السؤال التالى لسة جايلى حالاً و بيتوجه ليا دايماً بصيغ مختلفة .. لكن نفس المحتوى تقريباً : 

——————-

ازيك يا باش مهندس.

انا عارف انك مشغول دايما ربنا يقويك فمش هطول عليك.

معرض الكتاب قرب وكنت عايزك ترشحلى شوية كتب عربى او انجليزى مش فى تخصص معين حاجه كدة لواحد مهووس كومبيوتر. يعنى ممكن ترجع بالذاكرة شوية بضع سنين لما كان الموضوع فى بدايته شغف لأنى حتى الان مش قادر اقرر انا عايز ادخل فى ايه بالضبط ومع الوقت هبدأ انى اكون فكرة اوضح تساعدنى ف اتخاذ قرار.

انا طولت برضه.

شكرا ليك جدا لو رديت وشكرا ليك برضه لو مردتش.

——————–

أنا إستأذنت صاحب السؤال فإنى أحول سؤاله لبوست للأسباب التالية :

1- فى العديييييييد ممن هم أعلم منى بمجالى و مختلف المجالات ممكن يشوفوا السؤال ده و يكونوا هما أحق بالإجابة عليه .. فأرجوا إفادة صاحب السؤال .

2- السؤال نفسه بيتكرر جداً عليا فظروف مختلفة … و تقريباً إجاباتى بتكون متشابهة جداً .. فإذن نتعلم من الأوبجكت أورينتد (لو كنت تعلم ما أعنيه) .. إنى أحوله لكلاس جاهزة .

3- إجابتى نفسها لا تمثل سوى تجربتى الشخصية .. و قد تنجح أو تفشل مع غيرى بناءاً على معايير كتييير .. و لا يتم إعتبارها بأى شكل وصفة جاهزة للوصول لنتيجة مسبقة .

——————–

الإجابة :

——————-

1- ناس كتير للأسف بتعامل جوعها للتعلم على إنه مصدر محدود و نادر .. و إنه لو أشبع جوعه للتعلم بتعلم الرياضيات مثلاً .. مش حايعرف ياكل فيزيا لأنه ملى بطنه رياضة .

و فوجهة نظرى المفهوم ده مفهوم خاطئ و خادع و خطير .. بسبب :

أ- جوعك للعلم بيكبر كل ما حاولت تشبعه .. و نهمك و شغفك بيكبر بمعدل متسارع كل ما حاولت تشبعه بشىء ما .

ب- كل العلوم متصلة … و معاملة أى علم كأنه منفصل عن أى علم آخر .. بيوصلك فى النهاية لرؤية غير متزنة و مفهوم غير كامل للتخصص .

بمعنى : إنى إبتديت دراستى الغير أكاديمية المتخصصة فنهاية 2008 بقراية 7 كتب فى المجالات التالية ( eastern medicine and shakras , chemistry , subatomic particle physics , game theory , philosophy of physics , java programming , the art of war by sun tzu)

و بعد إنتهائى منهم .. إخترت game theory كفرع أتخصص فيه بشكل أكبر .. و بناءا عليه كونت مشروعى الأول .. اللى إحتاج منى إنى أتعلم ( web development , manga illustration , politics , english literature )

و فى الوقت ذاته كنت بدأت أتخصص bio informatics .. مما دفعنى للتخصص فى المجال اللى باعتز بيه بشكل أكبر و هو : algorithm design and analysis

و كان بداية من 2009 إقتنائى لأول سمارت فون بالنسبالى : nokia n95 8 gigs

فكان دخولى لعالم ال audio books

و لسة ماخرجتش منه لحد دلوقتى تقريباً .. و أعتقد إنى ما زلت محتفظ بلستة من بعض الكتب دى (2009-2011 ) فمكتبة ديفيديهات .. حاحط اللستة دى فى الكومنت الأول إن شاء الله .