سنة 2010 كنت ضمن فريق بحث فمجال البايوإنفورماتكس .. خصوصاً ال (إيبيجينيتكس) .. اللى هو بالمختصر المخل جداً جداً .. كنا بندرس كيفية تركيب جينات الإنسان و الميكانيزمات المسئولة عن ده و كيفية التلاعب فيها عن طريق عقاقير خارجية لمكافحة نوعيات معينة من السرطانات .

دورى فى الليلة دى كان : مصمم و باحث خوارزميات ..

اللى هو بالمختصر المخل جداً جداً برضو : إتخيل مثلاً المكعب السحرى .. إتخيل برنامج الكمبيوتر اللى مسئول يطلعلك كل الطرق المتاحة لحله من أى وضع هو عليه حالياً .. و يوضحلك كمان إزاى ترجع للنقطة دى .

أنا كان دورى تصميم البرنامج ده .. و الرياضة اللى فيه .. و كده .

.

الرياضة و الخوارزميات و الليلة دى بالنسبالى كانت و مازالت سهلة و ممتعة و مابتاخدش منى مجهود عقلى كبير عشان أفهمها و أحلها أو أبنيها … ربنا خلقنى متميز فى الموضوع ده بفضله .

.

اللى كان مشكلة بالنسبالى دايماً … و مازال لحد دلوقتى .. هى حفظ أى معلومة تفصيلية ملهاش إستخدام فعقلى .. و مافيش طريقة أسترجعها بيها … أو مافيش وقت أسترجعها فيها …

على سبيل المثال :

– أرقام التيليفونات .. عمرى ما حفظتها (و حافظ رقمى بنغمة موسيقية بالعافية)

– جميع قوانين و formulas الكلية .. من أول القانون التلات رموز لحد ال 14 رمز … 0

– العناوين و الإتجاهات .. (باتوه فطرقة بيتنا ) .. و ضايع فى السواقة .

– أسامى الناس … ( غير ال20 شخص المحيطين بيا تقريباً ) .. الباقى كله ( باشا و زميل و أستاذة ) .

..

تقدر تقول إن دماغى لو جهاز كمبيوتر .. فالرامات بتاعتها صغيرة جداً جداً ..

لو سبتلى وقت كافى ححاول ابنى أكتر من طريقة عشان أسترجع أى معلومة من دول من تلافيف مخى بطرق كتير (طرق تقوية الذاكرة و تمرينها معروفة ) ..

..

و لكن :

..

فى فريق البحث ده .. قائدة الفريق ربنا يباركلها .. علمتنى شىء مهم جداً جداً جداً ..

علمتنى آكل المعلومات نية .. و أسويها فدماغى ..

يعنى إيه ؟

يعنى المجال اللى كنا شغالين فيه و بنبحث فيه .. مكانش فيه عنه فى الوقت ده فيديوهات يوتيوب مبسطة دمها خفيف تشرحه ..

ولا كان فى إنفوجرافيكس أو ألعاب أو أياً كان من الوسائل المتاحة حالياً اللى بتشرح معلومات كتييييييير جداً و مجالات كتييير جداً ..

…

كان فى : research papers

يعنى ورق بحثى .

اللى هو المعلومة فى أول شكل بتتخذه بعد ما بتطلع من دماغ الباحث اللى وجدها .

و كمان علمتنا إزاى نقيم و نقرا و نبحث فجودة المعلومة دى بشكلها المبسط ده ..

…

و الطريقة اللى علمتنا بيها ده كانت بسيطة جداً .. ألا وهى :

((( مافيش حل تانى )))

يعنى مش تعالى كده و هات الأبستراكت بتاع الورقة البحثية و تعالى نقرأ كلمة كلمة ..

لا ..

ده إنت لو مافحتش نفسك و جاهدت عشان تعرف الراجل اللى كتب الورقة البحثية دى قصده إيه .. عمرك ما حتعرف تكمل فمجال زى ده .

…

المهارة دى بعد كده إكتشفت قد إيه إنها مهمة …

و علمتنى قد إيه أفرح لما ألاقى حد مبسط المعلومة فأى مجال .. و لكن لو مالقتش .. أدور على المعلومة فشكلها المعقد .. اللى ممكن ألاقيه فى :

help page in a website

help page in a program

forum post

quora question

even a comment

….

…

و باستغرب جداً لما بالاقى ناس .. منتظرة إن المعلومات تجيلها لحد عندها .. بدون حتى ما تسأل أو تتعلم تسأل السؤال الصح !!

اللى هو أحيان كتير حد بيجيلى بسؤال … فأسأله .. دورت فجوجل ؟!

يقولى لا ..

أبقى عايز أسئله : يعنى إنت شايفنى أحسن من جوجل إن شاء الله ؟!!!!!!

…

فاهم فكرة إنه شايف إنى حاوفر عليه مجهود 10 دقائق بحث مثلاً … بس لو ماجربش يدور لمدة عشر دقائق فسؤال أنا عارف إجابته ..

لما يواجه سؤال إجابتى عليه هى (مش عارف) .. حتكون النتيجة إنه حيقف .. و مش حايكمل .. أو حايدور على حد غيرى فوقت أكبر بكتيييييير من اللى كان ممكن يبذله على جوجل .

….

…

الموضوع فبالى بقاله فترة .. لدرجة إنى كتبت سكريبت لفيديو بالتفصيل و الأمثلة كنت ناوى أعمله .. بس فعلاً بقالى أسبوعين فى موود دراسة ولا بتاع ثانوى عام .. و عايش وسط معلومات نية بصورتها الأولية .. و مستمتع جداً جداً ..

….

ملحوظة أخيرة كمثال :

لما دخلت عالم البيتكوين سنة 2014 .. كان واحد بيتكوين = 160 دولار ..

و كانت كل المعلومات اللى موجودة عن العالم ده لسة شبه نية .. و white paper .. و شوية رياضة لمين و شمال .

فضلت أذاكر فى الليلة دى و بعدين عملت الفيديوهات أياها كوسيلة كوميدية لطبخ المعلومات دى و كده .

دلوقتى فى كم ضخم جداً جداًَ من المعلومات المطبوخة و الفيديوهات الكوميدية خفيفة الظل و الروح عن البيتكوين و الكريبتوكارانسى ..

بس واحد بيتكوين أصبح أكتر من 4000 دولار ..

فهمتنى ؟!

…

والله أعلم