كنت بافكر فعنوان مناسب لبوست بيحتوى على ((( شوية ))) من ” حاجاتى ” .. و لقيت الجملة دى بتطلع من ثنايا ذاكرتى و بقوة .. (لو إنت أصغر من 27 سنة .. أعتقد حتحتاج تجوجل الأستاذة صفاء أبو السعود وهى بتغنى فى البانيو مع الصابونة و حواليها أطفال صغيرين ) .
,,,,,,,,,,,,,,,,,,,,,,,,,,,,,,,,,,,,,,,,
1- rainmeter
كنت إتكلمت قبل كده عن البرنامج ده .. لو إنت من مستخدمى الويندوز .. فلا غنى عن البرنامج ده أعتقد .. كل معلومات الجهاز موجودة على الديسكتوب .. و ال rss feed بتاع أى موقع إنت عايزه .
rss feed يعنى :
تحديثات الأخبار المباشرة بمجرد ما بتنزل على الموقع .. و زى اخبار العالم الجديدة , مسلسلات الأنيمى أو ما تنزل , أفلام البلوراى أول ما تنزل , …..
https://www.rainmeter.net/
,,,,,,,,,,,,,,,,,,,,,,,,,,,,,,,,,,,,,,,,
2- google assistant
لو موبايلك أندرويد … علق على زرار الهوم ثانية تقريباً … أو بكل حنان قول لموبايلك بعد ما تفتحه ” hey google ” حتلاقى إتفتحلك حاجة بدأت تسجل و تسمع صوتك .. قول لها بكل حنية أى أمر إنت عايزه زى :
good morning , play the news , science news , search for >> , who’s your daddy 😉 😉 ….
حتلاقيها بترد عليك .. و حتلاقى زرار جميل يعرفك كل أوامرها و اللى تقدر تعمله و أكتر بكتير .
https://assistant.google.com/#?modal_active=none
,,,,,,,,,,,,,,,,,,,,,,,,,,,,,,,,,,,,,,,
3- librivox
أنا المعدل بتاعى فسماع الكتب الصوتية هو كتابين فى الشهر تقريباً … من سنة 2009 ..
و أصبح ليا نظام فى سماع الكتب عشان مايحصليش تخمة من المعلومات أو أحقق إستفادة كويس منهم .. و هو إنى بانوع من نوعية الكتب اللى باسمعها .. و باطبق تمارين ذاكرة مختلفة فيهم و هكذا .
الموقع ده واحد من مئات المواقع اللى بتقدم الكتب الصوتية مجاناً ..
و طبعاً أنصحك بإنك لو ربنا فاتحها عليك .. إنك تشترى من أوديبل – audible مباشرة ..
الكتب الصوتية جزء لا يتجزأ من روتين يومى ..
أنا باسمع أغانى و موسيقى كتير .. لكن فى الجيم 99% من اللى باسمعه هو الكتب الصوتية دى ..
كم المعلومات و التغييرات و الإستفادة فحياتى منهم ضخم جداً ..
و لو الإنجليزى بتاعك مش مساعدك .. ده مش سبب إنك ماتسمعش .. صدقنى حتى لو الإنجليزى بتاعك ضعيف .. حيقوى لما تسمع أوديو بوكس .
https://librivox.org/
,,,,,,,,,,,,,,,,,,,,,,,,,,,,,,,,,,,,,,,,,,
4- microsoft office
سبحان الله يا جدع .. ناس كتير بتستغرب لما باسألهم على الأنظمة اللى بيستخدموها فشغلهم أو حياتهم !! … كأنى باسأل عن شىء عجيب !! .. و ما زالوا عايشين بالورق !! ..
أنا كمان فجيبى دائماً مفكرات .. لكنى باعتمد بشدة على مايكروسوفت و جوجل .. كالتالى :
– one note :
البرنامج اللى باعتبره مكتبى بالكامل .. و لو كنت شفت أو حضرت محاضرة ال gtd بتاعتى .. حتعرف مدى عشقى للبرنامج ده .. البرنامج ده مش سهل شرحه فجملتين تلاتة .. لكن يكفى إنك تشوف المحاضرة اللى فى اللينك اللى فى الرابط اللى تحت ده .. و إنت حتعرف معناه .
– microsoft project :
من أفضل برامج إدارة المشروعات اللى باستخدمها .
– microsoft visio :
البديل الرائع ل edraw max .. و ده أى فلو شارت أو رسمة أو توضيح أو دياجرام أو خريطة سطو على بنك مثلاً حبيت إنك تعملها .. حتعرف تعملها عن طريقه .. و برضو هو من البرامج اللى مابقفلهاش على جهازى … أبداً ..
,,,,,,,,,,,,,,,,,,,,,,,,,,,,,,,,,,,,,,,,,,
5- thunderbird
لو عندك إيميلات كتير على دومينات كتير زى حالاتى :
@hand-is.com
@toshkar.com
@eslamosama.com
ماينفعش تعيش من غيره .. هو و outlook .
,,,,,,,,,,,,,,,,,,,,,,,,,,,,,,,,,,,,,,,,,,,,
أربع نصايح زيادة عشان كده الموضوع طول و لازم أقفل البوست على كده :
1- قبل ما تنام بالليل .. إسأل نفسك ( هل على الأقل زودت لمعلوماتك معلومة واحدة النهاردة ؟!! ) .. و لو الإجابة (لا) .. إفتح يوتيوب و سيرش على أى شىء يزودلك أى معلومة فأى مجال .
2- عارف لما تبقى مخنوق و مش طايق تسمع أى معلومة فأى مجال .. هو ده أكتر وقت عقلك بيكون محتاج إنه يسمع معلومة جديدة فأى مجال .. آه والله .. علميا كده فعلاً .. كنت كتبت بوست من زماااان عن الموضوع ده .. و إقرا creative conspiracy لو مش مصدقنى .
3- اللى فات ده كله مجاناً .. و ممكن تبدأ فيه بالكامل فساعتين زمن بس .
4- لو عايز تعرف أهمية اللى فات ده كله إيه .. يبقى إنت محتاج تقرا فبوستاتى اللى فاتت شوية كتير .. حتلاقيهم كلهم فى الرابط اللى تحت ده برضو ..
