تيتانيك لما نزل مصر فى السينيمات كنت فخامسة إبتدائى ساعتها فمدرسة الحديثة الخاصة ..

و ماكنتش بانزل ألعب فى الشارع .. و ماكنش ليا أصحاب كتير مختلفين عنى .. فبالتالى كان طبيعى جداً إنى لما ألاقى زملاء ليا فى المدرسة (فخامسة إبتدائى) ماسكين “أكليسيرات = شنط كتب” , و كراسات ” ماكنش لسة طلع موضوع الإسكتشات” .. عليها صور أبطال الفيلم .. و قاعدين بيتكلموا على الفيلم كأنه سر خطير و كل واحد يحلف إنه شافه سينيما .. فالتانى يعلى عليه و يقول إنه شافه فيديو uncut .. و اللى بعده يعلى عليه و يحلف إنه على إتصال دائم ببطلة الفيلم ….

كان طبيعى جداً إنى أسأل و بكل بلاهة .. ” هو الفيلم ده بيتكلم عن إيه ؟! ” .

————————-

السنة اللى بعدها مباشرة .. دخلت أولى إعدادى .. فمدرسة حكومى .. (حكووومى ) ..

و خلال أسبوع واحد .. كنت عرفت الفيلم بيتكلم عن إيه .. و إسم أبطاله .. و ليه هو كان عامل دوشة .. و تفاصيل كافية إنى أكتب – عن الفيلم .. و عن “لقطة معينة” جواه – كتاب كامل .

————————-

و تعدى السنين و السنين ..

————————-

إمبارح خلصت كتاب ” write, publish , repeat ” .. الكتاب بيتكلم عن عالم صناعة الكتب و الكتاب .. و دور النشر .. و لو إنت عايز تكتب و تاكل عيش من كتاباتك دى و تنشر بنفسك .. تعمل إيه ..

كتاب راااائع بكل المقاييس .

————————-

الكتاب فيه تفاصيل كتير عن إزاى تسوق لكتابك و تبيعه لأكبر عدد من القراء .. و فيه تفاصيل كتير برضو عن كتاب ناجحين جداً فى المجالات دى .

و طبعاً كان بيتكلم عن إن إزاى من أكتر الكتاب الناجحين دول .. هما اللى بيكتبوا فمجالات معينة زى ( الحب , الزواج , المشاعر , توايلايت , …. ) .

لكن بعد ما خلصت الكتاب .. لقيت إن سؤال ضخم بيدور فعقلى .. و حبيت إنى أسأله هنا فى البوست ده ..

** كان إيه اللى يحصل لو كانت الناس بتهتم بالعلوم الفيزيائية و الكيميائية و الرياضية و الأحيائية .. نفس إهتمامها بالعلوم الإنسانية ؟!

…

السؤال بشكل مختلف ..

** كان إيه اللى يحصل لو كان فيلم تيتانيك ركز على ميكانيكا السفينة و ديناميكا الموائع و هندستها المعمارية .. مش العلاقة بين جاك و روز ؟!

————————-

خلينى أوضح فكرتى أكتر ..

كل البشر عندهم غرائز أساسية :

– أكل

– شرب

– ملبس

– مسكن

– تزاوج

– رغبة فى الإنجاز و تحقيق الذات

– تملك

– رغبة فى الأمان

– تبادل عواطف .

…

معظم الأدب العالمى على مدار التاريخ .. كان بيركز على العناصر المشتركة دى اللى كل الناس فاهماها بالفطرة ..

يعنى إنت و إنت طفل صغير .. بتكون فاهم إنك جعان و عايز تاكل بفطرتك .. ماحدش بيفهمك إنك جعان ..

و لما تكبر شوية .. بتحس بحاجات تانية تجاه الإناث من نفس جنسك و ماحدش برضه بيكون شرحلك إنك المفروض تحس بده .. إنت بتحس لوحدك .

….

العلوم الفطرية دى .. اللى هى لو جبت إنسان عاش طول عمره فجزيرة لوحده ..حتلاقيه برضو .. جعان و عايز يشرب و يتجوز و يلبس و يسكن و يحقق ذاته و ينجز ..

————————-

فبالتالى لو إنت عايز تبيع و تكسب من بيع أفكارك .. (الكتب و الأفلام و المسلسلات) .. يبقى بيع و سوق أفكارك دى للفئة الأكبر عدداً من البشر .. اللى هو ركز على الحاجات المشتركة بين كل البشر . (مأكل و مشرب و روز .. قصدى تزاوج ) .

————————-

لكن ..

————————-

التقدم البشرى نفسه ماقامش على العلوم الحدسية دى ..

العلوم الحدسية اللى هى إنت ممكن تفهمها بالحدس كده .. بالفطرة ..

يعنى إنت مثلاً عارف تاكل إزاى .. تدخل الحمام إزاى .. تتجوز إزاى ..

لكن ..

و لكن دى مهمة جداً جداً ..

فطرتك لوحدها مش كفاية إنها تخليك تعمل الحاجات دى بكفاءة ..

يعنى إنت تعرف تاكل إزاى ..

تنط فوق الشجرة و تقطف الثمرة و تعض و تمضغ ..

لكن عشان تتمزج فى الاكل و تعمل دماغ ..

لازم تدرس علم غير منطقى إطلاقاً

علم غير حدسى إطلاقاً ..

إسمه علم الطبخ .. culinary science

اللى هو إشمعنى البصل يتحط عالنار 50 ثانية فدرجة حرارة معينة بزيت معين ؟!!!

إيه الفطرة فكدة ؟!

————————-

طبعاً نفس المثال ممكن يتم تطبيقه على باقى غرائز الإنسان .. بس حاضطر ساعتها أصنف البوست +18

————————-

و هنا الفكرة الأساسية فى البوست دة :

كل العلوم الإنسانية ممكن تتقسم تحت قسمين أساسيين ..

علوم حدسية intuitive sciences

علوم مضادة للحدس counter intuitive sciences

————————-

العلوم الحدسية اللى هى إنت بدماغك البشرية و طبيعتك و فطرتك الطبيعية ممكن توصلها بدون ما تفضل تفكر بشكل رياضى علمى ..

العلوم الغير حدسية .. عشان توصل لها .. لازم تفكر بشكل رياضى علمى بحت … أو نتيجة العلوم التجريبية .. و بعدين تفضل تدرس فى نتايج التجربة عشان تفهم ليه النتايج طلعت بالشكل ده !

————————-

لكن بالرغم من إن أغلبية الناس بقالها قرنين من الزمان تقريباً فهمت أهمية العلم المضاد للحدس .. و إنه لازم يتم نشره و نشر أهميته .. إلا إن ما زال الفرق ضخم جداً بين قدرة نوعين الأدب دول على الإنتشار ..

الأدب اللى بيستهدف .. ولامؤاخذة غرائزك ..

ضد الأدب اللى بيستهدف .. عقلك ..

————————-

ليه بقى أغلبية الناس بتحب العلوم الحدسية .. و بتصقف عند لقطة معينة** ففيلم تيتانيك ؟

و بتكره العلوم المضادة للحدس .. و دماغها يفصل لما تتفرج على ناشيونال جيوجرافى مثلاً ؟!

————————-

الإجابة على ده تستحق بوست تانى خالص ..

لكن دلوقتى حبيت بس أسيبكم مع الفكرة ذاتها ..

————————-

والله أعلم .