فى المعتاد البوستات اللى من النوعية دى بتبقى مقرونة بصور shirtless ال before و الـ after .. بس حنكتفى بالبوست بس بقى ..

..

ملحوظة مهمة جداً كمان ..

ما يلى من معلومات أو نظم تغذية و تمرين فى البوست ده .. فهى اللى نفعت معايا شخصياً و لا أرشحها بأى شكل كمرجع يعتمد عليه .. ممكن جداً ينفع معاك أو ماينفعش .

————————————–

1- كل جسم مختلف عن التانى :

—————————

شخصياً عمرى ما فضلت تخين لفترة طويلة من الزمن .. يعنى الـ 120 كيلو ده كان أكتر وزن وصلتله بفضل الله .. و أقصى فترة كنت تخين فيها بالمنظر ده مازادتش على سنة بالكتير ..

و ده بيفرق جداً ..

يعنى عشان أنزل 30 كيلو تقريباً ف 8 شهور .. بالنسبالى بيبقى أسهل بكتير من حد طول عمره (obese = وزنه أوفر أوى يعنى ) و عايز ينزل نفس ال 3- كيلو دول ..

..

تقدر تتأكد من ده لو شفت تجارب ممثلين كتير بيزودوا وزنهم و ينزلوه بين كل فيلم و التانى .. و أحياناً فنفس الفيلم ..

أشهر 2 فى الموضوع ده :

amir khan : dangal

christian bale : كل أفلامه تقريباً

بس مش معنى كده إنك لو obese تيأس .. أبداً .. أنا باقولك ده بس عشان ماتحبطش لو بدأت تتمرن و معاك واحد زيي و كنتوا نفس الوزن .. و لقيته هو بيسبقك جداً ..

فى فرق فى الجسم .

————————-

2- العلم ثم العلم ثم العلم … ثم العلم كمان مرة . (اللينكات لكل الدنيا دى فى الكومنتات )

—————————

كم الفتى اللى حتسمعه لما تحب تبتدى تتمرن و تنزل وزنك أو تبنى عضلات أو أياً كان اللى عايز تعمله .. مش حتسمع زيه إلا لو قررت تبقى سلفى فجأة .. أو تبقى علمانى برضه فجأة ..

كل اللى حواليك حيبدأ يفتى فأدق تفاصيل حياتك .. و الشعب المصرى .. عااااشق للفتوى ..

فبالتالى .. تحصن نفسك من ده بإنك تكون قارى كويس جداً و دارس كويس جداً للى حتعمله .. و تسمع اللى بيفتى .. و تبتسم .. و تطنش بكفاءة ..

قبل ما أبتدى أنا قريت :

** nutrition for dummies :

كتاب كفاءة إنه يفهمك كل اللى إنت محتاج تفهمه عن التغذية و جسمك بيهضم إيه و إزاى و ليه .

و بعدين شفت :

** that sugar film :

حيخليك تبطل سكر .. و لازم تعمل ده .. و حاتكلم عن كده كمان شوية .

و بعدين تابعت البرنس الكبير أوى .. أوى ..

** jeff cavaliere : athleanX

كنت باتفرج على فيديوهاته يومياً قبل النوم و أول ما أصحى .

و بعدين .. جوووووووجل .. كل معلومة صغيرة و كبيرة أسمعها أو أسمع حد بيفتى فيها و أحس إن كلامه ممكن يحمل بعض المنطق .. كنت بابحث و أبحث و أدرس لحد ما أفهم .. و بعدين أقرر .. أسمع كلامه .. ولا أطنش .

—————————

3- معايا بتيجى مرة واحدة .. مش واحدة واحدة ..

—————————

حتلاقى ناس كتير قلبها بيكبر فجأة و تحس إن قلبهم قلب أم يا جدع .. و تحس بحنيتهم عليك كده و كل ما حيلاقوك بدأت تنتظم أو حتى تبتدى .. ييجى و يطبطب عليك و يقولك إن لبدنك عليك حق .. و لازم اليوم الفرى ( باكره اليوم ده ) .. و تعالى إضرب معانا فطير بالسمن الفلاحى ..

إقطع علاقتك بالناس دى ..

…

ببساطة أنا عمرى ما نفع معايا موضوع واحدة واحدة ده .. فأى حاجة .. و زى ما دايماً باقول فى أى كورس باديه .. أفضل طريقة بتنفع معايا فأى شىء .. هو إنى أنط فى العمييييييق .. مرة واحدة .. ( jump in the deep end ) .

