** إخواننا المصريين اللى زيي مالهومش دعوة بالموضوع ده .. أنا مش مصدق لحد دلوقتى إنى شفت درون من كام يوم فجامعة فاروس أساساً …

و طبيعى إن MIT واحدة من الحاجات اللى بتابعها و أشوف أخبارها يومياً .. فكان لازم أقف شوية قدام خبر جميل النهاردة الصبح ..

“المحرك – THE ENGINE” ده إسم المؤسسة اللى قررت MIT إنها تعملها عشان تكون (حضانة – Incubator ) للستارت أبس اللى بتستهدف ال (tough tech) – يعنى التكنولوجيا الفاجرة بالعامى الفصيح …

و لسة النهاردة واخدين تمويل ب200 مليون دولار عشان يمشوا العملية و يعرفوا يركزوا .

“المحرك – THE ENGINE” أعلن برضو عن أول سبع إستثمارات ليه .. فشركات ناشئة .. كل واحدة منهم محتاجة مثلاً عدد 2 فيديو و أربع مقالات عالأقل عشان أحس إنى رضيت ضميرى و أنا باتكلم عنهم ..

لكن سريعاً جداً .. جداً .. حاذكر واحدة هنا (لغرض فى نفس يعقوب حاذكره فآخر البوست ) :

analytical space :

https://www.analyticalspace.com

كم المعلومات اللى بيتحصل عليها الأقمار الصناعية كل كام ساعة ضخم جداً جداً .. (بيساوى تقريباً حجم المعلومات بتاع مكتبة الكونجرس ) .. و تكلفة نقل الكم ده من المعلومات ضخمة جداً.. و عملية معقدة جداً جداً.. فهما قرروا إنهم يعملوا شبكة من (السويتشات) اللى تسمح بنقل الداتا دى كلها بشكل أرخص و أسهل .

* عايز تفهم ببساطة مجحفة ده معناه إيه ؟ ..

عارف الإنترنت الحالى .. اللى هو عبارة عن الشبكة اللى بتوصل كل الأجهزة (مش كمبيوتر بس خلاص ) ببعضها .. اللى هو إستخدم الأسلاك بتاعت التيليفون اللى أساساً موجودة .. و حط شوية أجهزة زيادة .. و بقى إنترنت . ..

هما فكروا .. هممم .. طب ما نعمل شبكة إحنا كمان توصل كل الأقمار الصناعية ببعضها .. و بعدين نوصلها بالإنترنت ..

—————————–

آخر البوست 🙂 :

المخترعين نسبة كبيرة منهم بتكون أسوأ المستثمرين .. لأن المخترع بطبعه بيكون شايف إن 99% من المخاطرة ناجحة .. لأنه متحيز دائماً تجاه إنجاحها فعقله .

ال bankers نسبة كبيرة منهم بتكون أكثر المستثمرين mediocrity لأنهم بطبعهم شايفين إن 99% من المخاطرة فاشلة .. و دايماً بيراهنوا على المخاطرة الأقل مع عائد النجاح الأقل برضو .

المستثمرين (أياً كان حجمهم ) الناجحين جداً .. هما (فوجهة نظرى ) اللى بيلاحظو ال patterns أو القوالب متكررة الحدوث بشكل جيد .. و بيستنوا اللحظة المناسبة فبداية الموجة .. عشان ي surf .

و من أكتر الحاجات اللى باستغربها جداً .. هى إن الناس دايماً بتفهم إن الإستثمار .. بيكون بمورد واحد من عدد كبير من الموارد اللى بيمتلكوها .. الا وهو : الفلوس !!

** فى محاضرة قادمة حاتكلم عن ده بتفاصيل أكتر إن شاء الله 😉 .. COMING SOON

والله أعلم

** المصادر فى الكومنتات