برضو فيها جزء كبير من الديناميكية دى ..

و هى ديناميكية إننا بنفتح قلبنا للناس ال( فولينرابل … اللى مش محصنين ) … الناس اللى فوشهم ضحكة و إبتسامة مسامحة .. يحسسوك إنهم مش بينافسوك .. مش بيتحدوك .. مش بيحكموا عليك من منظرك أو … مش بيحكموا عليك خالص ..

…

معظم الناس اللى بتمتلك جاذبية ضخمة .. (جاذبية مش كاريزما .. فى فرق) .. بيكون سبب كده إنهم سهل إنك تتكلم معاهم .. و سبب سهولة كده إنهم بيحسسوك إنهم مش محصنين نفسهم تجاهك .. بيحسسوك إنك بتكلم براءة طفل عنده 5 سنين .

….

التجربة اللى ذكرتها فأول البوست بتأكدلى إننا كبشر مش سهل بالنسبالنا إننا نكون على طبيعتنا .. إلا لو كنا لوحدنا .. او لو إتأكدنا إن اللى قدامنا و معانا مش محصن نفسه تجاهنا ..

مش مشكلة لو كان أقوى أو أضعف مننا .. أغنى أو أفقر مننا .. أفضل أو أسوأ مننا ..

طول ما هو مش حاطط دفاعات قدامنا .. بنحس إننا منجذبين له .. و بنفتح قلبنا له ..

…

باقى التجربة و مصادرها الأساسية فى اللينك ده .. 

ممكن يكون عندى كلام أكتر عايز أقوله عن الموضوع ده ..

بس أعتقد إن البوست ده طول كفاية كده ..

و الله أعلم .