فبالتالى .. أنا قررت أبدأ دايت و تمرين من 18 شهر بالظبط .. و من أول دقيقة لحد النهاردة بنفس الطريقة .. مش تدريجى إطلاقاً ..

——————————

4- الأكل …. ( نظامى الشخصى البحت )

——————————

أنا كنت مدمن سكريات زى ما إتكلمت قبل كده .. و كان بالنسبالى العسل و الحلاوة الطحينية و المربات بكل أنواعها أهم من المية و الهوا …

وقفت كل ده .. بالكاااااااااااااااامل ..

1: وقفت كل ما له علاقة بالسكر الأبيض … بالكااااااااامل .

2: إستبدلت السكر الأبيض بالعسل النحل .. و اللبان .. و الشوكولاتة الغميقة ( دارك) خام .

3: أنا باحب أطبخ لنفسى (على قدى يعنى ) ..

—–

أول ما أصحى من النوم:

—–

باشرب ميه (مش من التلاجة ) .. كتييير .. يعنى كبايتين كبار تقريباً .. و بعدين .. باحط معلقة قرفة + نص جنزبيل + معلقتين عسل نحل … و أقلبهم و آكلهم ..

—–

فطار : الصبح بدرى ( قبل الساعة 9 .. و يا حبذا بعد الفجر مباشرة )

—–

تلات بيضات عيون (صفار نى سائل مش ناشف = الطريقة الصح للبيض ) .

نص رغيف عيش ( باحب أحمصه جنب البيض) .

بارش عليه جبنة رومى مبشورة أو جبنة بيضاء بدل الملح ..

شوية حبة البركة .

توم

توابل ( كمون , بابريكا , كركم ) .

+ سلطة ( طماطم , خيار , بصل , خضرة , جزر , ….. ) .

+ ممكن طبق فول لو ليا مزاج .

+ بليلة ( غلة + لبن + سودانى + زبيب + تمر + جوز هند ) .

+ فاكهة

…

(باكل فى الوجبة دى زى ما إنت شايف بمزاجى كل اللى نفسى فيه )

——–

غدا : (قبل الساعة 5 المغرب ) .

——-

أنا باتغدى مع أهلى معظم الوقت .. و باكل معاهم من كل الأصناف اللى طبيعى بتتعمل فبيوتنا كلنا .. و لكن :

– لو مكرونة ( مابزودش على أربع معالق متوسطين تقريباً ) .

– لو رز ( مابزودش على خمس معالق متوسطين برضه ) .

– لااااااا للتحمير .. يعنى أى بروتين باخده مسلوق و شكراً .

– شربة كتيير ( شيل الدهان اللى فوقها ) .. و سلطة كتيير .

– خد بروتين قد اللى إنت محتاجه لو بتتمرن حديد .. ماتكترش و ماتقللش .

– لو حاطبخ غدا لنفسى بيبقى أكيد بيحتوى على ( مشروم , فاصوليا حمرا , ممكن ماكريل .. ) .

– لو عايز تحلى .. حلى فواكه .. بس .

– قووووووم جعااااااااااااااااااااااااااان .

——–

عشا :

——–

غالباً مابتعشاش .. إلا لو ورايا شغل كتير حيضطرنى أسهر مثلاً .. باعمل حاجة زى اللى صورتها فى البوست بتاع الشوفان .

بحيث إن هضمى يشتغل عليها و جوعى مايعذبنيش و أعرف أشتغل .

بتحتوى على :

شوفان – زبادى – قرفة – جنزبيل – عسل نحل – فواكه – …..

——————————————————-

خلاصة الأكل :

كل اللى نفسك فيه .. بس ماتستعبطش .. و الأهم إنك ( لو بتنزل وزنك ) .. تكون دايماً فحالة ( calorie deficit = يعنى إستهلاكك من السعرات الحرارية أقل من اللى جسمك بيحرقه ) .

– أنا باشرب مج قهوة واحد يومياً .. بعد ساعتين من الفطار .

– إعرف إيه اللى يتشرب و إمتى و إزاى .. (إقرا و إبحث ) .

———

الممنوعات :

– أى صودا= مشروبات غازية ( لو حاتموت عليهم .. ماتشربهمش ) .

