عمرى ما كنت لعيب كوتشينة على ما أتذكر .. كنت نصاب محترف أينعم .. و كمامى كانت دايماً بتحتوى على ولاد زيادة و جواكر … لكنى عمرى ما إمتلكت مهارة عد الورق .. لأنها بتحتاج (ذاكرة قوية جداً + و سرعة حسابية ) لا أمتلكهم إطلاقاً .

المهارة دى بالذات .. لو لعبت قدام حد بيمتلكها ” زى أبويا مثلاً ” .. حتحس بعجز ضخم و حتبقى عايز تولع فنفسك ..

لكن البوست ده مش عن عد الورق و خدع الكوتشينة .. إطلاقاً .

البوست ده عن إزاى تطبق قواعد الكوتشينة .. على حياتنا العادية .

…….

شوف يا حاج …

فلعبة زى الكونكان مثلاً .. إنت بيبقى مطلوب منك إنك تكون ” تروس = تسلسل من ورق الكوتشينة تبعاً لقواعد معينة” .. و لو نجحت فتكوين كل الورق اللى معاك لـ : تروس .. قبل خصمك … تبقى كسبت .

السؤال هنا .. التروس دى عبارة عن إيه مثلاً ..

و هنا بتيجى روعة لعبة الكونكان .. و هى فكم الإختيارات و الطرق اللى بتديهالك عشان تكسب ..

يعنى تقدر تكون من 1 لحد الشايب .. محدش حيقولك لا ..

تقدر تعملهم تروس متكررة .. زى التلاتات مع بعض ..  أو السبعات مع  بعض .. و هكذا ..

….

و الحركة الصايعة فوجهة نظرى فى اللعب .. هى إمتى تكسر ترس مغرى جداً بالنسبالك .. عشان تعمل ترسين أو تلات تروس تانيين .. .

يعنى أحياناً كان بيبقى معاك (آس , إتنين , أربعة , خمسة ) من لون معين .. و مستنى التلاتة عشان تقفل الترس ده .. فكان فى ناس بتلعب على إنها تجيب التلاتة دى .. و ناس تانية .. (صيع) كانوا بيكسروا الترس المُغرى ده .. و يكونوا حاجات تانية .

…..

كفاية كوتشينة كده ؟

…..

لو بصيت على معظم جوانب حياتنا .. حتلاقى إن المبدأ مشابه شوية ..

إنت مثلاً لو عايز تفتح مشروع جديد .. بتبقى محتاج :

• فلوس
• وقت
• مهارة و علم
• مجهود

و على حسب الكم اللى حتبذله من كل واحد من الأربع جوانب دول .. على حسب ما حيتحدد نجاح المشروع ..

طبعاً يا ريت يبقى عندك من الآربعة كم لا نهائى ..

يعنى تبقى برنس عندك مليارات .. و حتعيش 500 سنة مثلاً .. و معاك 17 دكتوراة فمجالات مختلفة … و سيلفستر ستاللونى (اللى لسة عايش بالمناسبة) كان بيخدم عليك فى الجيم يا وحش .

لكن فى الحقيقة هى إن كل واحد فينا عنده مقادير مختلفة من الأربع مكونات دول ..

ممكن يكون فعلاً عندك وقت كتير , و مهارة متوسطة .. بس مجهود جبار (مكنة شغل يعنى ) … و تنجح ..

و ممكن تبقى معاك فلوس (وارث مثلاً ) .. و وقت متوسط .. و مهارة متوسطة .. و مجهود متوسط … و تنجح برضو ..

و ممكن تبقى معكش غير مجهود بس .. و تنجح ..

بالظبط زى الكوتشينة ..

لكن عشان تكمل لعب … لازم تبطل تحارب عشان كارت (ورقة يعنى ) مش حتجيلك ..

بمعنى .. لو فى المثال المذكور فوق .. التلاتة اللى إنت مستنيها عشان تكمل الترس .. غيرك بيلعب بيها و عمره ما حيرميها .. تبقى إنت مجنون لو فضلت مستنى ..

إذن ساعتها أهم شىء إنك تعرف إمتى … إمتى تـ : kill your darlings  … يعنى تقتل العزاز عليك ..

المصطلح ده مشهور فأكثر من عالم ..

عالم الأبحاث أحياناً بيبقى الباحث فيه دخل فمجال معين و حاسس إنه هو ده اللى حيوصله للنجاح .. لكن بعد فترة ..  بيبقى لازم يكون عنده الشجاعة إنه يـ kill his darlings  .. يعنى يقتل كل عزيز و غالى عليه فى الطريق اللى دخله ده و يغيره .. و إلا حيبقى بيضيع وقت عالفاضى .

فعالم الإستثمار برضو نفس الشىء ..

و فعالمك الحالى الخاص الشخصى … نفس الشىء ..

إسأل نفسك ..

إنت بتلعب على ورقة عمرها ما حتجيلك ؟

ولا عندك إستعداد تكون مرن .. و تكسر تروس مغرية جداً فحياتك .. لكنها مش كاملة .. عشان تكمل تروس تانية .. أو تبنى تروس عمرك أساساً ما كنت فكرت فيها قبل كده .. و تكمل … و تكسب .

…………………………………………………

التمرين رقم (4) :

…………………….

حاول تحدد أى هدف .. صغير كان أو كبير .. مش حيفرق ..

حاجات زى ( كورس عايز تخلصه أو تبدأه , مهارة عايز تتعلمها , مبلغ عايز تحوشه , ……) ..

و بعدين حلل الحاجات اللى إنت محتاجها عشان تكمله لأربع مكونات أساسية :

• وقت
• مجهود
• فلوس
• علم و مهارة .

و شوف إنت معاك قد إيه من كل مكون من دول .. و محتاج قد إيه تانى عشان توصل إنك تكمل الهدف ده ..

و بعدين شوف باقى الحاجات اللى فحياتك اللى بتستهلك المكونات الأربعة دول .. ( أو بتنميهم زى الشغل و المرتب مثلاً ) .. و فكر .. ممكن تفنطها إزاى عشان تقدر تطلع التركيبة المظبوطة .

خليك مجنون جداً .. فكر فأكثر الطرق و الأفكار جنوناً .. التفكير مجاناً و ببلاش ..

و إكتب أفكارك دى على ورق ..

و كرر ده مرة واحدة كل أسبوع على الأقل .. لمدة شهر ..

……………………………………………………………..

و الله أعلم .