صحيت من النوم النهاردة .. و كالمعتاد على مدار الأسبوعين اللى فاتوا تقريباً .. تحسست مفصل قدمى الشمال .. أشوف حجم التورم الناتج عن تمزق الأربطة البسيط اللى حصل من أسبوعين أخباره إيه ..

إصابة بسيطة بفضل الله أثناء عمل سبرينت على نجيلة ملعب الإستاد .. إلتوت قدمى جوة حفرة مستخبية تحت النجيلة .. كأن اللى حفرها كان قاصد يصطاد تقريباً أى حد من اللعيبة اللى بتجرى ! .

………

الحمد لله التورم بيخف يوم بعد يوم .. تدريجياً .. و ببطء .. و لكنه بيخف .. و الألم كمان بيخف معاه ..

لكن كل يوم الصبح .. بافتكر نفس المشهد الملحمى ففيلم ” wanted ” ..بتاع باشمهندسة أنجلينا جولى … لما بعد ما دغدغت جسمها هى و الواد اللى كانت بتتخانق معاه .. مددت ليلة جوة بانيو فيه مادة بيضاء كده ( مية بصابون .. و فنيك غالباً ) .. و صحيت تانى يوم صاغ سليم .. و لا كأنها كانت بتطلع فى الروح الليلة اللى فاتت .

….

بقالى برضو سنة تقريباً بفضل الله أهو مواظب على الجيم بمعدل 3 مرات فى الأسبوع تقريباً .. لأول مرة فحياتى ..

أنا باروح جيم من أولى ثانوى … و باتمرن كاراتيه و كونغفو من تالتة إبتدائى … بس أول مرة فحياتى أواظب على التمرين لمدة سنة كاملة مستمرة ..

و كل مرة و أنا فى الجيم .. و باحاول أظبط وضع تمرين الباى أو التراى مثلاً ( عضلات الدراع ) .. أفتكر مشهد ملحمى تانى .. يمكن أقل شهرة شوية من مشهد أنجلينا ..

…

المشهد بتاع جاكس ( الراجل أبو دراعات جامدة ) … ففيلم مورتال كومبات الجزء التانى .. لما كان عمل عملية معينة لدراعاته .. نام على سرير و حط دراعاته جوة حاجة معينة .. و صحى بدراعات قوية جداً و كان بيضرب الأرض بوكس يخليها تتهز .

(كنت طفل أول مرة أشوف المشهد ده عالقناة التانية سنة 99 تقريباً !! ) ..

…

المشهدين دول دايماً بافتكرهم و أنا باسأل نفسى ..

هو إحنا ليه بناخد وقت طويل قوى عشان نوصل لأى شىء ؟ ..

و ليه التقدم بتاعنا فحياتنا بيكون بخطوات صغيرة جداً جداً جداً متراكمة ؟ …

..

ليه حياتنا مش زى الأفلام دى .. اللى هو هوب إنقل المشهد إنت بقيت كويس و تقدر تنزل تجرى تانى ..

أو هوب إنقل المشهد .. إنت بقيت بدراعات شبه بتاعت (جاكس) .. و مش محتاج تروح الجيم تانى ..

ليه ؟!

…

لو دورت كمان حتلاقى إن أى نوع نمو أو تقدم أو تطور فى الدنيا بتاعتنا … بيحصل ببطء جداً ..

كأنك بتتفرج على شجرة و عايز تشوفها بتكبر .. لو فضلت تراقبها يومياً .. مش حتلاحظ أى شىء مختلف ..

لكن سيبها و إرجع كمان شهر .. حتلاقيها نبتت .. و فرعت .. و … تطورت .

….

فأى كورس أو محاضرة باديها .. لازم ألاقى سبب إنى أتكلم على الموضوع ده .. و هو مبدأ القيمة المضافة* ..

** هو مبدأ معروف و مشهور جداً .. و هو إنك لو عايز تعمل أى شىء فى الدنيا .. إبتدى بخطوات صغيرة مستمرة ..

اللى هو حاجة زى لو قريت صفحة واحدة كل يوم الصبح قبل ما تروح الشغل من كتاب معين .. خلال سنة حتكون خلصت كتاب 365 صفحة متخصص مثلاً فمجالك ..

..

أنا دايماً باشرح إنى فعلاً إتعلمت معظم الحاجات اللى باعملها .. عن طريق خطوات صغيرة مستمرة ..

زى لعب الضغط .. من أربع ضغطات قبل و بعد كل صلاة .. ل تلاتين ضغطة قبل و بعد كل صلاة خلال شهر ..

أو اللغات أو الموشن جرافيكس أو أياً كان …

مافيش مهارة أو حاجة بتتعلمها فجأة و تبقى شاطر فيها فجأة ..

….

إمبارح قبل ما أنام كنت باسمع راديو وايرد ( wired radio ) .. و كان بيتكلم على أخبار الشركات اللى شغالة فأبحاث الجينات و الدى إن إيه ( أحد الحاجات اللى إشتغلت فيها فحياتى لمدة سنتين) ..

لينك المقال اللى بيشرح الموضوع تفصيلياً هنا 

و إزاى إن فى شركتين كبار دلوقتى ..

واحدة طلعت جهاز معين .. يحلل الجينات بتاعتك .. و يقوللك أنسب نوع ريجيم و تمارين يناسب جسمك إيه .

و التانية طلعت جهاز .. يحلل الجينات بتاعتك .. و يقوللك أنسب نوع خمور تشربه و يعملك دماغ إيه .. “آه والله ” …

و بعدين بيبدأ دكتور متخصص يشرح أبحاث الشركتين دول .. و إنهم مجرد هرى و تسويق عالفاضى ..

و إن فى الحقيقة .. معظم الأبحاث اللى طلعت عشان تقولك بناءاً على جيناتك إنت المفروض تعمل إيه …. هرى ..

مش معنى كده إن العلم ده كله هرى .. إطلاقاً … و لكن معنى كده إننا لسة بدرى أوى على ما نوصل إننا نعرف حل سحرى يوفر علينا سنين من الجيم و الريجيم و … (تجربة الخمور و الهانج أوفر ؟!! ) ..

…..

…..

…..

فى حكمة فكدة والله أعلم ..

فى حكمة إن التقدم أو التطور فحياتنا الشخصية .. يكون بالبطء ده .. و يكون نتيجة خطوات صغيرة جداً .. كتير جداً جداً جداً ..

زى ما جسمك بياخد ملايين الخلايا عشان يعالج إصابة بسيطة ..

الدنيا برضو على ما أعتقد بتحتاح ملايين البشر عشان تعالج إصابة بسيطة .. او تعمل تقدم بسيط ..

كل خلية فجسمك ليها دور ..

و كل إنسان على وجه الأرض خلال التاريخ .. ليه دور ..

الخلايا أحياناً منها اللى بيتجنن و يسبب كانسر (سرطان ) ..

و البشر أحياناً منهم اللى بيتجنن و يسبب دمار و حرب …

…

مافيش خلية سوبر هيرو بتظبط جسمك لوحدها ..

و برضو مافيش إنسان سوبر هيرو حيصلح الأرض .. لوحده ..

…

فى تشابهات أكتر و ملاحظات أكتر فدماغى عن الموضوع ده ..

لكن البوست طول كفاية أعتقد ..

…

و الله أعلم