– مشتقات السكر الأبيض و الحلويات .. ( مرة فى الشهر .. و إندم عليها باقى الشهر )

– الدهون اللى مالهاش لازمة ( جلد فراخ , لحمة ملبسة , قشطة , ….. ) .

———————————————————-

———————————————————-

التمرين :

———————————————————-

أهم شىء إنك تعرف إن اللى بيتمرنوا بيكونوا مكسلين أكتر منك .. و تعبانين أكتر منك .. و مرهقين أكتر .. و عايزين يناموا أكتر .. و حاسين بالبرد أكتر .. و كارهين التمرين أكتر ..

بس .. بينزلوا يتمرنوا .. يومياً .. بالرغم من كل ده .

…

أنا بابقى تعباااااان ..

و مرهققققق ..

وورايا شغل كتيييييييير ..

و البيت دفا و الدنيا بتشتى تلج ..

و عايز أنااااااااااااااااااام …

و حاسس إنى محتاج جمهور يملى إستاد سانتياجو برنابيو يشجعنى عشان أنزل ..

بس ببساطة باقرر إنى آخد اول خطوة ..

..

اللى هو أنا مش رايح التمرين .. انا حاقوم بس من عالكرسى ..

أنا مش رايح أتمرن لا .. انا حاقلع بس ..

حاتفضل قالع كده ؟!! .. إلبس إتدفى .. بس إلبس هدوم التمرين بس ..

رجلك سقعانة ؟! .. إلبس الكوتشى بقى ..

حط الموبايل فجراب الجرى و سماعات الجرى فودانك .. شغل الكتاب الaudio بتاع الشهر ده ..

إتحرك ..

أول خطوة بس .

———————————————————-

ممكن أكتب بوست تانى كامل عن أنظمة التمرين المختلفة .. خصوصاً لو بتبنى عضلات .. بس البوست كده طول فحت .

———————————————————-

أنا ( قدر الإمكان ) .. باروح التراك أجرى يومياً .. و بعده الجيم .. او العكس .. على حسب نوع التمرين ..

( يعنى تمرينة الفخاد باخدها قبل الجرى مش بعده .. الناس اللى بتلعب فخاد عارفه ليه  ..

———————————————————-

– هات ميزان حمام bathroom scale فى البيت ( كان عامل 80 جنيه لما جبته من سنة و نص ) .

– هات عقلة ( بتتعلق على عتبة باب أوضتك .. أو الحمام ) .. كانت عاملة 95 جنيه .. و إبتدى تتشعلق حتى لو مش حاتعرف تطلع .. شوية بشوية حاتعرف تطلع .. و بعدين تجيب عدات .

– هات سوستة صدر ( أم خمس شمعات .. و إبتدى و لو بشمعة ) .. كانت عاملة 20 جنيه تقريباً ..

– هات دامبلز و أوزان .. ( ماعرفش بكام دلوقتى .. عندى من 12 سنة ) ..

– إلعب ضغط .. ( لما إبتديت زماااان .. ماكنتش باعرف أجيب 4 على بعض .. بقيت بالعب 4 عدات قبل و بعد كل صلاة … بعد شهر بقيت باجيب 30 مستريح قبل الصلاة .. و 30 بعدها ) .

– إتعلم تمشى لكل مشاويرك .. قدر الإمكان إمنع التاكسيات بالكامل .. انا بامشى كتيييييييير .

———————————————————–

فى حاجات أكتر طبعاً .. و تفاصيل ممكن أكون نسيتها ..

بس الخلاصة هى كالتالى ..

إحساسك لما تبص فى المراية و تبقى فرحان بشكلك ..

و إحساسك لما تجرى و ماتنهجش ..

و إحساسك لما تنام و إنت مستريح و مايجيلكش حموضة .. و تدخل الحمام و إنت مستريح ..

+ الإحساس النفسى و الراحة النفسية اللى بتتظبط لما بتحترم جسمك بالشكل ده ..

يستحق إنك تخاف فعلاً تبطل ..

———————————————————-

ملحوظة اخيرة خالص :

أنا مهندس .. مش عالم تغذية ولا دكتور ولا أنفع مرجعية خااااالص تسألها عن تفاصيل حالتك الخاصة .. أنا بس باقرا كتييييييير ..

———————————————————–

و الله أعلم .